ಜೂನ್ 30ರ ತನಕ ಭಾರತ- ಚೀನಾ ಮಧ್ಯೆ ಏರ್ ಇಂಡಿಯಾ ವಿಮಾನ ಇಲ್ಲ
ಈ ವರ್ಷದ ಜೂನ್ 30ನೇ ತಾರೀಕಿನ ತನಕ ಚೀನಾ ದೇಶಕ್ಕೆ ಯಾವುದೇ ವಿಮಾನ ಹಾರಾಟ ನಡೆಸದಿರುವುದಕ್ಕೆ ಏರ್ ಇಂಡಿಯಾ ತೀರ್ಮಾನಿಸಿದೆ. ಈ ಬಗ್ಗೆ ಗುರುವಾರ ಘೋಷಣೆ ಕೂಡ ಮಾಡಿದೆ. ಚೀನಾದಲ್ಲಿ ಕೊರೊನೊ ವೈರಾಣು ಕಾಳ್ಗಿಚ್ಚಿನಂತೆ ಹಬ್ಬುತ್ತಿದ್ದು, ಚೀನಿ ಅಧಿಕಾರಿಗಳು ರೋಗವನ್ನು ನಿಯಂತ್ರಿಸಲು ಹರಸಾಹಸ ಪಡುತ್ತಿದ್ದಾರೆ.
ಜನವರಿ 31ರಿಂದ ಫೆಬ್ರವರಿ 14ರ ತನಕ ದೆಹಲಿ- ಶಾಂಘೈ ಮಧ್ಯದ ಎಲ್ಲ ವಿಮಾನ ಹಾರಾಟವನ್ನು ಏರ್ ಇಂಡಿಯಾ ರದ್ದು ಮಾಡಿತ್ತು. ಆದರೆ ಫೆಬ್ರವರಿ 15ನೇ ತಾರೀಕಿನಿಂದ ಕೂಡ ಸೇವೆ ಪುನರಾರಂಭ ಮಾಡಲಿಲ್ಲ. ಅಷ್ಟೇ ಅಲ್ಲ, ಕೊರೊನಾ ಭೀತಿಯಿಂದಲೇ ದೆಹಲಿ- ಹಾಂಕಾಂಗ್ ಮಧ್ಯದ ವಿಮಾನ ಹಾರಾಟವನ್ನೂ ರದ್ದು ಮಾಡಿತು.
ಕೊರೊನಾ ವೈರಸ್ ಎಫೆಕ್ಟ್; 3 ತಿಂಗಳ ಕನಿಷ್ಠ ಮಟ್ಟಕ್ಕೆ ಇಳಿಯಿತು ತೈಲ ಬೆಲೆ
ಅಂದ ಹಾಗೆ, ದೆಹಲಿ- ಶಾಂಘೈ ಮಧ್ಯೆ ವಾರದಲ್ಲಿ ಆರು ವಿಮಾನಗಳು ಹಾರಾಟ ಬಡೆಸುತ್ತಿದ್ದವು. ಆದರೆ ಯಾವಾಗ ಮಾರಕ ಸಾಂಕ್ರಾಮಿಕ ರೋಗ ಕೊರೊನಾಗೆ ಚೀನಾದಲ್ಲಿ ಸಾವಿರಕ್ಕೂ ಹೆಚ್ಚು ಮಂದಿ ಬಲಿಯಾದರೋ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ.
"ದೆಹಲಿ- ಶಾಂಘೈ, ದೆಹಲಿ- ಹಾಂಕಾಂಗ್ ಮಧ್ಯ ವಿಮಾನ ಹಾರಾಟವನ್ನು ಜೂನ್ 30ನೇ ತಾರೀಕಿನ ತನಕ ರದ್ದು ಮಾಡಲಾಗಿದೆ" ಎಂದು ಏರ್ ಇಂಡಿಯಾದ ವಕ್ತಾರರು ತಿಳಿಸಿದ್ದಾರೆ. ಇದಕ್ಕೂ ಮುನ್ನ ಇಂಡಿಗೋ ಮತ್ತು ಸ್ಪೈಸ್ ಜೆಟ್ ನಿಂದ ಭಾರತ ಹಾಗೂ ಚೀನಾ ಮಧ್ಯದ ವಿಮಾನ ಹಾರಾಟ ನಿಲ್ಲಿಸಲಾಗಿತ್ತು.