ಅಮೆಜಾನ್ ವೆಬ್ ಸರ್ವೀಸಸ್ ನಿಂದ ತೆಲಂಗಾಣದಲ್ಲಿ 20,761 ಕೋಟಿ ರು. ಹೂಡಿಕೆ

ತೆಲಂಗಾಣದ ಹೈದರಾಬಾದ್ ನಲ್ಲಿ ಅಮೆಜಾನ್ ವೆಬ್ ಸರ್ವೀಸಸ್ (ಎಡಬ್ಲ್ಯುಎಸ್) ಆರಂಭಿಸಲಾಗುವುದು ಎಂದು ಕಂಪೆನಿಯ ಐಟಿ ಸರ್ವೀಸ್ ಮ್ಯಾನೇಜ್ ಮೆಂಟ್ ಶುಕ್ರವಾರ ಘೋಷಣೆ ಮಾಡಿದೆ. ಎಡಬ್ಲ್ಯುಎಸ್ ನಿಂದ ಮೂರು ಸ್ಥಳಗಳಲ್ಲಿ ಡೇಟಾ ಸೆಂಟರ್ ಗಳನ್ನು ಆರಂಭಿಸಲಾಗುವುದು. ಅದಕ್ಕಾಗಿ ಅಂದಾಜು 20,761 ಕೋಟಿ ರುಪಾಯಿ ಹೂಡಿಕೆ ಮಾಡಲಾಗುವುದು.

2022ರ ಮಧ್ಯ ಭಾಗದ ಹೊತ್ತಿಗೆ ಎಡಬ್ಲ್ಯುಎಸ್ ಏಷ್ಯಾ ಪೆಸಿಫಿಕ್ ವಿಭಾಗದ ಕಾರ್ಯ ನಿರ್ವಹಣೆ ಹೈದರಾಬಾದ್ ನಲ್ಲಿ ಶುರುವಾಗಲಿದೆ. ಒಂದೇ ಪ್ರಾದೇಶಿಕ ಭಾಗದಲ್ಲಿ ಹಲವು ಡೇಟಾ ಸೆಂಟರ್ ಗಳನ್ನು ಆರಂಭ ಮಾಡಲಾಗುವುದು. ಶುಕ್ರವಾರದಂದು ತೆಲಂಗಾಣ ಐಟಿ ಸಚಿವ ಕೆ.ಟಿ. ರಾಮರಾವ್ ಈ ಬಗ್ಗೆ ಟ್ವೀಟ್ ಮಾಡಿದ್ದಾರೆ.

ಅಮೆಜಾನ್ ವೆಬ್ ಸರ್ವೀಸಸ್ ಸೆಂಟರ್ ಅಧಿಕಾರಿಗಳ ಜತೆಗೆ ಸಚಿವರು ಸಭೆಯನ್ನು ನಡೆಸಿದ್ದಾರೆ. ಈ ವರ್ಷದ ಆರಂಭದಲ್ಲಿ ದಾವೋಸ್ ಗೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಈ ಹೂಡಿಕೆ ಬಗ್ಗೆ ಸಭೆ ನಡೆದಿತ್ತು. ಎಡಬ್ಲ್ಯುಎಸ್ ಹೂಡಿಕೆ ಮೂಲಕವಾಗಿ ಡೇಟಾ ಸೆಂಟರ್ ಆರಂಭಿಸಲು ತೆಲಂಗಾಣ ರಾಜ್ಯವು ಅತಿ ಮುಖ್ಯ ಕೇಂದ್ರವಾಗಿ ಭವಿಷ್ಯದಲ್ಲಿ ಹೊರಹೊಮ್ಮಲಿದೆ ಎಂದು ರಾಜ್ಯ ಸರ್ಕಾರ ಹೇಳಿದೆ.