7500 ಕೋಟಿ ಮೌಲ್ಯದ ಭಾರ್ತಿ ಏರ್ ಟೆಲ್ ಷೇರುಗಳು ಬ್ಲಾಕ್ ಡೀಲ್ ನಲ್ಲಿ ಮಾರಾಟ

ಭಾರ್ತಿ ಏರ್ ಟೆಲ್, ಭಾರ್ತಿ ಟೆಲಿಕಾಂ ಪ್ರಮೋಟರ್ (ಪ್ರವರ್ತಕರು) 1 ಬಿಲಿಯನ್ ಅಮೆರಿಕನ್ ಡಾಲರ್ (7500 ಕೋಟಿ ರುಪಾಯಿಗೂ ಹೆಚ್ಚು) ಮೌಲ್ಯದ ಷೇರಿನ ಪಾಲನ್ನು ಮಂಗಳವಾರ ಬ್ಲಾಕ್ ಡೀಲ್ ಮೂಲಕ ಮಾರಾಟ ಮಾಡಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಪ್ರತಿ ಷೇರಿಗೆ 558 ರುಪಾಯಿಯಂತೆ, 2.75 ಪರ್ಸೆಂಟ್ ಷೇರನ್ನು ಜೆ.ಪಿ. ಮೋರ್ಗನ್ ಇಂಡಿಯಾ ಪ್ರೈ. ಲಿಮಿಟೆಡ್ ಮೂಲಕ ಮಾರಾಟ ಮಾಡಲಾಗುತ್ತದೆ.

"ಇದರಿಂದ ಸಾಲದ ಮರುಪಾವತಿಯಾಗುತ್ತದೆ, ಈ ವ್ಯವಹಾರದ ನಂತರ ಪ್ರಮೋಟರ್ ಹಂತದ ಸಾಲವು ಶೂನ್ಯವಾಗುತ್ತದೆ" ಎಂದು ಹೇಳಲಾಗಿದೆ. ಸದ್ಯಕ್ಕೆ ಪ್ರವರ್ತಕರ ಷೇರಿನ ಪ್ರಮಾಣ 58.98 ಪರ್ಸೆಂಟ್ ಇದೆ. ಈಗ ಪಾಲನ್ನು ಮಾರಾಟ ಮಾಡಿದ ನಂತರ ಆ ಪ್ರಮಾಣವು 56.23 ಪರ್ಸೆಂಟ್ ಗೆ ಕುಸಿಯುತ್ತದೆ. ಕಳೆದ ಮೂರು ವರ್ಷಗಳಿಂದ ಭಾರ್ತಿ ಏರ್ ಟೆಲ್ ವಿವಿಧ ಬಗೆಯಲ್ಲಿ ಹಣ ಸಂಗ್ರಹ ಮಾಡುತ್ತಾ ಬರುತ್ತಿದೆ.

ಎಜಿಆರ್ (ಅಡ್ಜಸ್ಟಡ್ ಗ್ರಾಸ್ ರೆವೆನ್ಯೂ) 35,586 ಕೋಟಿ ರುಪಾಯಿ ಪಾವತಿ ಮಾಡುವಂತೆ ಕಳೆದ ಅಕ್ಟೋಬರ್ ನಲ್ಲಿ ಸುಪ್ರೀಂ ಕೋರ್ಟ್ ಭಾರ್ತಿ ಏರ್ ಟೆಲ್ ಗೆ ಆದೇಶಿಸಿತ್ತು. ಕಳೆದ ಡಿಸೆಂಬರ್ ನಲ್ಲಿ ದರ ಏರಿಕೆಯಿಂದಾಗಿ ಜನವರಿ- ಮಾರ್ಚ್ ತ್ರೈ ಮಾಸಿಕದ ಫಲಿತಾಂಶ ಸುಧಾರಣೆ ಆಗಿದೆ.

ಭಾರ್ತಿ ಏರ್ ಟೆಲ್ ಷೇರು ಶುಕ್ರವಾರದ ದಿನಾಂತ್ಯಕ್ಕೆ (ಮೇ 22, 2020) ಪ್ರತಿ ಷೇರಿಗೆ 593 ರುಪಾಯಿಯಂತೆ ವ್ಯವಹಾರ ಮುಗಿಸಿದೆ.