L&T, ಹೀರೋ ಮೋಟೋಕಾರ್ಪ್ ನಂಥ ಘಟಾನುಘಟಿ ಷೇರು ವಾರ್ಷಿಕ ಕನಿಷ್ಠಕ್ಕೆ

ಬ್ಲ್ಯೂಚಿಪ್ ಷೇರುಗಳಾದ ಹೀರೋ ಮೋಟೋಕಾರ್ಪ್, ಲಾರ್ಸನ್ ಅಂಡ್ ಟೂಬ್ರೋ ಮತ್ತು ಹಿಂದೂಸ್ತಾನ್ ಜಿಂಕ್ ಸೋಮವಾರದಂದು 52 ವಾರಗಳ ಕನಿಷ್ಠ ಮಟ್ಟವನ್ನು ತಲುಪಿವೆ. ಸೆನ್ಸೆಕ್ಸ್ ಸೂಚ್ಯಂಕವು 400 ಪಾಯಿಂಟ್ ನಷ್ಟು ಇಳಿದಿದೆ. ಜಾಗತಿಕ ಮಟ್ಟದಲ್ಲಿ ಕೊರೊನಾ ವೈರಾಣು ವ್ಯಾಪಿಸಿರುವ ಹಿನ್ನೆಲೆಯಲ್ಲಿ ಹೀಗೆ ದಿಢೀರ್ ಕುಸಿತ ಕಂಡಿದೆ.

ಎನ್ ಎಸ್ ಇಯಲ್ಲಿ ಹೀರೋ ಮೋಟೋಕಾರ್ಪ್ ಷೇರುಗಳು 52 ವಾರದ ಕನಿಷ್ಠ ಮಟ್ಟವಾದ ರು. 2,190.30 ತಲುಪಿತು. ಕಳೆದ ಕೆಲವು ತ್ರೈ ಮಾಸಿಕದಿಂದ ನಿರಂತರವಾಗಿ ಇಳಿಕೆ ಕಾಣುತ್ತಿರುವುದರಿಂದ ಹೂಡಿಕೆದಾರರು ಈ ಷೇರಿನ ಬಗ್ಗೆ ಆಸಕ್ತಿ ಕಳೆದುಕೊಳ್ಳುತ್ತಿದ್ದಾರೆ. 4 ಪರ್ಸೆಂಟ್ ತನಕ ಡಿವಿಡೆಂಡ್ ಪ್ರತಿಫಲ ನಿರೀಕ್ಷೆ ಮಾಡಬಹುದಾದ ಷೇರು ಇದು.

ಇದೇ ರೀತಿ 52 ವಾರಗಳ ಕನಿಷ್ಠ ಮಟ್ಟಕ್ಕೆ ಮುಟ್ಟಿದ ಮತ್ತೊಂದು ಕಂಪೆನಿಯೆಂದರೆ ಹಿಂದೂಸ್ತಾನ್ ಜಿಂಕ್. ಅದು 179 ರುಪಾಯಿಗೆ ಕುಸಿದಿದೆ. ಡಿಸೆಂಬರ್ ಅಂತ್ಯಕ್ಕೆ ಕೊನೆಯಾದ ತ್ರೈಮಾಸಿಕದಲ್ಲಿ ಫಲಿತಾಂಶ ಚೆನ್ನಾಗಿಲ್ಲ ಎಂಬ ಕಾರಣಕ್ಕೆ ಈ ಪರಿಸ್ಥಿತಿ ಆಗಿದೆ.

ಆರ್ಥಿಕತೆ ಹಿಂಜರಿತದ ಬಗ್ಗೆ ಹೂಡಿಕೆದಾರರು ಆತಂಕಗೊಂಡಿರುವುದರಿಂದ ಲಾರ್ಸನ್ ಅಂಡ್ ಟೂಬ್ರೋ (ಎಲ್ ಅಂಡ್ ಟಿ) 52 ವಾರಗಳ ಕನಿಷ್ಠ ಮಟ್ಟ ಮುಟ್ಟಿದೆ. ರು. 1252.65ರಲ್ಲಿ ವಹಿವಾಟು ನಡೆಸುತ್ತಿದೆ. ಈ ಎಲ್ಲ ಷೇರುಗಳಲ್ಲಿ ಮೌಲ್ಯಯುತ ಖರೀದಿಗೆ ಮುಂದಾದರೆ ಮುಂಬರುವ ದಿನಗಳಲ್ಲಿ ಉತ್ತಮ ಏರಿಕೆ ಕಾಣುವ ಸಾಧ್ಯತೆ ಇದೆ.