ಬಜೆಟ್ 2021: ದೀರ್ಘಾವಧಿ ಬಜೆಟ್ ಭಾಷಣಗಳಿಗೆ ಹೆಸರಾದ ನಿರ್ಮಲಾ

ಬಜೆಟ್ 2021ರ ಮಂಡನೆಗೆ ಎಲ್ಲ ಸಿದ್ಧತೆ ಆಗಿದೆ. ಈ ವರ್ಷದ ಬಜೆಟ್ ಭಾಷಣದ ಕಾಲಾವಧಿ ಎಷ್ಟಿರಬಹುದು ಎಂಬುದು ಸದ್ಯದ ಕುತೂಹಲವಾಗಿದೆ. ನಿರ್ಮಲಾ ಮೂರನೇ ಬಾರಿಗೆ ಬಜೆಟ್ ಮಂಡನೆ ಮಾಡುತ್ತಿದ್ದು, ದೀರ್ಘಾವಧಿ ಭಾಷಣಗಳಿಗೆ ಹೆಸರಿಟ್ಟಂತೆ ಈ ಹಿಂದೆ ಬಜೆಟ್ ಮಂಡನೆ ಮಾಡಿದ್ದಾರೆ.

ಕಳೆದ ವರ್ಷ ಅಸ್ವಾಸ್ಥ್ಯ ಕಾಣಿಸಿಕೊಂಡು ಭಾಷಣ ಮೊಟಕುಗೊಳಿಸಿದ್ದರು ನಿರ್ಮಲಾ. ಆದರೂ ಅದು ಸಾರ್ವಕಾಲಿಕ ದೀರ್ಘ ಅವಧಿಯ ಭಾಷಣ ಅದಾಗಿತ್ತು. 162 ನಿಮಿಷ, ಅಂದರೆ 2 ಗಂಟೆ 42 ನಿಮಿಷಗಳ ಕಾಲ ಅಷ್ಟು ಹೊತ್ತಿಗಾಗಲೇ ಬಜೆಟ್ ಭಾಷಣ ಮಾಡಿದ್ದರು ನಿರ್ಮಲಾ ಸೀತಾರಾಮನ್. 2019ರಲ್ಲಿ ಅವರೇ ಮಂಡಿಸಿದ್ದ ದೀರ್ಘಾವಧಿ ಭಾಷಣದ ದಾಖಲೆಯನ್ನು ಮುರಿದಿದ್ದರು. ಆಗ ಕೂಡ ಅಸ್ವಾಸ್ಥ್ಯದ ಕಾರಣಕ್ಕೆ ಎರಡು ಪುಟಗಳನ್ನು ಓದಿರಲಿಲ್ಲ.

ಅದಕ್ಕೂ ಮುನ್ನ, 2019ರಲ್ಲಿ ನಿರ್ಮಲಾ ಸೀತಾರಾಮನ್ ಅವರು 2 ಗಂಟೆ 15 ನಿಮಿಷ ಬಜೆಟ್ ಭಾಷಣ ಓದಿದ್ದರು. ಸಾಮಾನ್ಯವಾಗಿ ಬಜೆಟ್ ಭಾಷಣದ ಅವಧಿ 90ರಿಂದ 120 ನಿಮಿಷ ಇರುತ್ತದೆ.

ಈ ಮಧ್ಯೆ, ಪ್ರಧಾನಿ ನರೇಂದ್ರ ಮೋದಿಯವರು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರನ್ನು ಹೊಗಳಿದ್ದಾರೆ. ಭಾರತದ ಇತಿಹಾಸದಲ್ಲೇ ಬಹುಶಃ ಮೊದಲ ಬಾರಿಗೆ ಹಣಕಾಸು ಸಚಿವರೊಬ್ಬರು ನಾಲ್ಕರಿಂದ ಐದು ಮಿನಿ ಬಜೆಟ್ ನೀಡಬೇಕಾಯಿತು. 2020ರಲ್ಲಿ ವಿವಿಧ ಪ್ಯಾಕೇಜ್ ರೂಪದಲ್ಲಿ ನೀಡಿದರು. ಆದ್ದರಿಂದ ಈ ಬಜೆಟ್ ಕೂಡ ಆ ಸರಣಿಯ ಭಾಗದಂತೆ ಇರಲಿದೆ ಎಂಬ ವಿಶ್ವಾಸ ಇದೆ ಎಂದಿದ್ದಾರೆ.