ಬಜೆಟ್ 2021: ಶೀಘ್ರದಲ್ಲಿಯೇ ಇನ್ನೂ ಎರಡು ಕೋವಿಡ್ ಲಸಿಕೆ

ನವದೆಹಲಿ, ಫೆಬ್ರವರಿ 1: ದೇಶದಲ್ಲಿ ಪ್ರಸ್ತುತ ಎರಡು ಕೊರೊನಾ ವೈರಸ್ ಲಸಿಕೆಗಳು ತುರ್ತು ಬಳಕೆಯ ಅನುಮತಿ ಪಡೆದುಕೊಂಡಿವೆ. ಇದಲ್ಲದೆ ಇನ್ನೂ ಅನೇಕ ಲಸಿಕೆಗಳು ಪ್ರಯೋಗದ ವಿವಿಧ ಹಂತಗಳಲ್ಲಿವೆ. ಶೀಘ್ರದಲ್ಲಿಯೇ ಇನ್ನೆರಡು ಕೋವಿಡ್ ಲಸಿಕೆಗಳು ಬಳಕೆಗೆ ಬರುವ ನಿರೀಕ್ಷೆಯಿದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ತಿಳಿಸಿದ್ದಾರೆ.

ಸಂಸತ್‌ನಲ್ಲಿ ಸೋಮವಾರ ಬಜೆಟ್ ಮಂಡನೆ ಮಾಡಿದ ನಿರ್ಮಲಾ ಸೀತಾರಾಮನ್, 'ಭಾರತದಲ್ಲಿ ಇಂದು ಎರಡು ಲಸಿಕೆಗಳು ಲಭ್ಯವಿದೆ. ಈ ಲಸಿಕೆಗಳು ನಮ್ಮದೇ ನಾಗರಿಕರನ್ನು ಕೋವಿಡ್ ವಿರುದ್ಧದ ರಕ್ಷಿಸುವ ಕಾರ್ಯವನ್ನು ಮಾಡಿದೆ ಮಾತ್ರವಲ್ಲದೆ, ಇನ್ನೂ ನೂರಾರು ದೇಶಗಳಲ್ಲಿ ಬಳಕೆಯಾಗುತ್ತಿವೆ. ದೇಶದಲ್ಲಿ ಇನ್ನೂ ಎರಡು ಲಸಿಕೆಗಳು ಶೀಘ್ರದಲ್ಲಿಯೇ ಬರಲಿವೆ ಎನ್ನುವುದು ಮತ್ತಷ್ಟು ನೆಮ್ಮದಿ ನೀಡಿದೆ' ಎಂದು ನಿರ್ಮಲಾ ಹೇಳಿದರು.

ಕಳೆದ ಕೆಲವು ತಿಂಗಳಲ್ಲಿ ಮೂರು ಬಾರಿ ವಿವಿಧ ಆರ್ಥಿಕ ಪ್ಯಾಕೇಜ್‌ಗಳನ್ನು ಸರ್ಕಾರ ಮತ್ತು ಆರ್‌ಬಿಐ ಘೋಷಿಸಿದೆ. ಎಲ್ಲ ಕೋವಿಡ್ ನಿರ್ವಹಣಾ ಕ್ರಮಗಳಿಗಾಗಿ ಘೋಷಿಸಿದ ಒಟ್ಟು ಅಂದಾಜು ಮೊತ್ತ 27.1 ಲಕ್ಷ ಕೋಟಿ ರೂದಷ್ಟಿದೆ. ಇದು ದೇಶದ ಜಿಡಿಪಿಯ ಶೇ 13ರಷ್ಟು ವೆಚ್ಚವಾಗಲಿದೆ ಎಂದು ನಿರ್ಮನಾ ಸೀತಾರಾಮನ್ ತಿಳಿಸಿದ್ದಾರೆ.