ಕೆನರಾ ಬ್ಯಾಂಕ್ ಉತ್ತಮ ಗಳಿಕೆ ನಡುವೆಯೂ ಶೇ 17.75ರಷ್ಟು ಕುಸಿತ
ಕರ್ನಾಟಕ ಮೂಲದ ಪ್ರಮುಖ ಹಣಕಾಸು ಸಂಸ್ಥೆ ಕೆನರಾ ಬ್ಯಾಂಕ್ ತನ್ನ ತ್ರೈಮಾಸಿಕ ವರದಿ ಪ್ರಕಟಿಸಿದ ಬೆನ್ನಲ್ಲೇ ಷೇರುಪೇಟೆಯಲ್ಲಿ ಭಾರಿ ಕುಸಿತ ಕಂಡಿದೆ. ಆದಾಯ ಗಳಿಕೆಯಲ್ಲಿ ಸರಿ ಸುಮಾರು ಶೇ 65ರಷ್ಟು ಹೆಚ್ಚಳ ಗಳಿಸಿದರೂ ಸೋಮವಾರದಂದು ಬಿಎಸ್ಇಯಲ್ಲಿ ಶೇ 17.75ರಷ್ಟು ಕುಸಿತ ಕಂಡಿದೆ. ಇದಕ್ಕೂ ಮುನ್ನ ಶೇ 4.72ರಷ್ಟು ಕುಸಿತದೊಂದಿಗೆ 214.5 ರು ನಂತೆ ವಹಿವಾಟು ಆರಂಭಗೊಂಡು, ನಿರಂತರ ಇಳಿಮುಖ ಕಂಡಿತು. ದಿನದ ಅಂತ್ಯಕ್ಕೆ 200.55 ರು ನಂತೆ ಶೇ 8.75ರಷ್ಟು ಇಳಿಕೆ ಕಂಡು 18.80 ರು ಕಳೆದುಕೊಂಡಿದೆ.
ಬೆಂಗಳೂರಿನಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಕೆನರಾ ಬ್ಯಾಂಕ್ ಮಾರ್ಚ್ 31ಕ್ಕೆ ಅಂತ್ಯ ಕಂಡ ತ್ರೈಮಾಸಿಕದಂತೆ 1,666.22 ಕೋಟಿ ರು ನಿವ್ವಳ ಲಾಭ ಗಳಿಸಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 1,010.87 ಕೋಟಿ ರು ಮಾತ್ರ ಗಳಿಸಿತ್ತು.
2021-22ರ ಜನವರಿ -ಮಾರ್ಚ್ ಅವಧಿಯಲ್ಲಿ ಒಟ್ಟಾರೆ ಆದಾಯ ಏರಿಕೆಯಾಗಿ 22,323.11 ಕೋಟಿ ರು ಗಳಿಸಿದೆ. 2020-21ರ ಅವಧಿಯಲ್ಲಿ 21,040.63 ಕೋಟಿ ರು ಗಳಿಸಿತ್ತು ಎಂದು ಷೇರುಪೇಟೆಗೆ ಸಂಸ್ಥೆ ತಿಳಿಸಿದೆ.
ಸಂಸ್ಥೆಯ ಅನುತ್ಪಾದಕ ಆಸ್ತಿ(NPAs) ಅಥವಾ ಕೆಟ್ಟ ಸಾಲಗಳ ಪ್ರಮಾಣ ಶೇ 7.51ರಷ್ಟು ಕುಸಿತ ಕಂಡಿದೆ. 2021ರ ಅವಧಿಯಲ್ಲಿ ಶೇ 8.93ರಷ್ಟು ಪ್ರಮಾಣವಿತ್ತು.
ಒಟ್ಟಾರೆ, ಎನ್ ಪಿಎ 60,287.84 ಕೋಟಿ ರು ನಿಂದ 55,651.58 ಕೋಟಿ ರುಗೆ ಇಳಿದಿದೆ. ತ್ರೈಮಾಸಿಕದಲ್ಲಿ 18,668.02 ಕೋಟಿ ರು ಆಗಿದ್ದು, ಈ ಮುಂಚೆ 24,442.07 ಕೋಟಿ ರು ನಷ್ಟಿತ್ತು. ಬ್ಯಾಂಕ್ ತನ್ನ ಷೇರುದಾರರಿಗೆ 6.50 ರು ಪ್ರತಿ ಷೇರಿನಂತೆ ಡಿವಿಡೆಂಡ್ ಘೋಷಿಸಿದೆ.
ಷೇರು ಖರೀದಿಸಿ: ಕೆನರಾಬ್ಯಾಂಕಿನ ಷೇರು ಬೆಲೆ 205.25 ರು ನಂತೆ ಇದ್ದು, 282 ರು ಟಾರ್ಗೆಟ್ ದರದಂತೆ ಬ್ಯಾಂಕಿನ ಷೇರು ಖರೀದಿಸಬಹುದು ಎಂದು ಎಮ್ಕೆ ಗ್ಲೋಬಲ್ ಸಲಹೆ ನೀಡಿದೆ. 1906ರಲ್ಲಿ ಸ್ಥಾಪನೆಯಾದ ಕೆನರಾಬ್ಯಾಂಕ್ ಮಾರುಕಟ್ಟೆ ಮೌಲ್ಯ 37235.02 ಕೋಟಿ ರು ನಷ್ಟಿದೆ. 31-ಡಿಸೆಂಬರ್-2021 ರಂತೆ ಕಂಪನಿಯಲ್ಲಿ ಪ್ರವರ್ತಕರು 62.93 ಶೇಕಡಾ ಪಾಲನ್ನು ಹೊಂದಿದ್ದಾರೆ, ಆದರೆ ಎಫ್ಐಐಗಳು ಶೇಕಡಾ 7.62, ಡಿಐಐಗಳು ಶೇಕಡಾ 13.83 ರಷ್ಟು ಒಡೆತನ ಹೊಂದಿವೆ.