ಕೊರೊನಾ ಎಫೆಕ್ಟ್: ವಿದೇಶದಲ್ಲಿರುವ ಭಾರತೀಯರು ತಾಯ್ನಾಡಿಗೆ ಕಳಿಸುವ ಹಣದಲ್ಲಿ ಕಡಿತ

ಕೊರೊನಾವೈರಸ್ ವಿಶ್ವವ್ಯಾಪಿ ತನ್ನ ಪ್ರಭಾವ ಬೀರಿರುವ ಪರಿಣಾಮ ವಿದೇಶದಲ್ಲಿ ದುಡಿಯುತ್ತಿರುವ ಭಾರತೀಯರು ತಾಯ್ನಾಡಿಗೆ ರವಾನಿಸುವ ಹಣದ ಮೊತ್ತವು ಈ ವರ್ಷ 23 ಪರ್ಸೆಂಟ್‌ರಷ್ಟು ಕಡಿಮೆಯಾಗಲಿದೆ ಎಂದು ವಿಶ್ವಸಂಸ್ಥೆ ಅಂದಾಜಿಸಿದೆ.

ಅನಿವಾಸಿ ಭಾರತೀಯರಿಂದ(ಎನ್‌ಆರ್ಐ) ಹಣ ರವಾನೆ ಮಾಡುವುದು ಬಿಕ್ಕಟ್ಟಿನ ಈ ಸಮಯದಲ್ಲಿ ಕಡಿಮೆಯಾಗಬಹುದು. ಕುಟುಂಬದ ಸದಸ್ಯರು ವಿದೇಶಗಳಿಂದ ಭಾರತಕ್ಕೆ ಕಳಿಸುವ ಹಣದ ಮೊತ್ತವು ಹಿಂದಿನ ವರ್ಷ 5.81 ಲಕ್ಷ ಕೋಟಿಗಳಷ್ಟಿತ್ತು. ಆದರೆ ಈ ಬಾರಿ 23 ಪರ್ಸೆಂಟ್ ಕಡಿಮೆಯಾಗಿ 4.40 ಲಕ್ಷ ಕೋಟಿಗೆ ಇಳಿಯಲಿದೆ ಎಂದು ವಿಶ್ವಬ್ಯಾಂಕ್ ಹೇಳಿದೆ.

ಕೊರೊನಾವೈರಸ್ ಪಿಡುಗು ತಂದೊಡ್ಡಿರುವ ಬಿಕ್ಕಟ್ಟಿನಿಂದಾಗಿ ಜಾಗತಿಕ ಆರ್ಥಿಕತೆಯಲ್ಲಿ ಹಿಂಜರಿತ ಕಂಡು ಬರಲಿದೆ. ಅದರ ಫಲವಾಗಿ ಭಾರತೀಯರು ಸ್ವದೇಶಕ್ಕೆ ರವಾನಿಸುವ ಹಣದ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಲಿದೆ'.

ಭಾರತ ಅಷ್ಟೇ ಅಲ್ಲದೆ ಈ ರೀತಿಯಲ್ಲಿ ಹಣ ರವಾನಿಸುವ ಜಾಗತಿಕ ಮೊತ್ತವು 20 ಪರ್ಸೆಂಟ್‌ರಷ್ಟು ಕಡಿಮೆಯಾಗುವ ನಿರೀಕ್ಷೆ ಇದೆ. 2019ರಲ್ಲಿ ಹಣದ ರವಾನೆ ಪ್ರಮಾಣದಲ್ಲಿ 5.5 ಪರ್ಸೆಂಟ್‌ರಷ್ಟು ಹೆಚ್ಚಳ ಕಂಡು ಬಂದಿತ್ತು. ಆದರೆ ಈ ಬಾರಿ ಹಣದ ಹರಿವು ಕಡಿಮೆಯಾಗುವುದರಿಂದ ಅಭಿವೃದ್ಧಿಶೀಲ ದೇಶಗಳ ಆರ್ಥಿಕತೆ ಮೇಲೆಯೂ ವ್ಯತಿರಿಕ್ತ ಪರಿಣಾಮ ಕಂಡು ಬರಲಿದೆ ಎಂದು ವಿಶ್ವಬ್ಯಾಂಕ್ ಹೇಳಿದೆ.