ಕೊರೊನಾ ಲಾಕ್‌ಡೌನ್: ರಿಟೇಲ್ ವಲಯದಲ್ಲಿ 80,000 ಉದ್ಯೋಗ ನಷ್ಟ ಸಾಧ್ಯತೆ

ದೇಶದಲ್ಲಿ ಕೊರೊನಾವೈರಸ್‌ನಿಂದಾಗಿ ಆಗಿರುವ ಲಾಕ್‌ಡೌನ್‌ನಿಂದಾಗಿ ರಿಟೇಲ್ ವಲಯದಲ್ಲಿ 80,000 ಉದ್ಯೋಗ ನಷ್ಟವಾಗಲಿದೆ ಎಂದು ರಿಟೇಲ್ ವ್ಯಾಪಾರಿಗಳ ಸಂಘ(ಆರ್‌ಎಐ) ಹೇಳಿದೆ.

ದೇಶಾದ್ಯಂತ 768 ರಿಟೇಲ್ ವಹಿವಾಟುದಾರರ ಅಭಿಪ್ರಾಯ ಸಂಗ್ರಹಿಸಿದ್ದು, ರಿಟೇಲ್ ವ್ಯಾಪಾರಿಗಳ ಸಂಘ(ಆರ್‌ಎಐ) ಈ ಮಾಹಿತಿಯನ್ನು ನೀಡಿದೆ. ಈ ವಹಿವಾಟುದಾರರು ಭಾರತದಾದ್ಯಂತ 3,92,963 ಉದ್ಯೋಗಿಗಳನ್ನು ಹೊಂದಿದ್ದು, ಕೋವಿಡ್‌-19 ಅವರ ವ್ಯವಹಾರದ ಮೇಲೆ ಪ್ರಭಾವ ಬೀರಿದೆ ಎಂದಿದ್ದಾರೆ.

''ಸಣ್ಣ ಚಿಲ್ಲರೆ ವ್ಯಾಪಾರಿಗಳು ತಮ್ಮ 30 ಪರ್ಸೆಂಟ್‌ನಷ್ಟು ಉದ್ಯೋಗಿಗಳ ಕಡಿತಕ್ಕೆ ಮುಂದಾಗಬಹುದು ಎಂದು ನಿರೀಕ್ಷಿಸಲಾಗಿದೆ. ಈ ಸಂಖ್ಯೆ ಮಧ್ಯಮ ಗಾತ್ರದ ಚಿಲ್ಲರೆ ವ್ಯಾಪಾರಿಗಳಿಗೆ 12 ಪರ್ಸೆಂಟ್ ಮತ್ತು ದೊಡ್ಡ ಚಿಲ್ಲರೆ ವ್ಯಾಪಾರಿಗಳಿಗೆ 5 ಪರ್ಸೆಂಟ್‌ಗೆ ಇಳಿಯುತ್ತದೆ. ಒಟ್ಟಾರೆಯಾಗಿ ಸಮೀಕ್ಷೆಯಲ್ಲಿ ಭಾಗವಹಿಸಿರುವ ಎಲ್ಲಾ ಚಿಲ್ಲರೆ ವ್ಯಾಪಾರಿಗಳು ಸುಮಾರು 20 ಪರ್ಸೆಂಟ್‌ನಷ್ಟು ಉದ್ಯೋಗಿಗಳನ್ನು ವಜಾಗೊಳಿಸುವ ಯೋಜನೆಯಲ್ಲಿದ್ದಾರೆ'' ಎಂದು ಆರ್‌ಎಐ ಹೇಳಿದೆ.

ಮಾರ್ಚ್‌ 25ರಂದು ಲಾಕ್‌ಡೌನ್ ವಿಧಿಸಿದ ಬಳಿಕ 95 ಪರ್ಸೆಂಟ್‌ನಷ್ಟು ಆಹಾರಯೇತರ ರಿಟೇಲ್ ಉದ್ದಿಮೆದಾರರು ತಮ್ಮ ಮಳಿಗೆಗಳನ್ನು ಬಂದ್ ಮಾಡಿದ್ದು, ಗಳಿಕೆಯೇ ಇಲ್ಲದಂತಾಗಿದೆ. ಆರು ತಿಂಗಳಿನಲ್ಲಿ ಕಳೆದ ಆರು ವರ್ಷದ ವರಮಾನಕ್ಕಿಂತಲೂ 40 ಪರ್ಸೆಂಟ್‌ರಷ್ಟು ಕಡಿಮೆ ಇರಲಿದೆ ಎಂದು ಹೇಳಿದ್ದಾರೆ