ಈತನ ಒಂದು ಟ್ವೀಟ್ ಗೆ 6.16 ಕೋಟಿ ರುಪಾಯಿ ಸಂಪಾದನೆ; ಯಾರೀತ?
ಕ್ರೀಡಾ ಕ್ಷೇತ್ರದಲ್ಲಿ ಇದ್ದು, ಇನ್ ಸ್ಟಾಗ್ರಾಮ್ ನಲ್ಲಿ ಪೋಸ್ಟ್ ಗಳ ಮೂಲಕ ಅತಿ ಹೆಚ್ಚು ಸಂಪಾದನೆ ಮಾಡುತ್ತಿರುವವರು ಎಂಬ ಶ್ರೇಯವನ್ನು 2019ರ ಜುಲೈನಲ್ಲಿ ಕ್ರಿಸ್ಟಿಯಾನೋ ರೊನಾಲ್ಡೋ ಹೊಂದಿದ್ದರು. ಇದೀಗ ಟ್ವಿಟ್ಟರ್ ನಲ್ಲಿ ಅತಿ ಹೆಚ್ಚು ಗಳಿಸುವ ಕ್ರೀಡಾ ತಾರೆ ಎಂಬ ಕಿರೀಟ ಅವರ ಪಾಲಾಗಿದೆ ಎಂದು ಓಪನ್ ಡೋರ್ಸ್ ವರದಿ ಮಾಡಿದೆ.
ಅಥ್ಲೀಟ್ ಗಳು ತಮ್ಮ ಕಾರ್ಪೊರೇಟ್ ಪಾರ್ಟನರ್ ಗಳ ಮಾಹಿತಿಯನ್ನು ಸಾಮಾಜಿಕ ಮಾಧ್ಯಮಗಳಲ್ಲಿ ಹಾಕಲು ಈ ಸಂಸ್ಥೆಯು ನೆರವು ನೀಡುತ್ತದೆ. ಅಂದ ಹಾಗೆ ಪೋರ್ಚುಗೀಸ್ ಮೂಲದ ಕ್ರಿಸ್ಟಿಯಾನೋ ರೊನಾಲ್ಡೋ ತಮ್ಮ ಒಂದು ಟ್ವೀಟ್ ಗೆ 8,68,606 ಅಮೆರಿಕನ್ ಡಾಲರ್ ಸಂಪಾದಿಸುತ್ತಾರೆ. ಅಂದರೆ ಭಾರತೀಯ ರುಪಾಯಿಗಳಲ್ಲಿ ಹೇಳಬೇಕೆಂದರೆ, ಒಂದು ಟ್ವೀಟ್ ಗೆ 6.16 ಕೋಟಿ.
ಎರಡನೇ ಸ್ಥಾನದಲ್ಲಿ ಇರುವ ಆಂಡ್ರೆ ಇನಿಯೆಸ್ಟಾಗೆ 5,90,825 ಅಮೆರಿಕನ್ ಡಾಲರ್ ಮತ್ತು ನೇಯ್ಮರ್ ಗೆ 4,78,138 ಅಮೆರಿಕನ್ ಡಾಲರ್ ದೊರೆಯುತ್ತದೆ. ಫುಟ್ಬಾಲ್ ಹೊರತುಪಡಿಸಿದರೆ ಎನ್ ಬಿಎ ಆಟಗಾರ ಲೆಬ್ರಾನ್ ಜೇಮ್ಸ್ ಗೆ ಒಂದು ಪೋಸ್ಟ್ ಗೆ 4,70,356 ಅಮೆರಿಕನ್ ಡಾಲರ್ ಬರುತ್ತಿದೆ.
ಈ ಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿ ಇರುವವರು ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ. ಅವರ ಒಂದು ಟ್ವೀಟ್ ಗೆ 3,50,101 ಅಮೆರಿಕನ್ ಡಾಲರ್ ಸಂಪಾದಿಸುತ್ತಾರೆ. ಈ ಪಟ್ಟಿಯಲ್ಲಿ ಇರುವ ಏಕೈಕ ಮಹಿಳೆ ಸೆರೆನಾ ವಿಲಿಯಮ್ಸ್. ಅವರು ಹದಿಮೂರನೇ ಸ್ಥಾನದಲ್ಲಿ ಇದ್ದು, ಒಂದು ಪೋಸ್ಟ್ ಗೆ 1,15,926 ಅಮೆರಿಕನ್ ಡಾಲರ್ ಗಳಿಸುತ್ತಾರೆ.