ದಾಬಸ್‌ಪೇಟೆ-ಹೊಸಕೋಟೆ ಸ್ಯಾಟಲೈಟ್‌ ರಿಂಗ್‌ ರೋಡ್‌ ಮಾರ್ಗ ತೆರವು, ವಿವರ

ಬೆಂಗಳೂರು, ಫೆಬ್ರವರಿ 28: ದಾಬಸ್‌ಪೇಟೆಯಿಂದ ದೊಡ್ಡಬಳ್ಳಾಪುರ ಮಾರ್ಗವಾಗಿ ಹೊಸಕೋಟೆವರೆಗಿನ ಸ್ಯಾಟಲೈಟ್‌ ಟೌನ್‌ ರಿಂಗ್‌ ರೋಡ್‌ (ಎಸ್‌ಟಿಆರ್‌ಆರ್‌) ಮೊದಲ ಹಂತದ ಕಾಮಗಾರಿ ಮಾರ್ಚ್‌ ಮೊದಲ ವಾರದಲ್ಲಿ ಸಂಚಾರಕ್ಕೆ ಮುಕ್ತವಾಗುವ ಸಾಧ್ಯತೆ ಇದೆ.

ಇದು ಮೂರು ರಾಷ್ಟ್ರೀಯ ಹೆದ್ದಾರಿಗಳನ್ನು ಸಂಪರ್ಕಿಸುತ್ತದೆ. NH 48 (ತುಮಕೂರು ರಸ್ತೆ), NH 44 (ಬಳ್ಳಾರಿ ರಸ್ತೆ) ಮತ್ತು NH 75 (ಬೆಂಗಳೂರು-ಕೋಲಾರ ರಸ್ತೆ) ಇದೆ. ನವೆಂಬರ್‌ನಲ್ಲಿ, ಭಾರತೀಯ ರಾಷ್ಟ್ರೀಯ ಹೆದ್ದಾರಿಗಳು (NHAI) ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ನಲ್ಲೂರು ಗ್ರಾಮದಲ್ಲಿ ಟೋಲ್ ಶುಲ್ಕವನ್ನು ಸಂಗ್ರಹಿಸುವ ಮೂಲಕ ದೊಡ್ಡಬಳ್ಳಾಪುರ ಮತ್ತು ಹೊಸಕೋಟೆ ನಡುವಿನ ಎಸ್‌ಟಿಆರ್‌ಆರ್‌ ನ 34-ಕಿಮೀ ವ್ಯಾಪ್ತಿಯನ್ನು ಭಾಗಶಃ ತೆರೆಯಿತು.

ದಾಬಸ್‌ಪೇಟೆ ಮತ್ತು ದೊಡ್ಡಬಳ್ಳಾಪುರ ನಡುವಿನ ನಿರ್ಮಾಣ ಕಾಮಗಾರಿಗಳು ಮುಕ್ತಾಯದ ಹಂತದಲ್ಲಿದ್ದು, ಫೆಬ್ರವರಿ ಅಂತ್ಯದೊಳಗೆ ದಾಬಸ್‌ಪೇಟೆಯಿಂದ ಹೊಸಕೋಟೆವರೆಗಿನ 80 ಕಿಮೀ ಮಾರ್ಗವನ್ನು ಪೂರ್ಣಗೊಳಿಸುವ ಭರವಸೆಯನ್ನು NHAI ಹೊಂದಿದೆ.

500-700 ಮೀಟರ್ ರಸ್ತೆ ಕಾಮಗಾರಿ ಮಾತ್ರ ಬಾಕಿ ಇದೆ. ಎರಡು ಹಂತಗಳಲ್ಲಿ, ದೊಡ್ಡಬಳ್ಳಾಪುರ ಬಳಿ ರೈಲ್ವೆ ಮೇಲ್ಸೇತುವೆ (ಆರ್‌ಒಬಿ) ಮತ್ತು ದೊಡ್ಡಬೆಳವಂಗಲ ಬಳಿ ಅಂಡರ್‌ಪಾಸ್ ನಿರ್ಮಾಣವು ಮುಂದುವರಿದ ಹಂತದಲ್ಲಿದೆ. ಅಂಡರ್ ಪಾಸ್ ಯೋಜನೆಯು ಮೂಲ ಯೋಜನೆಯ ಭಾಗವಾಗಿರಲಿಲ್ಲ ಎಂದು ಎನ್‌ಎಚ್‌ಎಐ ಯೋಜನಾ ನಿರ್ದೇಶಕ ಕೆ.ಬಿ.ಜಯಕುಮಾರ ತಿಳಿಸಿದ್ದಾರೆ.

ಗ್ರಾಮಸ್ಥರ ಬೇಡಿಕೆಯನ್ನು ಪರಿಗಣಿಸಿ ಹೊಸ ಅಂಡರ್‌ಪಾಸ್‌ ನಿರ್ಮಿಸುತ್ತಿದ್ದೇವೆ. ಫೆಬ್ರವರಿಯೊಳಗೆ ಈ ಕಾಮಗಾರಿಗಳನ್ನು ಪೂರ್ಣಗೊಳಿಸಿ, ಮಾರ್ಚ್ ಮೊದಲ ವಾರದಲ್ಲಿ 80 ಕಿ.ಮೀ ಉದ್ದದ ಸಂಚಾರಕ್ಕೆ ಅನುವು ಮಾಡಿಕೊಡಲಾಗುವುದು ಎಂದು ಹೇಳಿದರು.

ದೊಡ್ಡಬಳ್ಳಾಪುರ ಮತ್ತು ಹೊಸಕೋಟೆ ನಡುವೆ ಭಾಗಶಃ ತೆರೆದಿರುವ ಮಾರ್ಗವನ್ನು ವಾಹನ ಸವಾರರು ನಿರೀಕ್ಷೆಯಂತೆ ಬಳಸುತ್ತಿದ್ದಾರೆ ಎಂದು ಅಧಿಕಾರಿ ಸಮರ್ಥಿಸಿಕೊಂಡಿದ್ದಾರೆ. 80 ಕಿ.ಮೀ ಮಾರ್ಗವನ್ನು ತೆರೆಯುವುದರಿಂದ ತುಮಕೂರು ರಸ್ತೆಯಿಂದ ನಗರಕ್ಕೆ ಪ್ರವೇಶಿಸುವ ಟ್ರಕ್‌ಗಳ ಸಂಖ್ಯೆ 40-50% ರಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ.

"ರಸ್ತೆ ಪ್ರಮುಖ ಹೆದ್ದಾರಿಗಳನ್ನು ಸಂಪರ್ಕಿಸುವುದರಿಂದ, ಬಳ್ಳಾರಿ ರಸ್ತೆ ಮತ್ತು ಬೆಂಗಳೂರು-ಕೋಲಾರ ರಸ್ತೆಗೆ ಹೋಗುವ ಟ್ರಕ್‌ಗಳು ನಗರ ವ್ಯಾಪ್ತಿಯನ್ನು ಪ್ರವೇಶಿಸುವುದಿಲ್ಲ. ಇದರಿಂದ ನಗರ ವ್ಯಾಪ್ತಿಯಲ್ಲಿ ಸಂಚಾರ ಸುಗಮವಾಗಲಿದೆ. ಸಂಪೂರ್ಣ ರಸ್ತೆಯನ್ನು ಬಳಸುವ ಕಾರುಗಳಿಗೆ ಟೋಲ್ ಶುಲ್ಕ 160 ರೂ. ದೋಬಸ್‌ಪೇಟೆ ಮತ್ತು ದೊಡ್ಡಬಳ್ಳಾಪುರ ನಡುವೆ ಹುಲಿಕುಂಟೆ ಬಳಿ ಟೋಲ್‌ ಪ್ಲಾಜಾ ಬರಲಿದೆ. ಹೊಸಕೋಟೆ ಬಳಿ 4 ಕಿಮೀ ಕಾಮಗಾರಿ ಮತ್ತು ಬೆಂಗಳೂರು-ಚೆನ್ನೈ ಎಕ್ಸ್‌ಪ್ರೆಸ್‌ವೇನೊಂದಿಗೆ ಎಸ್‌ಟಿಆರ್‌ಆರ್‌ನ ರೂಟ್‌ ಅನ್ನು ಮಾಡಲಾಗಿದೆ.

ಮುಂಬರುವ ಲೋಕಸಭೆ ಚುನಾವಣೆಗೆ ಮುನ್ನ ಉದ್ಘಾಟನೆಗೊಳ್ಳುವ ಪ್ರಮುಖ ರಸ್ತೆ ಮೂಲಸೌಕರ್ಯ ಯೋಜನೆಗಳಲ್ಲಿ ಇದೂ ಒಂದಾಗಿದೆ. ಕರ್ನಾಟಕ ವಿಧಾನಸಭಾ ಚುನಾವಣೆಯ ಮಾದರಿ ನೀತಿ ಸಂಹಿತೆ ಘೋಷಣೆಯ ಮೊದಲು, ಎರಡು ಪ್ರಮುಖ ಯೋಜನೆಗಳಾದ ಬೆಂಗಳೂರು-ಮೈಸೂರು ಪ್ರವೇಶ ನಿಯಂತ್ರಿತ ಹೆದ್ದಾರಿ ಮತ್ತು ನಮ್ಮ ಮೆಟ್ರೋ ಮಾರ್ಗವನ್ನು ವೈಟ್‌ಫೀಲ್ಡ್‌ವರೆಗೆ ವಿಸ್ತರಣೆ ಯೋಜನೆಯನ್ನು ಪ್ರಧಾನಿ ಮೋದಿ ಉದ್ಘಾಟಿಸಿದ್ದರು.