ಆರ್ಥಿಕ ಸಮೀಕ್ಷೆ: 2021- 22ನೇ ಹಣಕಾಸು ವರ್ಷಕ್ಕೆ 11% GDP ನಿರೀಕ್ಷೆ

ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಶುಕ್ರವಾರ ಆರ್ಥಿಕ ಸಮೀಕ್ಷೆ 2020- 21 ಮಂಡಿಸಿದ್ದು, 2021- 22ನೇ ಹಣಕಾಸು ವರ್ಷಕ್ಕೆ ದೇಶದ ವಾಸ್ತವ GDP 11 ಪರ್ಸೆಂಟ್ ಬೆಳವಣಿಗೆ ಸಾಧಿಸುವ ನಿರೀಕ್ಷೆ ಇದೆ ಎಂದು ಹೇಳಿದ್ದಾರೆ. 2020- 21ನೇ ಸಾಲಿಗೆ 7.7%ನಷ್ಟು ಆರ್ಥಿಕತೆ ಕುಗ್ಗಬಹುದು ಎಂದು ಸಮೀಕ್ಷೆಯಲ್ಲಿ ಹೇಳಲಾಗಿದೆ. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಹಾಗೂ ಅಂತರರಾಷ್ಟ್ರೀಯ ತಜ್ಞರು ಸಹ ಇದೇ ಪ್ರಮಾಣದ ಅಂದಾಜು ಮಾಡಿದ್ದರು.

ಕಳೆದ ಡಿಸೆಂಬರ್ ನಲ್ಲಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ತಿಳಿಸಿದ್ದ ಪ್ರಕಾರ, ಮಾರ್ಚ್ 31, 2021ರ ಹೊತ್ತಿಗೆ ದೇಶದ ಜಿಡಿಪಿ 7.5% ಕುಗ್ಗಲಿದೆ. "ಕೃಷಿ ವಲಯವು ಬೆಳ್ಳಿ ಗೆರೆಯಂತೆ ಉಳಿದಿದ್ದರೆ, ಕಾಂಟ್ಯಾಕ್ಟ್ ಆಧಾರಿತ ಸೇವೆಗಳು, ಉತ್ಪಾದನೆ ಮತ್ತು ನಿರ್ಮಾಣ ವಲಯಗಳಿಗೆ ಕೋವಿಡ್ 19 ಬಿಕ್ಕಟ್ಟಿನಿಂದ ಭಾರೀ ಹೊಡೆತ ಬಿದ್ದಿದೆ," ಎಂದು ಸಮೀಕ್ಷೆಯಲ್ಲಿ ತಿಳಿಸಲಾಗಿದೆ.

ಕೇಂದ್ರ ಬಜೆಟ್ ಗೆ ಇನ್ನೆರಡು ದಿನ ಬಾಕಿ ಇರುವಂತೆ ಆರ್ಥಿಕ ಸಮೀಕ್ಷೆಯನ್ನು ಮಂಡಿಸಲಾಗಿದೆ. ಇದರಲ್ಲಿ ಕೃಷಿ ಮತ್ತು ಕೈಗಾರಿಕೆ ಉತ್ಪಾದನೆ, ಉದ್ಯೋಗ, ಹಣದ ಪೂರೈಕೆ ಮತ್ತು ಇತರ ವಲಯಗಳ ಟ್ರೆಂಡ್ ವಿಶ್ಲೇಷಣೆ ಮಾಡಲಾಗುತ್ತದೆ. ಕಳೆದ ಹನ್ನೆರಡು ತಿಂಗಳಲ್ಲಿ ಭಾರತದ ಆರ್ಥಿಕತೆಯ ಪ್ರಗತಿ ಹೇಗಿದೆ ಎಂಬುದನ್ನು ಸಹ ತಿಳಿಸಿದೆ.