'ಈ ಕ್ರೀಮ್ ಹಚ್ಚಿಕೊಳ್ಳಿ ಒಂದು ವಾರದಲ್ಲಿ ಬೆಳ್ಳಗೆ ಆಗ್ತೀರಾ' ಎಂದು ಸುಳ್ಳು ಜಾಹೀರಾತು ನೀಡಿದರೆ 5 ವರ್ಷ ಜೈಲು
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು ಆಕ್ಷೇಪಾರ್ಹ ಜಾಹಿರಾತು ಕಾಯ್ದೆಯಡಿ 1954, ಕರಡು ತಿದ್ದುಪಡಿಯನ್ನು ಪ್ರಸ್ತಾಪಿಸಿದ್ದು, ಈ ಕ್ರೀಮ್ ಹಚ್ಚಿಕೊಳ್ಳಿ ಒಂದು ವಾರದಲ್ಲಿ ಬೆಳ್ಳಗೆ ಆಗಿಬಿಡ್ತೀರಾ ಎಂದು ಸುಳ್ಳು ಜಾಹೀರಾತು ನೀಡುವ ಕಂಪನಿಗಳಿಗೆ ಮೂಗುದಾರ ಹಾಕಲು ಕೇಂದ್ರ ಸರ್ಕಾರ ತೀರ್ಮಾನಿಸಿದೆ.
ಒಂದು ದಿನಕ್ಕೆ ನೂರಕ್ಕೂ ಹೆಚ್ಚು ಕಂಪೆನಿ ನಿಮ್ಮಿಂದ ಲಾಭ ಮಾಡುತ್ತಿವೆ ಗೊತ್ತೆ?
ಸೌಂದರ್ಯವರ್ಧಕ ಸಾಧನಗಳ ಜಾಹೀರಾತುಗಳು ಆಕ್ಷೇಪಾರ್ಹವಾಗಿದ್ದಲ್ಲಿ ಅವುಗಳನ್ನು ನೀಡುವ ಕಂಪನಿಯ ಮಾಲೀಕರಿಗೆ ಐದು ವರ್ಷಗಳವರೆಗೆ ಜೈಲು ಶಿಕ್ಷೆ ಮತ್ತು ಜಾಹೀರಾತುಗಳಿಗಾಗಿ ಜಾಹೀರಾತುದಾರರಿಗೆ 50 ಲಕ್ಷ ರುಪಾಯಿವರೆಗೆ ದಂಡ ವಿಧಿಸಬಹುದು ಎಂದು ತಿದ್ದುಪಡಿಯಲ್ಲಿ ಪ್ರಸ್ತಾಪಿಸಲಾಗಿದೆ.
ಇದಕ್ಕಾಗಿ, 1954ರ ಔಷಧ ಮತ್ತು ಮಾಂತ್ರಿಕ ಪರಿಹಾರ ಸಾಧನಗಳು ಕಾಯ್ದೆ ಅಡಿಯಲ್ಲಿನ ಆಕ್ಷೇಪಾರ್ಹ ಜಾಹೀರಾತುಗಳ ನಿಯಮಗಳಿಗೆ ತಿದ್ದುಪಡಿ ನಿರ್ಧರಿಸಲಾಗಿದೆ. ಸೌಂದರ್ಯ ವರ್ಧಕ ಸಾಧಕಗಳಿಗಷ್ಟೇ ಅಲ್ಲದೆ, ಲೈಂಗಿಕ ಸಾಮರ್ಥ್ಯ ಹೆಚ್ಚಿಸುವ ಔಷಧಗಳು, ತೊದಲು ಮಾತು ನಿವಾರಿಸುವ ಔಷಧ, ಬಂಜೆತನ ನಿವಾರಣೆ, ಅಕಾಲಿಕ ಮುಪ್ಪು, ಬಾಲ ನೆರೆ ಸಹಿತ ಸುಮಾರು 78 ಸಮಸ್ಯೆಗಳನ್ನು ಪಟ್ಟಿ ಮಾಡಲಾಗಿದ್ದು, ಯಾವುದೇ ಕಂಪೆನಿಯು ಇವುಗಳ ನಿವಾರಣೆಯ ಬಗ್ಗೆ ಸುಳ್ಳು ಜಾಹೀರಾತು ನೀಡಿದರೆ ಅವು ಸಹ ಹೊಸ ಕಾನೂನು ವ್ಯಾಪ್ತಿಗೆ ಒಳಪಡಲಿವೆ.
ಸದ್ಯ ಈ ಕಾಯಿದೆಯಡಿ, ಮೊದಲ ಅಪರಾಧಕ್ಕೆ ಆರು ತಿಂಗಳವರೆಗೆ ಜೈಲು ಶಿಕ್ಷೆ ಅಥವಾ ದಂಡ ಅಥವಾ ಎರಡನ್ನೂ ವಿಧಿಸಲಾಗುತ್ತದೆ ಮತ್ತು ನಂತರದ ಅಪರಾಧಕ್ಕೆ ಒಂದು ವರ್ಷ ಅಥವಾ ದಂಡ ಅಥವಾ ಎರಡಕ್ಕೂ ಕಾರಣವಾಗಬಹುದು. ಆದರೆ ಈಗ ತಿದ್ದುಪಡಿಯು ದಂಡವನ್ನು ಹೆಚ್ಚಿಸಲು ಪ್ರಸ್ತಾಪಿಸಿದೆ. ಮೊದಲ ಅಪರಾಧಕ್ಕಾಗಿ, ಉದ್ದೇಶಿತ ಶಿಕ್ಷೆಯು ಎರಡು ವರ್ಷಗಳವರೆಗೆ ಜೈಲು ಶಿಕ್ಷೆ ಮತ್ತು 10 ಲಕ್ಷ ರುಪಾಯಿ. ನಂತರದ ಅಪರಾಧಕ್ಕಾಗಿ, ಜೈಲು ಶಿಕ್ಷೆಯನ್ನು ಐದು ವರ್ಷಗಳವರೆಗೆ, ದಂಡವನ್ನು 50 ಲಕ್ಷ ರುಪಾಯಿಗಳವರೆಗೆ ವಿಧಿಸಬಹುದು.