2020ರ ಏಪ್ರಿಲ್ ನಿಂದ ನವೆಂಬರ್ ನಲ್ಲಿ ವಿದೇಶಿ ನೇರ ಹೂಡಿಕೆ 22% ಹೆಚ್ಚಳ

2020ರ ಏಪ್ರಿಲ್ ನಿಂದ ನವೆಂಬರ್ ನಲ್ಲಿ ವಿದೇಶಿ ನೇರ ಹೂಡಿಕೆ (ಪುನರ್ ಹೂಡಿಕೆ ಗಳಿಕೆ ಸೇರಿ) 22% ಹೆಚ್ಚಳವಾಗಿ, 58.37 ಬಿಲಿಯನ್ ಯುಎಸ್ ಡಿ ಮುಟ್ಟಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ $ 47.67 ಬಿಲಿಯನ್ ಇತ್ತು ಎಂಬ ಅಂಶವನ್ನು ವಾಣಿಜ್ಯ ಹಾಗೂ ಕೈಗಾರಿಕೆ ಸಚಿವಾಲಯದ ದತ್ತಾಂಶದಿಂದ ತಿಳಿದುಬಂದಿದೆ.

"ವಿದೇಶಿ ನೇರ ಹೂಡಿಕೆ (ಎಫ್ ಡಿಐ) ಆರ್ಥಿಕ ಬೆಳವಣಿಗೆಗೆ ಬಹಳ ಮುಖ್ಯ. ಭಾರತದ ಆರ್ಥಿಕ ಅಭಿವೃದ್ಧಿಗೆ ಸಾಲಯೇತರ ಮುಖ್ಯ ಹಣಕಾಸು ಮೂಲ. ಹೂಡಿಕೆ ಸ್ನೇಹಿ ಎಫ್ ಡಿಐ ನೀತಿ ನಿರೂಪಿಸಿರುವ ಸರ್ಕಾರದ ಯಶಸ್ಸು ಇದು. ಈ ಎಲ್ಲದರ ಉದ್ದೇಶ ಏನೆಂದರೆ, ಎಫ್ ಡಿಐ ನಿಯಮಾವಳಿಗಳನ್ನು ಹೂಡಿಕೆಸ್ನೇಹಿ ಮಾಡುವುದು ಮತ್ತು ದೇಶದೊಳಗೆ ಬಂಡವಾಳ ಹರಿದುಬರಲು ಇರುವ ಅಡೆತಡೆ ನಿವಾರಿಸುವುದು. ಈ ನಿಟ್ಟಿನಲ್ಲಿ ಇಟ್ಟ ಹೆಜ್ಜೆಗಳು ಫಲ ನೀಡಿವೆ. ಈ ತನಕ ದೇಶದಲ್ಲಿ ಕಂಡರಿಯದ ಮಟ್ಟಕ್ಕೆ ವಿದೇಶೀ ಬಂಡವಾಳ ಹರಿದು ಬರಲು ಕಾರಣವಾಗಿದೆ," ಎಂದು ಸಚಿವಾಲಯದ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಹಣಕಾಸು ವರ್ಷ 2020- 21ರಲ್ಲಿ (ಏಪ್ರಿಲ್ ನಿಂದ ನವೆಂಬರ್ 2020) $ 43.85 ಬಿಲಿಯನ್ ಬಂದಿದೆ. ಆರ್ಥಿಕ ವರ್ಷದಲ್ಲಿ ಮೊದಲ ಎಂಟು ತಿಂಗಳಲ್ಲಿ ಗರಿಷ್ಠ ಮಟ್ಟದ್ದಾಗಿದೆ. 2019- 20ರ ಮೊದಲ ಎಂಟು ತಿಂಗಳಿನ $ 32.11 ಬಿಲಿಯನ್ ಗೆ ಹೋಲಿಸಿದರೆ 37% ಹೆಚ್ಚಳವಾಗಿದೆ.

"ಎಫ್ ಡಿಐ ನೀತಿ ಸುಧಾರಣೆ ವಿಚಾರದಲ್ಲಿ ಸರ್ಕಾರ ತೆಗೆದುಕೊಳ್ಳುತ್ತಿರುವ ಕ್ರಮಗಳು, ಹೂಡಿಕೆ ವ್ಯವಸ್ಥೆ ಅನುಕೂಲ ಮತ್ತು ಉದ್ಯಮ ಸಲೀಸಾಗಿ ನಡೆಸಲು ವ್ಯವಸ್ಥೆ ಮಾಡಿರುವುದರಿಂದ ದೇಶದಲ್ಲಿ ಎಫ್ ಡಿಐ ಹರಿವು ಹೆಚ್ಚಳವಾಗಿದೆ," ಎಂದು ತಿಳಿಸಲಾಗಿದೆ.