ಪೆಟ್ರೋಲ್- ಡೀಸೆಲ್ ಅಬಕಾರಿ ಸುಂಕ ಹಾಕಿದ ಪಿಎಂ 'ಅತಿಜಾಣ' ಎಂದ ರಾಹುಲ್

ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಪ್ರಧಾನಿ ಮೋದಿ ಅವರನ್ನು 'ಅತಿ ಜಾಣ' ಎಂದು ಕರೆದಿದ್ದಾರೆ. ಜಾಗತಿಕ ಮಟ್ಟದಲ್ಲಿ ತೈಲ ಬೆಲೆ ಕುಸಿದಿದೆ. ಅದರ ಅನುಕೂಲವನ್ನು ಗ್ರಾಹಕರಿಗೆ ವರ್ಗಾಯಿಸಿ ಎಂದು ನಾವು ಕೇಳಿದರೆ, ನಮ್ಮ 'ಅತಿ ಜಾಣ' ಪ್ರಧಾನಿಗಳು ತೈಲದ ಮೇಲಿನ ಸುಂಕವನ್ನು ಹೆಚ್ಚಿಸಿದ್ದಾರೆ ಎಂದು ಭಾನುವಾರ ವ್ಯಂಗ್ಯವಾಡಿದ್ದಾರೆ.

ಪೆಟ್ರೋಲ್ ಹಾಗೂ ಡೀಸೆಲ್ ಮೇಲೆ ಅಬಕಾರಿ ಸುಂಕವನ್ನು ತಲಾ 3 ರುಪಾಯಿ ಏರಿಸುವ ಮೂಲಕ 39 ಸಾವಿರ ಕೋಟಿ ರುಪಾಯಿ ಆದಾಯ ಹೆಚ್ಚಿಸಿಕೊಳ್ಳಲು ಕೇಂದ್ರ ಸರ್ಕಾರ ಮುಂದಾಗಿದೆ. ಈ ಘೋಷಣೆ ಮಾಡಿದ ಮರುದಿನವೇ ರಾಹುಲ್ ಗಾಂಧಿ ಈ ರೀತಿ ಗೇಲಿ ಮಾಡುತ್ತಾ ಟ್ವೀಟ್ ಮಾಡಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ತೈಲ ಬೆಲೆ ಇಳಿಕೆ ಆಗಿದೆಯಲ್ಲಾ, ಅದರ ಅನುಕೂಲ ಜನರಿಗೆ ವರ್ಗಾಯಿಸುತ್ತೀರಾ ಎಂಬ ಪ್ರಶ್ನೆಗೆ ಪತ್ರಿಕಾಗೋಷ್ಠಿಯಲ್ಲಿ ಉತ್ತರಿಸದೆ ಎದ್ದುಹೋದ ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರ ವಿಡಿಯೋ ಕೂಡ ರಾಹುಲ್ ಗಾಂಧಿ ಟ್ಯಾಗ್ ಮಾಡಿದ್ದಾರೆ.

ಭಾರತದ ಪ್ರಧಾನಿಗಳೇ, ಚುನಾಯಿತ ಸರ್ಕಾರವನ್ನು (ಮಧ್ಯಪ್ರದೇಶದ ಕಾಂಗ್ರೆಸ್ ನೇತೃತ್ವದ ಸರ್ಕಾರ) ಅಸ್ಥಿರಗೊಳಿಸುವುದರಲ್ಲಿ ಬಿಡುವಿಲ್ಲದಂತೆ ತೊಡಗಿಕೊಂಡಿರುವ ನಿಮಗೆ ಜಾಗತಿಕ ಮಟ್ಟದಲ್ಲಿ ತೈಲ ಬೆಲೆ 35 ಪರ್ಸೆಂಟ್ ಕುಸಿದಿರುವುದು ಗಮನಕ್ಕೆ ಬಾರದಿರಬಹುದು ಎಂದು ಕಳೆದ ಬುಧವಾರವಷ್ಟೇ ರಾಹುಲ್ ಗಾಂಧಿ ಕಾಲೆಳೆದಿದ್ದರು.

ಪೆಟ್ರೋಲ್ ದರವನ್ನು ಲೀಟರ್ ಗೆ 60 ರುಪಾಯಿಗಿಂತ ಕೆಳಗೆ ಇಳಿಸುತ್ತೀರಾ? ಆ ಮೂಲಕ ಅನುಕೂಲವನ್ನು ಜನರಿಗೆ ವರ್ಗಾಯಿಸುತ್ತೀರಾ? ಇದರಿಂದ ಆರ್ಥಿಕತೆಗೂ ಚೈತನ್ಯ ಸಿಕ್ಕಂತಾಗುತ್ತದೆ ಎಂದು ಟ್ವೀಟ್ ಮಾಡಿದ್ದರು ರಾಹುಲ್.