ಏಪ್ರಿಲ್ ನಿಂದ ಅಕ್ಟೋಬರ್ ಮಧ್ಯೆ ಭಾರತದ ಚಿನ್ನ ಆಮದು 47% ಇಳಿಕೆ

ಕೊರೊನಾ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಈ ವರ್ಷದ ಏಪ್ರಿಲ್ ನಿಂದ ಅಕ್ಟೋಬರ್ ಮಧ್ಯೆ ಚಿನ್ನದ ಆಮದು 47.2% ಇಳಿಕೆ ಆಗಿದ್ದು, 928 ಕೋಟಿ ಅಮೆರಿಕನ್ ಡಾಲರ್ ಗೆ ತಲುಪಿದೆ. ವಾಣಿಜ್ಯ ಸಚಿವಾಲಯದ ದತ್ತಾಂಶದ ಪ್ರಕಾರ, 2019- 20ನೇ ಸಾಲಿನ ಇದೇ ಅವಧಿಯಲ್ಲಿ ಚಿನ್ನದ ಆಮದು 1764 ಕೋಟಿ ಅಮೆರಿಕನ್ ಡಾಲರ್ ಇತ್ತು.

ಆದರೂ ಅಕ್ಟೋಬರ್ ತಿಂಗಳಲ್ಲಿ ಆಮದು ಪ್ರಮಾಣ 36% ಬೆಳವಣಿಗೆ ದಾಖಲಿಸಿದೆ. ಬೆಳ್ಳಿ ಆಮದು ಕೂಡ ಈ ಅವಧಿಯಲ್ಲಿ 64.65 ಪರ್ಸೆಂಟ್ ಇಳಿಕೆ ಕಂಡು, 742 ಮಿಲಿಯನ್ ತಲುಪಿದೆ. ಚಿನ್ನ ಹಾಗೂ ಬೆಳ್ಳಿ ಆಮದಿನಲ್ಲಿ ಕಡಿಮೆ ಆಗಿರುವುದರಿಂದ ದೇಶದ ವಾಣಿಜ್ಯ ಕೊರತೆ ಕಡಿಮೆ ಆಗಲು ಕಾರಣ ಆಗಿದೆ.

ಆಮದು ಹಾಗೂ ಕೊರತೆ ಮಧ್ಯದ ವ್ಯತ್ಯಾಸ 2020- 21ರ ಏಪ್ರಿಲ್ - ಅಕ್ಟೋಬರ್ ಮಧ್ಯೆ 3216 ಕೋಟಿ ಅಮೆರಿಕನ್ ಡಾಲರ್ ಇದ್ದರೆ, ಕಳೆದ ವರ್ಷ ಇದೇ ಅವಧಿಯಲ್ಲಿ 10,067 ಕೋಟಿ ಅಮೆರಿಕನ್ ಡಾಲರ್ ಇತ್ತು.

ವಿಶ್ವದಲ್ಲೇ ಅತಿ ಹೆಚ್ಚು ಚಿನ್ನವನ್ನು ಆಮದು ಮಾಡಿಕೊಳ್ಳುವ ದೇಶ ಭಾರತ. ಆಭರಣ ವಲಯದ ಬೇಡಿಕೆಯನ್ನೇ ಪ್ರಮುಖವಾಗಿ ಪೂರೈಸುತ್ತದೆ. ವಾರ್ಷಿಕವಾಗಿ ಎಂಟು ನೂರರಿಂದ ಒಂಬೈನೂರು ಟನ್ ಚಿನ್ನವನ್ನು ಭಾರತಕ್ಕೆ ಆಮದು ಮಾಡಿಕೊಳ್ಳಲಾಗುತ್ತದೆ. ರತ್ನಗಳು ಮತ್ತು ಆಭರಣಗಳ ರಫ್ತು ಈ ವರ್ಷದ ಏಪ್ರಿಲ್ ನಿಂದ ಅಕ್ಟೋಬರ್ ಮಧ್ಯೆ 49.5 ಪರ್ಸೆಂಟ್ ಕುಸಿದು, 1161 ಕೋಟಿ ಅಮೆರಿಕನ್ ಡಾಲರ್ ತಲುಪಿದೆ.