ಹೊಸ ದಾಖಲೆ ಬರೆದ ಚಿನ್ನದ ದರ; ಹತ್ತು ಗ್ರಾಮ್ ಗೆ 48,333 ರುಪಾಯಿ

ಚಿನ್ನದ ದರವು ಬುಧವಾರ ಗರಿಷ್ಠ ಮಟ್ಟ ಮುಟ್ಟುವ ಮೂಲಕ ಹೊಸ ದಾಖಲೆ ಬರೆದಿದೆ. ಬೆಳಗ್ಗೆ ಪ್ರತಿ ಹತ್ತು ಗ್ರಾಮ್ ಗೆ 48,333 ರುಪಾಯಿಗೆ ವಹಿವಾಟು ನಡೆಸಿತು. ಮಾರ್ಚ್ ನಲ್ಲಿ 10 ಗ್ರಾಮ್ ಚಿನ್ನದ ಬೆಲೆ 38,500 ರುಪಾಯಿ ಇದ್ದಿದ್ದು, 25 ಪರ್ಸೆಂಟ್ ಏರಿಕೆ ದಾಖಲಿಸಿದೆ. ಆಗಸ್ಟ್ ತಿಂಗಳ ಚಿನ್ನದ ಫ್ಯೂಚರ್ ವಹಿವಾಟು 10 ಗ್ರಾಮ್ ಗೆ 48,264 ರುಪಾಯಿ ಇದೆ.

ಇನ್ನು ಎಂಸಿಎಕ್ಸ್ ನಲ್ಲಿ ಜುಲೈ ತಿಂಗಳ ಬೆಳ್ಳಿ ಫ್ಯೂಚರ್ಸ್ ಒಂದು ಕೇಜಿಗೆ 48,770 ರುಪಾಯಿ ಇದೆ. ಯು.ಎಸ್.ನಲ್ಲಿ ಕೊರೊನಾ ಪ್ರಕರಣಗಳಲ್ಲಿ ಹೆಚ್ಚಳವಾಗಿರುವುದರಿಂದ ಹೂಡಿಕೆದಾರರು ಚಿನ್ನದ ಮೇಲೆ ಹಣ ಹಾಕಲು ಆಸಕ್ತಿ ತೋರಿಸಿದ್ದಾರೆ. ಯು.ಎಸ್.- ಚೀನಾ ಮಧ್ಯೆ ಮತ್ತೆ ತಲೆದೋರಿರುವ ವ್ಯಾಪಾರ ಬಿಕ್ಕಟ್ಟು ಹಾಗೂ ದುರ್ಬಲವಾಗಿರುವ ಡಾಲರ್ ಕಾರಣಕ್ಕೆ ಚಿನ್ನ ಬೆಂಬಲ ಪಡೆಯುತ್ತಿದೆ ಎನ್ನುತ್ತಾರೆ ತಜ್ಞರು.

ಚಿನ್ನದ ಬೆಲೆ 48,600ರಿಂದ 48,800 ರುಪಾಯಿ ತನಕ ಏರಬಹುದು ಎಂಬುದು ವಿಶ್ಲೇಷಕರ ಅಭಿಮತ. ಈ ಹಿಂದೆ ಚಿನ್ನವು ಹತ್ತು ಗ್ರಾಮ್ ಗೆ ದಾಖಲಿಸಿದ್ದ ಹತ್ತು ಗ್ರಾಮ್ ಗೆ 48,299 ರುಪಾಯಿ ಬೆಲೆಯನ್ನೂ ಈ ದಿನ ದಾಟಿತು. ಜಾಗತಿಕ ಮಟ್ಟದಲ್ಲೂ ಚಿನ್ನದ ಬೆಲೆಯಲ್ಲಿ ಏರಿಕೆ ಆಗಿದೆ.