ಸಾರ್ವಕಾಲಿಕ ಎತ್ತರಕ್ಕೆ ಏರಿದ ಚಿನ್ನ, ಎಂಟು ವರ್ಷದ ಗರಿಷ್ಠ ಮಟ್ಟಕ್ಕೆ ಬೆಳ್ಳಿ

ಚಿನ್ನದ ಬೆಲೆಯು ಮಂಗಳವಾರ ಬೆಳಗ್ಗೆ (ಜುಲೈ 28, 2020) ಮತ್ತೊಂದು ಹೊಸ ದಾಖಲೆ ಬರೆದಿದೆ. ಜಾಗತಿಕ ಮಾರುಕಟ್ಟೆ ಬೆಲೆಯನ್ನು ಅನುಸರಿಸಿ, 10 ಗ್ರಾಮ್ ಗೆ 52,435 ರುಪಾಯಿ ತಲುಪಿತು. ಜಾಗತಿಕ ಮಟ್ಟದಲ್ಲಿ ಸಾರ್ವಜನಿಕ ದಾಖಲೆಯಾದ ಔನ್ಸ್ ಗೆ $ 1981.10 ತಲುಪಿತು. ಇನ್ನು ಬೆಳ್ಳಿ ಕೂಡ ಕೇಜಿಗೆ 67.560 ರುಪಾಯಿ ತಲುಪುವ ಮೂಲಕ ಎಂಟು ವರ್ಷಗಳ ಗರಿಷ್ಠ ಮಟ್ಟದ ದಾಖಲೆ ಬರೆಯಿತು.

ತಜ್ಞರು ಹೇಳುವ ಪ್ರಕಾರ, ಚಿನ್ನ ಮತ್ತು ಬೆಳ್ಳಿ ದರದ ಏರಿಕೆ ಮುಂದುವರಿಯಬಹುದು. ಅಮೆರಿಕ ಹಾಗೂ ಚೀನಾ ಮಧ್ಯದ ಉದ್ವಿಗ್ನತೆ ಹಾಗೂ ಡಾಲರ್ ಮೌಲ್ಯದ ದೌರ್ಬಲ್ಯದ ಕಾರಣಕ್ಕೆ ಚಿನ್ನಕ್ಕೆ ಬೇಡಿಕೆ ಹೆಚ್ಚಾಗಿದೆ. ಎಲ್ಲ ಪ್ರಮುಖ ಕರೆನ್ಸಿಗಳ ವಿರುದ್ಧವೂ ಡಾಲರ್ ಮೌಲ್ಯ ದುರ್ಬಲವಾಗಿದೆ.

MCX ಆಗಸ್ಟ್ ಚಿನ್ನದ ಫ್ಯೂಚರ್ಸ್ 200 ರುಪಾಯಿ ಏರಿಕೆಯಾಗಿ, 10 ಗ್ರಾಮ್ ಗೆ 52,300 ರುಪಾಯಿ ತಲುಪಿತು. ಇನ್ನು ಬೆಳ್ಳಿಯ ಸೆಪ್ಟೆಂಬರ್ ಫ್ಯೂಚರ್ಸ್ 976 ರುಪಾಯಿ ಏರಿಕೆಯಾಗಿ, ಕೇಜಿಗೆ 66,504 ರುಪಾಯಿ ತಲುಪಿತು. ಮಾರ್ಚ್ ನಲ್ಲಿನ ಕನಿಷ್ಠ ಮಟ್ಟದಿಂದ ಚಿನ್ನದ ದರವು 36% ಏರಿಕೆ ಕಂಡಿದೆ. ತಜ್ಞರು ಅಭಿಪ್ರಾಯ ಪಡುವ ಪ್ರಕಾರ, ಶೀಘ್ರದಲ್ಲೇ ಚಿನ್ನದ ಬೆಲೆ ಹತ್ತು ಗ್ರಾಮ್ ಗೆ 53 ಸಾವಿರ ರುಪಾಯಿ ಮತ್ತು ಬೆಳ್ಳಿ ಕೇಜಿಗೆ 70 ಸಾವಿರ ಆಗಬಹುದು.