ಮೊದಲ ಬಾರಿಗೆ ಜಿಎಸ್ ಟಿ ಸಮಿತಿ ಸಭೆಯಲ್ಲಿ ಮತದಾನ: ಲಾಟರಿಗೆ ಏಕರೂಪ ದರ

ಜಿಎಸ್ ಟಿ ಸಮಿತಿಯ 38ನೇ ಸಭೆಯು ಬುಧವಾರ ನಡೆಯುತ್ತಿದ್ದು, ಲಾಟರಿ ಟಿಕೆಟ್ ಗೆ ಏಕರೂಪದ ದರ ವಿಧಿಸುವ ವಿಚಾರವಾಗಿ ಇದೇ ಮೊದಲ ಬಾರಿಗೆ ಮತದಾನ ನಡೆಯಿತು. ಎಲ್ಲ ರಾಜ್ಯದಿಂದಲೂ ಒಂದೇ ಅಭಿಪ್ರಾಯ ಬಂದಿತು. ಈ ಬಗ್ಗೆ ರಾಜಸ್ಥಾನದ ಸಚಿವರಾದ ಶಾಂತಿ ಧರೀವಾಲ್ ಮಾಹಿತಿ ನೀಡಿದ್ದಾಗಿ ಐಎಎನ್ ಎಸ್ ವರದಿ ಮಾಡಿದೆ. ಏಕರೂಪದ ದರವು ಮಾರ್ಚ್ 1, 2020ರಿಂದ ಜಾರಿಗೆ ಬರಲಿದೆ ಎಂದು ವರದಿಗಳು ತಿಳಿಸಿವೆ.

38ನೇ ಸಭೆಯ ಅಧ್ಯಕ್ಷತೆಯನ್ನು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ವಹಿಸಿದ್ದು, ನವದೆಹಲಿಯಲ್ಲಿ ಬುಧವಾರ ಸಂಜೆಯು ಸಭೆ ನಡೆಯುತ್ತಿದೆ. ಸದ್ಯಕ್ಕೆ ರಾಜ್ಯ ಸರ್ಕಾರಗಳಿಂದ ನಡೆಯುವ ಲಾಟರಿ ಟಿಕೆಟ್ ಗಳಿಗೆ 12 ಪರ್ಸೆಂಟ್ ಜಿಎಸ್ ಟಿ ವಿಧಿಸಲಾಗುತ್ತಿದೆ. ಇದೇ ಲಾಟರಿ ಟಿಕೆಟ್ ಗಳನ್ನು ಅಧಿಕೃತ ಮಾರಾಟಗಾರರ ಮೂಲಕ ಇತರ ರಾಜ್ಯಗಳಲ್ಲಿ ಮಾರಲು 28% ದರ ವಿಧಿಸಲಾಗುತ್ತಿದೆ.

ಜಿಎಸ್ ಟಿ ಸಂಗ್ರಹದಲ್ಲಿ ಇಳಿಕೆ ಆಗುತ್ತಿರುವುದರಿಂದ ದರದಲ್ಲಿ ಏರಿಕೆ ಮಾಡಬಹುದು ಎಂಬ ವದಂತಿಯನ್ನು ಸಚಿವೆ ನಿರ್ಮಲಾ ಸೀತಾರಾಮನ್ ತಳ್ಳಿಹಾಕಿದ್ದಾರೆ. ಸದ್ಯದ ಸ್ಥಿತಿಯಲ್ಲಿ ಜಿಎಸ್ ಟಿ ದರ ಏರಿಕೆ ಮಾಡುವ ನಿರ್ಧಾರದ ಪರವಾಗಿ ಯಾವ ರಾಜ್ಯ ಸರ್ಕಾರವೂ ಇಲ್ಲ ಎಂದು ಮೂಲಗಳು ತಿಳಿಸಿವೆ.