ದೇಶದ ಪ್ರಮುಖ ನಗರಗಳಲ್ಲಿ ಮನೆ ಮಾರಾಟದಲ್ಲಿ ಕುಸಿತ: ಬೆಂಗಳೂರಿನಲ್ಲಿ 50 ಪರ್ಸೆಂಟ್ ಇಳಿಕೆ

ದೇಶದಲ್ಲಿರುವ ಆರ್ಥಿಕತೆ ಮಂದಗತಿಯಿಂದಾಗಿ 2019-20ರ ಹಣಕಾಸು ವರ್ಷದ ಮೂರನೇ ತ್ರೈಮಾಸಿಕದಲ್ಲಿ ಮನೆಗಳ ಮಾರಾಟದಲ್ಲಿ ತೀವ್ರ ಕುಸಿತ ದಾಖಲಾಗಿದೆ. ದೇಶದ ಪ್ರಮುಖ ನಗರಗಳಲ್ಲಿ ಮನೆ ಮಾರಾಟ ಇಳಿಕೆ ಕಂಡಿದ್ದು, ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ 50 ಪರ್ಸೆಂಟ್ ಕುಸಿತವಾಗಿದೆ.

ಅಕ್ಟೋಬರ್‌ನಿಂದ ಡಿಸೆಂಬರ್ 2019ರ ಅವಧಿಯಲ್ಲಿ ದೇಶದ ಪ್ರಮುಖ 9 ನಗರಗಳಲ್ಲಿ 64 ಸಾವಿರ ಮನೆಗಳು ಮಾರಾಟವಾಗಿವೆ ಎಂದು ಪ್ರಾಪ್ ಟೈಗರ್ಸ್ ವರದಿ ಮಾಡಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 91,464 ಮನೆಗಳು ಮಾರಾಟವಾಗಿದ್ದವು, ಇದಕ್ಕೆ ಹೋಲಿಸಿದರೆ 30 ಪರ್ಸೆಂಟ್‌ಗೂ ಅಧಿಕ ಕುಸಿತಗೊಂಡಿದೆ ಎಂದು ವರದಿಯಲ್ಲಿ ಕಂಡುಬಂದಿದೆ.

2019ರ ಮೊದಲ 9 ತಿಂಗಳಲ್ಲಿ ಮನೆಗಳ ಮಾರಾಟವು 13 ಪರ್ಸೆಂಟ್ ಕುಸಿತ ಕಂಡಿತ್ತು. ಆದರೆ ಅಕ್ಟೋಬರ್-ಡಿಸೆಂಬರ್ ಅವಧಿಯಲ್ಲಿ ಇದರ ಪ್ರಮಾಣವು 30 ಪರ್ಸೆಂಟ್‌ ದಾಖಲಾಗಿದೆ. ಅದರಲ್ಲೂ ಬೆಂಗಳೂರಿನಲ್ಲಿ ಮನೆಗಳ ಮಾರಾಟ 50 ಪರ್ಸೆಂಟ್ ಇಳಿಕೆಯಾಗಿದೆ ಎಂದು ವರದಿಯಲ್ಲಿ ತಿಳಿಸಿದೆ. ಈ ಅವಧಿಯಲ್ಲಿ ಕೇವಲ 5,155 ಮನೆಗಳು ಮಾತ್ರ ಮಾರಾಟವಾಗಿವೆ.

ಬೆಂಗಳೂರಿನ ನಂತರದ ಸ್ಥಾನದಲ್ಲಿ ಹೈದ್ರಾಬಾದ್ 44 ಪರ್ಸೆಂಟ್, ಪುಣೆ 39, ನೊಯ್ಡಾ 38, ಚೆನ್ನೈ ಮತ್ತು ಕೊಲ್ಕತ್ತಾ 33, ದೆಹಲಿ 6, ಮುಂಬೈ 18 ಪರ್ಸೆಂಟ್‌ ನಷ್ಟು ಮನೆ ಮಾರಾಟದಲ್ಲಿ ಕುಸಿತವಾಗಿದೆ.