ಲಾಕ್ ಡೌನ್ ನಿಂದ 7,27,500 ಕೋಟಿಗೂ ಹೆಚ್ಚು ನಷ್ಟದ ಅಂದಾಜು

ಕೊರೊನಾ ಹರಡದಂತೆ ತಡೆಯುವುದಕ್ಕೆ ದೇಶದಾದ್ಯಂತ ಸರ್ಕಾರ ಲಾಕ್ ಡೌನ್ ಘೋಷಣೆ ಮಾಡಿದೆ. ಈ ಲಾಕ್ ಡೌನ್ ನಿಂದ ಆಗುವ ಆರ್ಥಿಕ ಪರಿಣಾಮ ಏನು ಗೊತ್ತೆ? ಭಾರತದ ಆರ್ಥಿಕತೆ $ 4.64 ಬಿಲಿಯನ್ ನಷ್ಟ ಅನುಭವಿಸಲಿದೆ ಎನ್ನಲಾಗುತ್ತಿದೆ. ಅಕ್ಯುಟ್ ರೇಟಿಂಗ್ಸ್ ಅಂಡ್ ರೀಸರ್ಚ್ ಈ ಬಗ್ಗೆ ತನ್ನ ವರದಿಯಲ್ಲಿ ತಿಳಿಸಿದೆ.

ಪ್ರತಿ ದಿನದ ನಷ್ಟವನ್ನು ಜಿಡಿಪಿ ನಷ್ಟಕ್ಕೆ ಲೆಕ್ಕ ಹಾಕಿ ಹೇಳುವುದಾದರೆ 21 ದಿನದ ಲಾಕ್ ಡೌನ್ ಅವಧಿಯಲ್ಲಿ $ 98 ಬಿಲಿಯನ್ ನಷ್ಟ ಆಗುವ ಅಂದಾಜು ಮಾಡಲಾಗಿದೆ. 7,27,500 ಕೋಟಿ ರುಪಾಯಿಗೂ ಹೆಚ್ಚು ನಷ್ಟ ಆಗಲಿದೆ ಎಂದು ವರದಿಯಲ್ಲಿ ದಾಖಲಿಸಲಾಗಿದೆ.

"FY21 ಮೊದಲ ತ್ರೈಮಾಸಿಕದ ನಿಜವಾದ ಜಿಡಿಪಿಯ ಅಂದಾಜನ್ನು ಮಾಡುವುದಕ್ಕೆ ಹಲವು ಪದ್ಧತಿ ಅನುಸರಿಸಿದ್ದೇವೆ. ಕೊರೊನಾ ಮುಂಚಿನ ಅವಧಿಗಿಂತ ಬೆಳವಣಿಗೆ ದರವು 5-6 ಪರ್ಸೆಂಟ್ ಕಡಿಮೆ ಆಗಬಹುದು" ಎಂದು ರೇಟಿಂಗ್ ಏಜೆನ್ಸಿ ಸಿಇಒ ತಿಳಿಸಿದ್ದಾರೆ.

ಕೊರೊನಾದಿಂದ ಟ್ರಾನ್ಸ್ ಪೋರ್ಟ್, ಹೋಟೆಲ್ ಮತ್ತು ರೆಸ್ಟೋರೆಂಟ್ ಗಳು, ರಿಯಲ್ ಎಸ್ಟೇಟ್ ಚಟುವಟಿಕೆಗಳ ಮೇಲೆ ತೀವ್ರ ತರವಾದ ಪರಿಣಾಮ ಆಗಲಿದೆ. ಈ ವಲಯಗಳಲ್ಲಿ GVA (ಗ್ರಾಸ್ ವ್ಯಾಲ್ಯೂ ಆಡೆಡ್) 50% ನಷ್ಟ ಆಗುವ ಅಂದಾಜಿದೆ. ಇದರ ಪರಿಣಾಮವಾಗಿ FY21 ಮೊದಲ ತ್ರೈಮಾಸಿಕದ ಒಟ್ಟಾರೆ GVAನಲ್ಲಿ 22% ನಷ್ಟ ಆಗಬಹುದು ಎಂದು ಅಂದಾಜಿಸಲಾಗಿದೆ.

ಕೊರೊನಾ ಅವಧಿಯಲ್ಲಿ ಸಂವಹನ, ಪ್ರಸಾರ ಹಾಗೂ ಹೆಲ್ತ್ ಕೇರ್ ನಲ್ಲಿ ವಿಸ್ತರಣೆ ಆಗಿದೆ. ಒಟ್ಟಾರೆ GVAಯಲ್ಲಿ ಈ ವಲಯಗಳ ಕೊಡುಗೆ 3.5% ಇದೆ. ಇನ್ನು ಕೃಷಿ ಚಟುವಟಿಕೆಯಲ್ಲಿ ದೊಡ್ಡ ವ್ಯತ್ಯಾಸ ಆಗದಿದ್ದರೂ ಕೃಷಿ ಮೇಲೆ ಅವಲಂಬಿತವಾದ ಇತರ ಚಟುವಟಿಕೆಗಳ ಮೇಲೆ ಪರಿಣಾಮ ಆಗಲಿದೆ.

ಕೊರೊನಾದ ಆರ್ಥಿಕ ಹೊಡೆತದಿಂದ ಚೇತರಿಸಿಕೊಳ್ಳಲು ಕನಿಷ್ಠ ಎರಡು- ಮೂರು ತಿಂಗಳು ಬೇಕಾಗಬಹುದು ಎಂದು ಅಭಿಪ್ರಾಯ ಪಡಲಾಗಿದೆ.