ಒಂದೆರಡು ಸಿನಿಮಾ ನೋಡುವ ಟೈಮಲ್ಲಿ ಆತನ ಆಸ್ತಿ 30 ಸಾವಿರ ಕೋಟಿ 'ಜೂಮ್'

ಆತನ ಹೆಸರು ಎರಿಕ್ ಯುವಾನ್. ಜೂಮ್ ವಿಡಿಯೋ ಕಮ್ಯೂನಿಕೇಷನ್ ಸಿಇಒ. ಕೆಲವೇ ಗಂಟೆಗಳಲ್ಲಿ ಆತನ ಆಸ್ತಿ 420 ಕೋಟಿ ಅಮೆರಿಕನ್ ಡಾಲರ್ ಹೆಚ್ಚಾಗಿದೆ. ಈ ಕಂಪೆನಿಯ ತ್ರೈಮಾಸಿಕ ಫಲಿತಾಂಶ ಆಹಾ ಓಹೋ ಎಂಬಷ್ಟು ಚೆನ್ನಾಗಿ ಬಂದಿದ್ದರಿಂದ ಅಮೆರಿಕ ಷೇರು ಮಾರ್ಕೆಟ್ ನಲ್ಲಿ ಕಂಪೆನಿ ಷೇರಿನ ಬೆಲೆ 26% ಏರಿಕೆಯಾಗಿ, ಒಂದು ಷೇರಿಗೆ $ 410ಕ್ಕೆ ತಲುಪಿತು.

ಮಂಗಳವಾರ ಕೂಡ ಇಂಥದ್ದೇ ಏರಿಕೆ ಕಂಡಲ್ಲಿ ಆತನ ಆಸ್ತಿ ಮೌಲ್ಯ 2000 ಕೋಟಿ ಅಮೆರಿಕನ್ ಡಾಲರ್ ದಾಟುತ್ತದೆ. ಟೆಕ್ನಾಲಜಿ ಕಂಪೆನಿಗಳ ಷೇರು ಮೌಲ್ಯದಲ್ಲಿ ಭರ್ಜರಿ ಏರಿಕೆಯಾಗಿ, ಬಹಳ ಮಂದಿಯ ಸಂಪತ್ತು ಭರ್ಜರಿ ಏರಿಕೆ ಕಂಡಿತು. ಅಮೆಜಾನ್ ಕಂಪೆನಿಯ ಸ್ಥಾಪಕ ಜೆಫ್ ಬೆಜೋಸ್ ಜುಲೈನಲ್ಲಿ ಒಂದೇ ದಿನ 1300 ಕೋಟಿ ಅಮೆರಿಕನ್ ಡಾಲರ್ ಹೆಚ್ಚಾಗಿತ್ತು. ಕಳೆದ ತಿಂಗಳು ಕೇವಲ ಇಪ್ಪತ್ನಾಲ್ಕು ಗಂಟೆಯಲ್ಲಿ ಮಸ್ಕ್ ಆಸ್ತಿ 800 ಕೋಟಿ ಅಮೆರಿಕನ್ ಡಾಲರ್ ಹೆಚ್ಚಾಗಿತ್ತು.

ಇದರಿಂದಾಗಿ ಜೆಫ್ ಬೆಜೋಸ್ ಆಸ್ತಿ 200 ಬಿಲಿಯನ್ ಅಮೆರಿಕನ್ ಡಾಲರ್ ಹಾಗೂ ಎಲಾನ್ ಮಸ್ಕ್ ಆಸ್ತಿ 100 ಬಿಲಿಯನ್ ಡಾಲರ್ ದಾಟಿತು. ಅಂದ ಹಾಗೆ ಕೊರೊನಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಬಹಳ ದೊಡ್ಡ ಮಟ್ಟದಲ್ಲಿ ಲಾಭ ಪಡೆದಿದ್ದು ಜೂಮ್ ಕಂಪೆನಿ. ದೂರದಿಂದ ಶಿಕ್ಷಣ, ಉದ್ಯೋಗ ಮತ್ತಿತರ ಉದ್ದೇಶಗಳಿಗೆ ಜೂಮ್ ಬಳಕೆ ಸಿಕ್ಕಾಪಟ್ಟೆ ಹೆಚ್ಚಾಯಿತು.