ಟಾಟಾ ಸ್ಟೀಲ್‌ನಿಂದ ದೇಶಕ್ಕಾಗಿ 200 ವಂದೇ ಭಾರತ್‌ ರೈಲುಗಳ ನಿರ್ಮಾಣ?

ಭಾರತೀಯ ರೈಲ್ವೆಯೊಂದಿಗೆ ಮಾಡಿಕೊಂಡಿರುವ ಹೊಸ ಒಪ್ಪಂದದ ಪ್ರಕಾರ ಟಾಟಾ ಸ್ಟೀಲ್‌ 200 ವಂದೇ ಭಾರತ್‌ ರೈಲುಗಳನ್ನು ನಿರ್ಮಾಣ ಮಾಡುವ ಸಾಧ್ಯತೆಯಿದೆ. ಸಹಿ ಮಾಡಲಾಗಿರುವ ಒಪ್ಪಂದದ ಪ್ರಕಾರ, ಒಂದು ವರ್ಷದೊಳಗೆ ದೇಶದ ಅತ್ಯಂತ ವೇಗದ ಹಾಗೂ ಅತ್ಯಾಧುನಿಕ ವೈಶಿಷ್ಟ್ಯಗಳನ್ನು ಹೊಂದಿರುವ ವಂದೇ ಭಾರತ್‌ನ 22 ರೈಲುಗಳನ್ನು ಟಾಟಾ ಸ್ಟೀಲ್‌ ನಿರ್ಮಿಸಲಿದೆ.

ವಂದೇ ಭಾರತ್‌ ಎಕ್ಸ್‌ಪ್ರೆಸ್‌ನ ಫಸ್ಟ್‌ ಎಸಿಯಿಂದ ಹಿಡಿದು ತ್ರಿ-ಟಯರ್‌ ಕೋಚ್‌ವರೆಗಿನ ಆಸನಗಳನ್ನು ಟಾಟಾ ಸ್ಟೀಲ್‌ ನಿರ್ಮಾಣ ಮಾಡಲಿದೆ. ರೈಲಿನ ಲಿಂಕಿ ಹೋಫ್‌ಮನ್‌ ಬುಷ್‌(ಎಲ್‌ಎಚ್‌ಬಿ) ಕೋಚ್‌ಗಳ ನಿರ್ಮಾಣದ ಗುತ್ತಿಗೆ ಕೂಡ ಈ ಕಂಪೆನಿಗೆ ನೀಡಲಾಗಿದ್ದು, ಅದರಡಿಯಲ್ಲಿ ಫಲಕಗಳು, ವಿಂಡೋಸ್‌ ಹಾಗೂ ರೈಲಿನ ರಚನೆಗಳನ್ನು ಸಿದ್ಧಪಡಿಸಲಾಗುತ್ತದೆ.

ಈ ಯೋಜನೆಯಡಿ ಭಾರತೀಯ ರೈಲ್ವೆಯು ಪ್ರಸ್ತುತ ರೈಲಿನ ಭಾಗಗಳನ್ನು ತಯಾರಿಸಲು ಬಹುರಾಷ್ಟ್ರೀಯ ಸ್ಟೀಲ್‌ ಕಂಪೆನಿಗೆ 145 ಕೋಟಿ ರೂ.ಗಳ ಟೆಂಡರ್ ನೀಡಿದ್ದು, ಅದು ಒಂದು ವರ್ಷದೊಳಗೆ ನಿರ್ಮಾಣ ಕಾರ್ಯವನ್ನು ಪೂರ್ಣಗೊಳಿಸಬೇಕು.

ಟಾಟಾ ಸ್ಟೀಲ್‌ನ ಸಂಯುಕ್ತ ವಿಭಾಗವು ವಂದೇ ಭಾರತ್‌ನ ಸೀಟ್‌ಗಳ ನಿರ್ಮಾಣದ ಬಲ್ಕ್‌ ಆರ್ಡರ್‌ ಪಡೆದ ಬಳಿಕ ಈ ದಿಕ್ಕಿನಲ್ಲಿ ಕೆಲಸ-ಕಾರ್ಯಗಳನ್ನು ಪ್ರಾರಂಭಿಸಿದೆ. ಅದರಲ್ಲಿ ತಲಾ 16 ಕೋಚ್‌ಗಳನ್ನು ಹೊಂದಿರುವ 22 ರೈಲು ಸೆಟ್‌ಗಳು ಕೂಡ ಸೇರಿವೆ.

ಟಾಟಾ ಸ್ಟೀಲ್‌ನ ಉಪಾಧ್ಯಕ್ಷ(ತಂತ್ರಜ್ಞಾನ ಮತ್ತು ಹೊಸ ಸಾಮಗ್ರಿಗಳ ವ್ಯವಹಾರ) ದೇಬಶಿಶ್‌ ಭಟ್ಟಾಚಾರ್ಯ ಹೇಳುವ ಪ್ರಕಾರ "ಈ ರೈಲಿನ ಸೀಟುಗಳನ್ನು ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿದ್ದು, ಇದು 180-ಡಿಗ್ರಿವರೆಗೆ ತಿರುಗಬಲ್ಲದು. ಜತೆಗೆ ವಿಮಾನದಲ್ಲಿರುವ ರೀತಿಯ ಪ್ರಯಾಣಿಕ ಸೌಲಭ್ಯಗಳನ್ನು ಹೊಂದಿರುತ್ತದೆ. ಇದು ಭಾರತದಲ್ಲೇ ಮೊದಲು" ಎಂದು ಅವರು ತಿಳಿಸಿದ್ದಾರೆ.