ಯು.ಎಸ್. ಡಾಲರ್ ವಿರುದ್ಧ ಭಾರತದ ರುಪಾಯಿ 74.03ಕ್ಕೆ ಕುಸಿತ
ಭಾರತದ ರುಪಾಯಿ ಮೌಲ್ಯವು ಅಮೆರಿಕದ ಡಾಲರ್ ವಿರುದ್ಧ ಕುಸಿತ ಸೋಮವಾರವೂ ಮುಂದುವರಿಸಿದೆ. ಡಾಲರ್ ವಿರುದ್ಧ ರುಪಾಯಿ ಮೌಲ್ಯ 16 ಪೈಸೆ ಇಳಿಕೆಯಾಗಿ ರು. 74.03ರಲ್ಲಿ ವಹಿವಾಟು ನಡೆಸಿತು. ಕೊರೊನಾ ವೈರಾಣು ವ್ಯಾಪಿಸುತ್ತಿರುವ ಹಿನ್ನೆಲೆಯಲ್ಲಿ ಆರ್ಥಿಕ ಹಿಂಜರಿತದ ಭೀತಿ ಎದುರಾಗಿದ್ದು, ದೇಶೀಯ ಈಕ್ವಿಟಿ ಮಾರುಕಟ್ಟೆಯಲ್ಲಿ ಭಾರೀ ತಲ್ಲಣ ಉಂಟು ಮಾಡಿದೆ.
ದೇಶೀಯ ಈಕ್ವಿಟಿ ಮಾರ್ಕೆಟ್ ದುರ್ಬಲಗೊಂಡಿರುವುದು, ವಿದೇಶಿ ಬಂಡವಾಳದ ಹೊರಹರಿವು ಸೇರಿ ರುಪಾಯಿ ಮೌಲ್ಯವು ಕುಸಿಯುವಂತೆ ಮಾಡಿದೆ. ಅಮೆರಿಕ ಡಾಲರ್ ವಿರುದ್ಧ ರುಪಾಯಿ ಮೌಲ್ಯ ಕುಸಿದಿದ್ದರೂ ತೈಲ ಬೆಲೆಯಲ್ಲಿನ ಇಳಿಕೆ ರುಪಾಯಿಗೆ ಬೆಂಬಲ ನೀಡಿದೆ. ಆದರೆ ಟ್ರೇಡರ್ ಗಳು ಪ್ರಮುಖ ಆರ್ಥಿಕತೆಗಳಲ್ಲಿ ಆರ್ಥಿಕ ಕುಸಿತ ಆಗಬಹುದು ಎಂಬ ಅಳುಕು ವ್ಯಕ್ತಪಡಿಸುತ್ತಿದ್ದಾರೆ. ಇದರಿಂದ ರುಪಾಯಿಗೆ ಹೊಡೆತ ಬಿದ್ದಿದೆ.
ಸೋಮವಾರ ದಿನದ ವಹಿವಾಟನ್ನು 73.99ರೊಂದಿಗೆ ರುಪಾಯಿ ಆರಂಭಿಸಿತು. ಆ ನಂತರ 16 ಪೈಸೆಯಷ್ಟು ಕುಸಿದು, 74.03ರಲ್ಲಿ ಕೊನೆಯದಾಗಿ ವಹಿವಾಟು ನಡೆಸಿತು. ಶುಕ್ರವಾರದಂದು ಯು.ಎಸ್. ಡಾಲರ್ ವಿರುದ್ಧ ರುಪಾಯಿ 73.87 ದಿನಾಂತ್ಯಕ್ಕೆ ವ್ಯವಹಾರ ಮುಗಿಸಿತ್ತು.