ಮೊದಲ ಬಾರಿಗೆ ಅರ್ಧ ಲಕ್ಷ ಕೋಟಿ ದಾಟಿದ ಭಾರತದ ವಿದೇಶಿ ವಿನಿಮಯ ಸಂಗ್ರಹ

ಇದೇ ಮೊದಲ ಬಾರಿಗೆ ಭಾರತದ ವಿದೇಶಿ ವಿನಿಮಯ ಸಂಗ್ರಹವು ಅರ್ಧ ಲಕ್ಷ ಕೋಟಿಯ ಗಡಿ ದಾಟಿದೆ. ಜೂನ್ 5ಕ್ಕೆ 8.22 ಬಿಲಿಯನ್ ಅಮೆರಿಕನ್ ಡಾಲರ್ ಏರಿಕೆ ಕಂಡಿದೆ ಎಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಬಿಡುಗಡೆ ಮಾಡಿದ ವರದಿಯಲ್ಲಿ ತಿಳಿಸಲಾಗಿದೆ. ವಿದೇಶಿ ವಿನಿಮಯ ಸಂಗ್ರಹವು $ 501.70 ಬಿಲಿಯನ್ ಗೆ ಏರಿಕೆ ಆಗಿದೆ.

ಮೇ 29ಕ್ಕೆ ಕೊನೆಯಾದ ವಾರದಲ್ಲಿ 3.44 ಬಿಲಿಯನ್ ಹೆಚ್ಚಳವಾಗಿ, 493.48 ಬಿಲಿಯನ್ ಡಾಲರ್ ಗೆ ಏರಿಕೆಯಾಗಿತ್ತು. ಸದ್ಯಕ್ಕೆ ಭಾರತದ ಬಳಿ ಇರುವ ವಿದೇಶಿ ವಿನಿಮಯ ಸಂಗ್ರಹದ ಲೆಕ್ಕವನ್ನು ಅಮೆರಿಕನ್ ಡಾಲರ್ ಮೌಲ್ಯದಲ್ಲೇ ತಿಳಿಸಲಾಗಿದ್ದರೂ ಇದರಲ್ಲಿ ಯುರೋ, ಪೌಂಡ್, ಯೆನ್ ಸೇರಿದಂತೆ ಇತರ ವಿದೇಶಿ ಕರೆನ್ಸಿಗಳು ಒಳಗೊಂಡಿವೆ.

ಚಿನ್ನದ ಸಂಗ್ರಹವು $ 329 ಮಿಲಿಯನ್ ಇಳಿಕೆಯಾಗಿ, 32.352 ಬಿಲಿಯನ್ ಮುಟ್ಟಿದೆ. ಈ ವರದಿ ಬಿಡುಗಡೆಯಾದ ವಾರದಲ್ಲಿ ಅಂತರರಾಷ್ಟ್ರೀಯ ಹಣಕಾಸು ಸಂಸ್ಥೆಯ ಬಳಿ ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್ $ 10 ಮಿಲಿಯನ್ ಏರಿಕೆಯಾಗಿದ್ದು, 1.44 ಬಿಲಿಯನ್ ಅನ್ನು ಮುಟ್ಟಿದೆ.

ಐಎಂಎಫ್ ಬಳಿ ಇರುವ ಭಾರತದ ಮೀಸಲು ಕೂಡ $ 120 ಮಿಲಿಯನ್ ಏರಿಕೆಯಾಗಿ, 4.28 ಬಿಲಿಯನ್ ಅನ್ನು ತಲುಪಿದೆ.