ಲಾಕ್ ಡೌನ್ ಅವಧಿಯಲ್ಲಿ ಅಬಕಾರಿ ಇಲಾಖೆಗೆ 2050 ಕೋಟಿ ರುಪಾಯಿ ನಷ್ಟ

ಕರ್ನಾಟಕದಲ್ಲಿ ಕೊರೊನಾ ಲಾಕ್ ಡೌನ್ ಕಾರಣಕ್ಕೆ ಮಾರ್ಚ್ 24ನೇ ತಾರೀಕಿನಿಂದ ಮದ್ಯ ಮಾರಾಟ ಮಳಿಗೆಗಳು ಮುಚ್ಚಿವೆ. ಮತ್ತು ಮೇ 3ನೇ ತಾರೀಕಿನ ತನಕ ತೆರೆಯುವ ಸಾಧ್ಯತೆ ಕೂಡ ಇಲ್ಲ. ಈ ಅವಧಿಯಲ್ಲಿ ಕರ್ನಾಟಕ ಅಬಕಾರಿ ಇಲಾಖೆಗೆ 2050 ಕೋಟಿ ರುಪಾಯಿ ನಷ್ಟವಾಗಿದೆ.

"ನಮಗೆ ದಿನಕ್ಕೆ 50 ಕೋಟಿ ರುಪಾಯಿ ನಷ್ಟ. ಲಾಕ್ ಡೌನ್ ಜಾರಿಯಾದ ಮಾರ್ಚ್ 24ನೇ ತಾರೀಕಿನಿಂದ ಮದ್ಯ ಮಾರಾಟ ಮಳಿಗೆಗಳು ಮುಚ್ಚಿವೆ. ಮತ್ತು ಮೇ 3ನೇ ತಾರೀಕಿನ ತನಕವಾದರೂ ಮುಚ್ಚಿರುತ್ತದೆ. ಅಂದಾಜು 41 ದಿನಗಳಿಗೆ 2050 ಕೋಟಿ ರುಪಾಯಿ ನಷ್ಟವಾಗಿದೆ" ಎಂದು ಅಬಕಾರಿ ಇಲಾಖೆಯ ಹಿರಿಯ ಅಧಿಕಾರಿ ಬುಧವಾರ ಪಿಟಿಐ ಸುದ್ದಿ ಸಂಸ್ಥೆಗೆ ಮಾಹಿತಿ ನೀಡಿದ್ದಾರೆ.

ಮೇ 3ನೇ ತಾರೀಕಿನ ನಂತರವಾದರೂ ಮದ್ಯ ಮಾರಾಟ ಮಳಿಗೆಗಳು ಆರಂಭವಾಗಬಹುದಾ ಎಂಬ ಬಗ್ಗೆ ಈಗಲೂ ಅನುಮಾನ ಇದೆ. ಮತ್ತೆ ಮಳಿಗೆಗಳು ಶುರುವಾಗಬೇಕಾ ಅನ್ನೋ ಬಗ್ಗೆ ಸರ್ಕಾರ ನಿರ್ಧಾರ ಕೈಗೊಳ್ಳಬೇಕು ಎಂದು ಅವರು ತಿಳಿಸಿದ್ದಾರೆ.

ಈ ಹಿಂದಿನ ಅವಧಿಯಲ್ಲಿ ಅಬಕಾರಿ ಇಲಾಖೆಗೆ ಬಂದಿರುವ ಆದಾಯದ ಬಗ್ಗೆ ವೆಬ್ ಸೈಟ್ ನಲ್ಲಿ ಮಾಹಿತಿ ಇದೆ. 2017-18ರ ಏಪ್ರಿಲ್ ನಲ್ಲಿ 997.55 ಕೋಟಿ ಆದಾಯ ಬಂದಿತ್ತು ಎಂಬುದನ್ನು ಬಿಟ್ಟರೆ ಇತ್ತೀಚಿನ ನಾಲ್ಕೈದು ವರ್ಷದಲ್ಲಿ ಮಾರ್ಚ್- ಏಪ್ರಿಲ್ ತಿಂಗಳಲ್ಲಿ 1000 ಕೋಟಿ ರುಪಾಯಿಗೂ ಹೆಚ್ಚಿನ ಆದಾಯ ಬಂದಿದೆ.