LPG ಅಡುಗೆ ಅನಿಲ್ ಸಿಲಿಂಡರ್ ಬೆಲೆಯಲ್ಲಿ ಭರ್ಜರಿ ಇಳಿಕೆ; ಎಷ್ಟು ಗೊತ್ತಾ?

ತಿಂಗಳ ಪರಿಷ್ಕರಣೆಯಲ್ಲಿ ಸಬ್ಸಿಡಿರಹಿತ 14.2 ಕೇಜಿ ಎಲ್ ಪಿಜಿ (ಲಿಕ್ವಿಡ್ ಪೆಟ್ರೋಲಿಯಂ ಗ್ಯಾಸ್) ಬೆಲೆಯಲ್ಲಿ ಭಾನುವಾರ ಸರಾಸರಿ 54 ರುಪಾಯಿ ಇಳಿಕೆಯಾಗಿದೆ. ಆರು ತಿಂಗಳು ನಿರಂತರವಾಗಿ ಬೆಲೆಯನ್ನು ಏರಿಕೆ ಮಾಡುತ್ತಾ ಬಂದಿದ್ದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (ಐಒಸಿ) ಮೊದಲ ಬಾರಿಗೆ ದರ ತಗ್ಗಿಸಿದೆ.

ಮಾರ್ಚ್ 1, 2020ರಿಂದ ಅನ್ವಯ ಆಗುವಂತೆ ಪ್ರಮುಖ ನಗರಗಳಲ್ಲಿನ ಎಲ್ ಪಿಜಿ ಸಿಲಿಂಡರ್ ಗಳ ದರದ ಮಾಹಿತಿ ಇಂತಿದೆ.

ದೆಹಲಿ 805.50 ರುಪಾಯಿ

ಕೋಲ್ಕತ್ತಾ 839.50 ರುಪಾಯಿ

ಮುಂಬೈ 776.50 ರುಪಾಯಿ

ಚೆನ್ನೈ 826 ರುಪಾಯಿ

ಕಳೆದ ತಿಂಗಳು ಪ್ರಮುಖ ನಗರಗಳಲ್ಲಿ ಅಡುಗೆ ಅನಿಲದ ಬೆಲೆಯು ರು. 144.50ರಿಂದ ರು. 149ರ ತನಕ ಏರಿಕೆ ಆಗಿತ್ತು. 2014ರ ಜನವರಿ ನಂತರ ಏರಿಕೆಯಾದ ಅತಿ ದೊಡ್ಡ ಮೊತ್ತ ಅದಾಗಿತ್ತು. ಆದರೆ ಈ ಸಿಲಿಂಡರ್ ಗಳ ಮೇಲಿನ ಸಬ್ಸಿಡಿ ಸಹ ಅದಕ್ಕೆ ತಕ್ಕಂತೆ ಏರಿಕೆ ಮಾಡಲಾಗಿತ್ತು.

ಅಂತರರಾಷ್ಟ್ರೀಯ ಮಟ್ಟದಲ್ಲಿನ ಕಚ್ಚಾ ತೈಲದ ಬೆಲೆ ಮತ್ತು ರುಪಾಯಿ ವಿನಿಮಯದ ದರವನ್ನು ಆಧಾರವಾಗಿ ಇಟ್ಟುಕೊಂಡು ಸರ್ಕಾರಿ ಸ್ವಾಮ್ಯದ ತೈಲ ಕಂಪೆನಿಗಳು ಬೆಲೆ ನಿರ್ಧರಿಸುತ್ತವೆ. ಭಾರತದಲ್ಲಿ ಒಂದು ಕುಟುಂಬಕ್ಕೆ ವರ್ಷಕ್ಕೆ 12 ಸಿಲಿಂಡರ್ ಸಬ್ಸಿಡಿ ದರದಲ್ಲಿ ದೊರೆಯುತ್ತವೆ. ಆ ನಂತರ ಪೂರ್ತಿ ದರವನ್ನು ಪಾವತಿಸಬೇಕಾಗುತ್ತದೆ. ಅಂದಹಾಗೆ ಸಬ್ಸಿಡಿ ಮೊತ್ತವನ್ನು ಗ್ರಾಹಕರ ಬ್ಯಾಂಕ್ ಖಾತೆಗೆ ವರ್ಗಾವಣೆ ಮಾಡಲಾಗುತ್ತದೆ.