ಸರ್ಕಾರಕ್ಕೆ ತೆರಿಗೆ ಆದಾಯ ತರುವ ಮಹತ್ವದ ಮಸೂದೆ ಲೋಕಸಭೆಯಲ್ಲಿ ಪಾಸ್

ಲೋಕಸಭೆಯಲ್ಲಿ ಬುಧವಾರ ನೇರ ತೆರಿಗೆ ವಿವಾದ್ ಸೇ ವಿಶ್ವಾಸ್ ಮಸೂದೆ- 2020ಕ್ಕೆ ಒಪ್ಪಿಗೆ ಸಿಕ್ಕಿದೆ. ನೇರ ತೆರಿಗೆಗೆ ಸಂಬಂಧಿಸಿದ 4,83,000 ವ್ಯಾಜ್ಯಗಳನ್ನು ಬಗೆಹರಿಸಿಕೊಳ್ಳಲು ಅನುಕೂಲ ಆಗುತ್ತದೆ ಮತ್ತು ವಿಚಾರಣೆಯಿಂದ ಕೂಡ ರಕ್ಷಣೆ ದೊರೆಯುತ್ತದೆ. ದೆಹಲಿ ಹಿಂಸಾಚಾರ ವಿಚಾರವಾಗಿ ವಿರೋಧ ಪಕ್ಷಗಳು ಎಬ್ಬಿಸಿದ ಗಲಾಟೆ ಮಧ್ಯೆಯೇ ಮಸೂದೆಗೆ ಒಪ್ಪಿಗೆ ಸಿಕ್ಕಿದೆ.

ನೇರ ತೆರಿಗೆ ಮೊತ್ತ 9.32 ಲಕ್ಷ ಕೋಟಿ ರುಪಾಯಿ ವ್ಯಾಜ್ಯ ಬಾಕಿ ಉಳಿದಿದೆ. ಈ ಮಸೂದೆಯನ್ನು ಕಳೆದ ತಿಂಗಳು ಸಂಸತ್ ನಲ್ಲಿ ಮಂಡಿಸಲಾಗಿತ್ತು. ಒಂದು ವೇಳೆ ಈ ಯೋಜನೆಯು ಯಶಸ್ವಿಯಾದಲ್ಲಿ ಸರ್ಕಾರದ ಬೊಕ್ಕಸಕ್ಕೆ ಆದಾಯ ಬರುತ್ತದೆ. ಕೋರ್ಟ್- ನ್ಯಾಯ ಮಂಡಳಿಯಲ್ಲಿ ವಿಳಂಬ ಆಗುತ್ತಿರುವ ನೇರ ತೆರಿಗೆ ವ್ಯಾಜ್ಯಗಳನ್ನು ಕೂಡ ಇದರಲ್ಲಿ ಬಗೆ ಹರಿಸಿಕೊಳ್ಳಬಹುದು.

ಈ ಸ್ಕೀಂ ಅಡಿಯಲ್ಲಿ ಫಲಾನುಭವಿಗಳಿಗೆ ಬಾಕಿ ಇರುವ ತೆರಿಗೆ ಮೊತ್ತವನ್ನು ಬಡ್ಡಿ ಹಾಗೂ ದಂಡ ಇಲ್ಲದೆ ಪಾವತಿಸುವುದಕ್ಕೆ ಅವಕಾಶ ಇದೆ. ಆದರೆ ಅದನ್ನು ಮಾರ್ಚ್ 31ಕ್ಕೆ ಮುಂಚಿತವಾಗಿ ಪಾವತಿಸಬೇಕು. 2021ರ ಆರ್ಥಿಕ ವರ್ಷದ ಮೊದಲ ತ್ರೈ ಮಾಸಿಕದಲ್ಲಿ ಪಾವತಿ ಮಾಡಿದರೆ ಮೊತ್ತವು 10 ಪರ್ಸೆಂಟ್ ಹೆಚ್ಚಾಗುತ್ತದೆ.

ಒಂದು ವೇಳೆ ತೆರಿಗೆ ವ್ಯಾಜ್ಯವು ದಂಡ, ಬಡ್ಡಿ ಅಥವಾ ಶುಲ್ಕಕ್ಕಿಂತ ಹೆಚ್ಚಾಗಿದ್ದಲ್ಲಿ ಮಾರ್ಚ್ ಅಂತ್ಯದೊಳಗೆ ಪಾವತಿಸಿದರೆ 25% ತೀರುವಳಿಯಾಗಿ ಆಗುತ್ತದೆ. ಒಂದು ವೇಳೆ ಮುಂದಿನ ತ್ರೈ ಮಾಸಿಕದಲ್ಲಿ ಪಾವತಿಸಿದರೆ ಆ ಮೊತ್ತ 30%ಗೆ ಏರಿಕೆ ಆಗುತ್ತದೆ.