ಮಹೀಂದ್ರಾ ಅಂಡ್ ಮಹೀಂದ್ರಾದಿಂದ ಜನವರಿ 1ರಿಂದ ಟ್ರ್ಯಾಕ್ಟರ್ ಬೆಲೆ ಏರಿಕೆ
ಮಹೀಂದ್ರಾ ಅಂಡ್ ಮಹೀಂದ್ರಾ (M&M) ಸೋಮವಾರ ತಿಳಿಸಿರುವ ಪ್ರಕಾರ, ಮುಂದಿನ ತಿಂಗಳು- ಜನವರಿಯಿಂದ ಟ್ರ್ಯಾಕ್ಟರ್ ಗಳ ಬೆಲೆಯಲ್ಲಿ ಏರಿಕೆ ಮಾಡುವುದಕ್ಕೆ ನಿರ್ಧರಿಸಲಾಗಿದೆ. ಇನ್ ಪುಟ್ ವೆಚ್ಚದಲ್ಲಿ ಏರಿಕೆ ಆಗಿರುವುದನ್ನು ಭಾಗಶಃ ಸರಿಪಡಿಸುವುದಕ್ಕೆ ಈ ಕ್ರಮಕ್ಕೆ ಮುಂದಾಗಲಾಗಿದೆ ಎಂದು ತಿಳಿಸಲಾಗಿದೆ.
ರೆಗ್ಯುಲೇಟರಿ ಫೈಲಿಂಗ್ ನಲ್ಲಿ ಈ ಬಗ್ಗೆ ಮಾಹಿತಿ ನೀಡಲಾಗಿದೆ. ಮಹೀಂದ್ರಾ ಅಂಡ್ ಮಹೀಂದ್ರಾದ ಕೃಷಿ ಸಲಕರಣೆಗಳ ವಲಯದಿಂದ ತಿಳಿಸಿ, ಜನವರಿ 1, 2021ರಿಂದ ಎಲ್ಲ ಮಾಡೆಲ್ ಗಳ ಹಾಗೂ ವಿವಿಧ ಬೆಲೆಯ ಟ್ರ್ಯಾಕ್ಟರ್ ಗಳ ದರದಲ್ಲಿ ಏರಿಕೆ ಮಾಡಲಾಗುವುದು ಎಂದು ಹೇಳಿಕೆ ನೀಡಲಾಗಿದೆ.
ಮಹೀಂದ್ರಾ ಅಂಡ್ ಮಹೀಂದ್ರಾ ವಾಹನಗಳ ಬೆಲೆ ಏರಿಕೆ; ಷೇರಿನ ದರ ಹೆಚ್ಚಳ
ವಸ್ತುಗಳ ಬೆಲೆ ಏರಿಕೆ ಹಾಗೂ ಇತರ ಇನ್ ಪುಟ್ ವೆಚ್ಚದಲ್ಲಿನ ಏರಿಕೆ ಕಾರಣಕ್ಕೆ ಟ್ರ್ಯಾಕ್ಟರ್ ಗಳ ಬೆಲೆ ಏರಿಕೆ ಮಾಡಬೇಕಾಗಿದೆ. ಮುಂಬರುವ ದಿನಗಳಲ್ಲಿ ವಿವಿಧ ಮಾಡೆಲ್ ಗಳ ಬೆಲೆ ಏರಿಕೆ ಕುರಿತು ಮಾಹಿತಿಯನ್ನು ನೀಡಲಾಗುತ್ತದೆ ಎಂದು ಮಹೀಂದ್ರಾ ಅಂಡ್ ಮಹೀಂದ್ರಾ ತಿಳಿಸಿದೆ.
ಮಹೀಂದ್ರಾದ ಎಲ್ಲ ಪ್ರಯಾಣಿಕರ ವಾಹನ ಹಾಗೂ ವಾಣಿಜ್ಯ ವಾಹನಗಳ ಬೆಲೆಯಲ್ಲಿ ಜನವರಿ 1ರಿಂದ ಬೆಲೆ ಏರಿಕೆ ಮಾಡುವುದಾಗಿ ಕಳೆದ ವಾರವಷ್ಟೇ ಘೋಷಣೆ ಮಾಡಲಾಗಿತ್ತು.