100 ಕೋಟಿಗೆ ಕೋಲ್ಕತ್ತಾದಲ್ಲಿ ಬಂಗಲೆ ಖರೀದಿಸಿದ ಸ್ಟಾಕ್ ಬ್ರೋಕರ್

"ಎಲ್ರೀ, ರಿಯಲ್ ಎಸ್ಟೇಟ್ ಪಾತಾಳಕ್ಕೆ ತಲುಪಿಹೋಗಿದೆ?" ಎಂಬ ಮಾತನ್ನೇ ಪದೇ ಪದೇ ಕೇಳಿಸಿಕೊಳ್ಳುತ್ತಿದ್ದರೆ ಈ ಸುದ್ದಿ ನಿಮಗೆ ಖಂಡಿತಾ ಅಚ್ಚರಿಯನ್ನು ತರುತ್ತದೆ. ಕೋಲ್ಕತ್ತದ ಸ್ಟಾಕ್ ಬ್ರೋಕರ್ ವೊಬ್ಬರು ಜಡ್ಜಸ್ ಕೋರ್ಟ್ ರಸ್ತೆಯಲ್ಲಿ 100 ಕೋಟಿ ರುಪಾಯಿ ಕೊಟ್ಟು, ಬಂಗಲೆಯೊಂದನ್ನು ಖರೀದಿಸಿದ್ದಾರೆ ಎಂದು ಎಕನಾಮಿಕ್ ಟೈಮ್ಸ್ ವರದಿ ಮಾಡಿದೆ.

ವರದಿ ಪ್ರಕಾರ, 31 ಸಾವಿರ ಚದರಡಿ ವಿಸ್ತೀರ್ಣದ ಈ ಬಂಗಲೆಯನ್ನು ಪ್ರಕಾಶ್ ಬೇದ್ ಖರೀದಿಸಿದ್ದಾರೆ. ಕೋಲ್ಕತ್ತಾದಲ್ಲಿ ನಡೆದ ಅತಿ ದೊಡ್ಡ ರಿಯಲ್ ಎಸ್ಟೇಟ್ ವ್ಯವಹಾರಗಳಲ್ಲಿ ಇದು ಒಂದು. ಈ ಬಂಗಲೆ 3.734 ಚದರ ಯಾರ್ಡ್ ವ್ಯಾಪಿಸಿದ್ದು, ಅವಿಜಿತ್ ಮಜುಂದಾರ್ ಅವರಿಗೆ ಸೇರಿದ ಬಂಗಲೆ ಇದು. ಟಿಐಎಲ್ ಲಿಮಿಟೆಡ್ ನ ಮಾಜಿ ಕಾರ್ಯ ನಿರ್ವಾಹಕ ನಿರ್ದೇಶಕರು ಮಜುಂದಾರ್.

ಈ ಬಂಗಲೆಯಲ್ಲಿ ಐದು ಬೆಡ್ ರೂಮ್ ಗಳಿವೆ. ಮೂರು ಹಂತಗಳಲ್ಲಿ ಇದ್ದು, ಎಲಿವೇಟರ್ ಇದೆ. ಜತೆಗೆ ಮೂರು ಕಾರು ಗ್ಯಾರೇಜ್ ಹಾಗೂ ಹದಿನಾಲ್ಕು ಮಂದಿ ಅತಿಥಿಗಳಿಗೆ ಪಾರ್ಕಿಂಗ್ ಅವಕಾಶ ಮಾಡಿಕೊಡಬಹುದು. ಈ ವ್ಯವಹಾರವನ್ನು ಯಶಸ್ವಿಯಾಗಿ ಮಾಡಿ ಮುಗಿಸಲು ಮಧ್ಯಸ್ಥಿಕೆ ವಹಿಸಿದ್ದವರು ಅಡ್ವಿನ್ ಛದಾ.