RBIನಿಂದ 45,000 ಕೋಟಿ ತನಕ ಮಧ್ಯಂತರ ಲಾಭಾಂಶ ಕೇಳಬಹುದು ಮೋದಿ ಸರ್ಕಾರ

ಪ್ರಸಕ್ತ ಹಣಕಾಸು ವರ್ಷದಲ್ಲಿ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿರುವ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸರ್ಕಾರವು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾದಿಂದ 35,000ದಿಂದ 45,000 ಕೋಟಿ ರುಪಾಯಿ ಮಧ್ಯಂತರ ಲಾಭಾಂಶವನ್ನು ಕೇಳಬಹುದು ಎಂದು ಮೂಲಗಳು ತಿಳಿಸಿವೆ. ಒಂದು ವೇಳೆ ಸರ್ಕಾರದ ಮನವಿಯನ್ನು ಆರ್ ಬಿಐ ಪುರಸ್ಕರಿಸಿದಲ್ಲಿ ಸತತವಾಗಿ ಮೂರನೇ ವರ್ಷ ಮಧ್ಯಂತರ ಲಾಭಾಂಶವನ್ನು ನೀಡಿದಂತಾಗುತ್ತದೆ.

ಪದೇಪದೇ ಮಧ್ಯಂತರ ಲಾಭಾಂಶವನ್ನು ಸರ್ಕಾರ ಕೇಳುವುದಿಲ್ಲ. ಆದರೆ ಈ ವರ್ಷದ ಸ್ಥಿತಿ ಕ್ಲಿಷ್ಟಕರವಾಗಿದೆ. ಆ ಕಾರಣಕ್ಕೆ ಮಧ್ಯಂತರ ಲಾಭಾಂಶವನ್ನು ಆರ್ ಬಿಐ ನೀಡಬೇಕು ಎಂದು ಈಗಿನ ಬೆಳವಣಿಗೆ ಬಗ್ಗೆ ಮಾಹಿತಿ ಇರುವ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಕಳೆದ ವರ್ಷ ಉತ್ತಮ ಲಾಭ ಗಳಿಸಿದ್ದ ರಿಸರ್ವ್ ಬ್ಯಾಂಕ್, 1.23 ಲಕ್ಷ ಕೋಟಿ ತನಕ ಲಾಭ ದಾಖಲಿಸಿತ್ತು. ಕರೆನ್ಸಿ ಟ್ರೇಡಿಂಗ್ ಮತ್ತು ಸರ್ಕಾರದ ಬಾಂಡ್ ಗಳ ಮೂಲಕ ಈ ಲಾಭ ಮಾಡಿತ್ತು. ಅದರಲ್ಲಿ ಸ್ವಲ್ಪ ಭಾಗ ಕಾರ್ಯ ನಿರ್ವಹಣೆ ಚಟುವಟಿಕೆಗೆ ಮತ್ತು ಅನಿರೀಕ್ಷಿತ ಖರ್ಚುಗಳಿಗೆ ಮೀಸಲಿರಿಸಿತ್ತು. ಬಾಕಿ ಮೊತ್ತವನ್ನು ಲಾಭಾಂಶವಾಗಿ ಸರ್ಕಾರಕ್ಕೆ ಪಾವತಿಸಿತ್ತು.

ಒಟ್ಟಾರೆಯಾಗಿ ಕೇಂದ್ರ ಸರ್ಕಾರದ ಆದಾಯದಲ್ಲಿ ಗಣನೀಯವಾಗಿ ಕುಸಿದಿದ್ದು, ಬೆಳವಣಿಗೆ ದರವು ಐದು ಪರ್ಸೆಂಟ್ ಗಿಂತ ಕಡಿಮೆ ಇದೆ. ಅನ್ಯಥಾ ಮಾರ್ಗ ಇಲ್ಲದೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಬಳಿ ಮಧ್ಯಂತರ ಲಾಭಾಂಶವನ್ನು ಕೇಳಬಹುದು ಎನ್ನಲಾಗುತ್ತಿದೆ.