ಮುಕೇಶ್ ಅಂಬಾನಿ ಆಸ್ತಿಯಲ್ಲಿ 1.11 ಲಕ್ಷ ಕೋಟಿ ರುಪಾಯಿ 'ಕೊರೊನಾ' ಪಾಲು

ರಿಲಯನ್ಸ್ ಇಂಡಸ್ಟ್ರೀಸ್ ಷೇರುಗಳು ಬೆಲೆಯಲ್ಲಿ ಗುರುವಾರದಂದು 9 ಪರ್ಸೆಂಟ್ ಇಳಿಕೆಯಾಗಿದೆ. ಆ ಮೂಲಕ ಷೇರಿನ ಬೆಲೆಯು ಹೊಸದಾಗಿ ವಾರ್ಷಿಕ ಕನಿಷ್ಠ ಮಟ್ಟ ತಲುಪಿದೆ. ಷೇರಿನ ಬೆಲೆಯು ಕನಿಷ್ಠ ಮಟ್ಟವಾದ 1049.50 ತಲುಪಿತು. ದಿನಾಂತ್ಯಕ್ಕೆ ಎನ್ ಎಸ್ ಇಯಲ್ಲಿ 1063 ರುಪಾಯಿಗೆ ವಹಿವಾಟು ಮುಗಿಸಿದೆ. ಈ ವರ್ಷದಲ್ಲೇ ಷೇರಿನ ಬೆಲೆಯಲ್ಲಿ 28 ಪರ್ಸೆಂಟ್ ಇಳಿಕೆಯಾಗಿದೆ.

ಇನ್ನು ಏಷ್ಯಾದ ಅತಿ ದೊಡ್ಡ ಶ್ರೀಮಂತ ಎಂಬ ಕಿರೀಟ ತೊಟ್ಟಿದ್ದ ಮುಕೇಶ್ ಅಂಬಾನಿ ಆಸ್ತಿಯಲ್ಲಿ 1.11 ಲಕ್ಷ ಕೋಟಿ ರುಪಾಯಿ ಕರಗಿಹೋಗಿದೆ. ಆ ಕಾರಣಕ್ಕೆ ಅಂಬಾನಿ ತೊಟ್ಟಿದ್ದ ನಂಬರ್ ಒನ್ ಕಿರೀಟವು ಅಲಿಬಾಬಾ ಸ್ಥಾಪಕ ಜಾಕ್ ಮಾ ಪಾಲಾಗಿದೆ. ಈ ಮಧ್ಯೆ ರಿಲಯನ್ಸ್ ಇಂಡಸ್ಟ್ರೀಸ್ ರೇಟಿಂಗ್ ಅನ್ನು ಬುಧವಾರ ಹೆಚ್ಚಿಸಿರುವ ಜಾಗತಿಕ ಬ್ರೋಕರೇಜ್ ಸಂಸ್ಥೆ ಯುಬಿಎಸ್ ಸೆಕ್ಯೂರಿಟೀಸ್, ರಿಲಯನ್ಸ್ ಇಂಡಸ್ಟ್ರೀಸ್ ಷೇರು ಖರೀದಿ ಶಿಫಾರಸು ಮಾಡಿದೆ.

ಮುಂದಿನ ಹನ್ನೆರಡು ತಿಂಗಳ ಅವಧಿಗೆ 1840 ರುಪಾಯಿಗೆ ಷೇರಿನ ಬೆಲೆ ತಲುಪಬಹುದು ಎಂದು ಅಂದಾಜು ಮಾಡಿದೆ. ಈಗ ರಿಲಯನ್ಸ್ ಇಂಡಸ್ಟ್ರೀಸ್ ಷೇರಿನ ಬೆಲೆಯಲ್ಲಿ ಇಳಿಕೆ ಕಾಣುತ್ತಿರುವುದು ಖರೀದಿಗೆ ಅವಕಾಶ ಎಂದು ಅಭಿಪ್ರಾಯ ಪಡಲಾಗಿದೆ. ಇತ್ತೀಚಿನ ಗರಿಷ್ಠ ಮಟ್ಟದಿಂದ 30 ಪರ್ಸೆಂಟ್ ಷೇರಿನ ಬೆಲೆ ಇಳಿಕೆಯಾಗಿದೆ. ಕೊರೊನಾ ಆತಂಕದಿಂದ ಇಂಥದ್ದೊಂದು ಬೆಳವಣಿಗೆ ಆಗಿದೆ.