ನೇಪಾಳದ ಏಕೈಕ ಶತಕೋಟ್ಯಧಿಪತಿಗೆ ಕೊರೊನಾ ಪಾಸಿಟಿವ್

ನೇಪಾಳದ ಏಕೈಕ ಶತಕೋಟ್ಯಧಿಪತಿ ಹಾಗೂ ನೇಪಾಳಿ ಕಾಂಗ್ರೆಸ್ ನಿಂದ ಆಯ್ಕೆಯಾದ ಕೆಳಮನೆಯ ಸದಸ್ಯ ಬಿನೋದ್ ಚೌಧರಿ ಅವರಿಗೆ ಶುಕ್ರವಾರ ಕೊರೊನಾ ಪಾಸಿಟಿವ್ ದೃಢವಾಗಿದೆ. ಮೈಕ್ರೋ ಬ್ಲಾಗಿಂಗ್ ಸೈಟ್ ಟ್ವಿಟ್ಟರ್ ಮೂಲಕ ತಮಗೆ ಕೊರೊನಾ ಪಾಸಿಟಿವ್ ಎಂಬುದನ್ನು ಉದ್ಯಮಿ ಚೌಧರಿ ಖಾತ್ರಿ ಪಡಿಸಿದು, ಈಚೆಗೆ ಅವರ ಸಂಪರ್ಕಕ್ಕೆ ಬಂದಿದ್ದವರು ಮುಂಜಾಗ್ರತೆ ತೆಗೆದುಕೊಳ್ಳುವಂತೆ ಮನವಿ ಮಾಡಿದ್ದಾರೆ.

ತಮಗೆ ಸೋಂಕಿನ ಯಾವುದೇ ಲಕ್ಷಣಗಳಿಲ್ಲ ಎಂದು ತಿಳಿಸಿರುವ ಅವರು, ವೈದ್ಯರ ಸಲಹೆ ಮೇರೆಗೆ ಪ್ರತ್ಯೇಕವಾಗಿ ಇರುವುದಾಗಿ ತಿಳಿಸಿದ್ದಾರೆ. ಫೋರ್ಬ್ಸ್ ನಿಯತಕಾಲಿಕೆ ಪ್ರಕಟಿಸಿದ ವಿಶ್ವದ ಶತಕೋಟ್ಯಧಿಪತಿಗಳ ಪಟ್ಟಿಯಲ್ಲಿ ಬಿನೋದ್ ಚೌಧರಿ 1513ನೇ ಸ್ಥಾನದಲ್ಲಿ ಇದ್ದಾರೆ. ಅವರ ಆಸ್ತಿ ಮೌಲ್ಯ 140 ಕೋಟಿ ಅಮೆರಿಕನ್ ಡಾಲರ್ ಇದೆ. ಭಾರತದ ರುಪಾಯಿ ಲೆಕ್ಕದಲ್ಲಿ 10 ಸಾವಿರ ಕೋಟಿಯನ್ನು ದಾಟುತ್ತದೆ.

ಸಿಜಿ ಕಾರ್ಪೊರೇಷನ್ ಗ್ಲೋಬಲ್ ಚೌಧರಿ ಅವರ ಒಡೆತನದಲ್ಲಿದೆ. ನೇಪಾಳದ ನೆಬಿಲ್ ಬ್ಯಾಂಕ್ ಹಾಗೂ ಸಿಜಿ ಫುಡ್ಸ್ ನಲ್ಲೂ ಷೇರನ್ನು ಹೊಂದಿದ್ದಾರೆ. ನೇಪಾಳದಲ್ಲಿ ಕೊರೊನಾ ಸೋಂಕಿತ ಪ್ರಕರಣಗಳು ಹೆಚ್ಚಾಗುತ್ತಲೇ ಇದೆ. ಈ ತನಕ ನೇಪಾಳದಲ್ಲಿ 36,456 ಸೋಂಕಿತ ಪ್ರಕರಣಗಳು ಕಂಡುಬಂದಿದ್ದರೆ, 20,242 ಮಂದಿ ಚೇತರಿಸಿಕೊಂಡಿದ್ದಾರೆ. 195 ಮಂದಿ ಸಾವನ್ನಪ್ಪಿದ್ದಾರೆ.