ಖರೀದಿ ಮಾಡುವವರೇ ಇಲ್ಲದ ಐಆರ್ ಸಿಟಿಸಿ ಷೇರು; ಗರಿಷ್ಠದಿಂದ 39% ಡೌನ್

ನಿರಂತರವಾಗಿ ಏರುತ್ತಲೇ ಸಾಗಿದ್ದ ಐಆರ್ ಸಿಟಿಸಿ ಷೇರು ಬೆಲೆಯಲ್ಲಿ 39 ಪರ್ಸೆಂಟ್ ಇಳಿಕೆಯಾಗಿದೆ. ಇತ್ತೀಚೆಗಷ್ಟೇ ಐಆರ್ ಸಿಟಿಸಿ ವಾರ್ಷಿಕ ಗರಿಷ್ಠ ಮಟ್ಟ ತಲುಪಿತ್ತು. ಷೇರು ಮಾರುಕಟ್ಟೆಯಲ್ಲಿನ ಕೊರೊನಾ ಆತಂಕವಿದ್ದು, ಹೂಡಿಕೆದಾರರಿಗೆ ಈ ಷೇರಿನ ಬಗ್ಗೆ ಮೊದಲಿನ ಆಕರ್ಷಣೆ ಇಲ್ಲ. ಅದೇ ಕಾರಣದಿಂದಲೋ ಏನೋ ಗುರುವಾರದಂದು ಒಂದೇ ಒಂದು 'ಖರೀದಿ' ಆರ್ಡರ್ ಕೂಡ ಬಂದಿಲ್ಲ.

ಸರ್ಕಾರಿ ಸ್ವಾಮ್ಯದ ಐಆರ್ ಸಿಟಿಸಿ ಷೇರು 1221.10ಗೆ ಕುಸಿದಿದೆ. ಫೆಬ್ರವರಿ 25ನೇ ತಾರೀಕಷ್ಟೇ ಈ ಷೇರು ವಾರ್ಷಿಕ ಗರಿಷ್ಠ ಮಟ್ಟವಾದ 1994 ರುಪಾಯಿ ತಲುಪಿತ್ತು. ಕೇವಲ 10 ಟ್ರೇಡಿಂಗ್ ನಲ್ಲೇ ಈ ಪರಿ ಇಳಿಕೆ ಕಂಡಿದೆ. ಗುರುವಾರ ಮಧ್ಯಾಹ್ನದ ಹೊತ್ತಿಗೆ ಈ ಷೇರಿಗೆ 2.5 ಲಕ್ಷ 'ಮಾರಾಟ'ದ ಆರ್ಡರ್ ಹಾಕಲಾಗಿತ್ತು. ಆದರೆ ಒಂದೇ ಒಂದು ಖರೀದಿ ಆರ್ಡರ್ ಇರಲಿಲ್ಲ.

ಕೊರೊನಾದ ಕಾರಣಕ್ಕೆ ಭಾರತದಲ್ಲಿ ಪ್ರವಾಸಿಗರ ಎಲ್ಲ ಷೆಡ್ಯೂಲ್ ರದ್ದು ಮಾಡಲಾಗುತ್ತಿದೆ. ಇದರಿಂದ ಭಾರತೀಯ ಕಂಪೆನಿಗಳಿಗೆ ಭಾರೀ ನಷ್ಟವಾಗಬಹುದು ಎಂಬ ಅಂದಾಜಿದೆ. ಇಂಡಿಗೋ ಏರ್ ಲೈನ್ಸ್ ಬುಧವಾರ ನೀಡಿರುವ ಮಾಹಿತಿ ಪ್ರಕಾರ, ಕಳೆದ ಕೆಲ ದಿನಗಳಲ್ಲಿ ಹದಿನೈದರಿಂದ ಇಪ್ಪತ್ತು ಪರ್ಸೆಂಟ್ ನಷ್ಟು ಬುಕ್ಕಿಂಗ್ ನಲ್ಲಿ ಇಳಿಕೆ ಆಗಿದೆ. ಇದರಿಂದ ತ್ರೈಮಾಸಿಕ ಗಳಿಕೆ ಮೇಲೆ ಭಾರೀ ಪ್ರಭಾವ ಆಗಲಿದೆ ಎಂದು ತಿಳಿಸಿದೆ.

ಭಾರತದ ಪ್ರವಾಸೋದ್ಯಮದ ಮೇಲೆ ವ್ಯತಿರಿಕ್ತ ಪರಿಣಾಮ ಆಗುವುದರಿಂದ ಐಆರ್ ಸಿಟಿಸಿ ಲಾಭದ ಮೇಲೂ ಪ್ರಭಾವ ಆಗಲಿದೆ. ಭಾರತದಲ್ಲಿ ಒಟ್ಟಾರೆ ಕೊರೊನಾ ಪ್ರಕರಣಗಳ ಸಂಖ್ಯೆ 73 ತಲುಪಿದೆ ಎಂದು ಆರೋಗ್ಯ ಸಚಿವರು ಮಾಹಿತಿ ನೀಡಿದ್ದಾರೆ.