ಕಳೆದ ಏಳು ದಿನದಲ್ಲಿ ಆರು ಬಾರಿ ಏರಿಕೆಯಾದ ಪೆಟ್ರೋಲ್ ದರ

ಸರ್ಕಾರಿ ಸ್ವಾಮ್ಯದ ತೈಲ ಮಾರ್ಕೆಟಿಂಗ್ ಕಂಪೆನಿಗಳಿಂದ ಶನಿವಾರ (ಆಗಸ್ಟ್ 22, 2020) ಕೂಡ ಪೆಟ್ರೋಲ್ ಬೆಲೆ ಏರಿಕೆ ಆಗಿದೆ. ಆ ಮೂಲಕ ಸತತ ಮೂರನೇ ದಿನ ದರ ಹೆಚ್ಚಳ ಆಗಿದೆ. ಕಳೆದ ಏಳು ದಿನದಲ್ಲಿ ಆರು ದಿನಗಳ ಕಾಲ ಪೆಟ್ರೋಲ್ ಬೆಲೆ ಏರಿಕೆ ಆಗಿದೆ. ಪೆಟ್ರೋಲ್ ದರ 16 ಪೈಸೆ ಹೆಚ್ಚಳವಾಗಿ, ದೆಹಲಿಯಲ್ಲಿ ಪೆಟ್ರೋಲ್ ಬೆಲೆ ಲೀಟರ್ ಗೆ ರು. 81.35 ಮುಟ್ಟಿದೆ. ಮುಂಬೈನಲ್ಲಿ 88.02 ರುಪಾಯಿ ಇದೆ.

ಇನ್ನು ಡೀಸೆಲ್ ಬೆಲೆ ಸತತವಾಗಿ 23 ದಿನಗಳ ಕಾಲ ಸ್ಥಿರವಾಗಿದೆ. ಪೆಟ್ರೋಲ್ ಬೆಲೆ ಕೂಡ ಜುಲೈನಲ್ಲಿ ಇದೇ ಥರ ಆಗಿತ್ತು. ಜೂನ್ 29ನೇ ತಾರೀಕಿನಿಂದ ಬೆಲೆ ಹೆಚ್ಚಳ ಆಗಿರಲಿಲ್ಲ. ಆ ಇಡೀ ಅವಧಿಯಲ್ಲಿ ಡೀಸೆಲ್ ದರ ನಿರಂತರವಾಗಿ ಏರಿಕೆ ಕಂಡಿತ್ತು. ದೀರ್ಘ ಕಾಲದಿಂದ ಸ್ಥಿರವಾಗಿ ನಿಂತಿದ್ದ ಪೆಟ್ರೋಲ್ ಆಗಸ್ಟ್ 16ರಂದು ಪರಿಷ್ಕರಣೆ ಆಗಿತ್ತು.

ಅದಕ್ಕೂ ಮುನ್ನ ಪೆಟ್ರೋಲ್ ಬೆಲೆ ಹೆಚ್ಚಳವಾಗಿತ್ತು. ಆಗಸ್ಟ್ 16ರಿಂದ ಈಚೆಗೆ ಲೀಟರ್ ಗೆ 92 ಪೈಸೆ ಹೆಚ್ಚಳ ಆಗಿದೆ. ಜುಲೈ 30ನೇ ತಾರೀಕಿನಂದು ದೆಹಲಿ ಸರ್ಕಾರ ವ್ಯಾಲ್ಯೂ ಆಡೆಡ್ ಟ್ಯಾಕ್ಸ್ (ವ್ಯಾಟ್) 13.25% ಇಳಿಕೆ ಮಾಡಿದ ಮೇಲೆ, ಡೀಸೆಲ್ ದರ ಲೀಟರ್ ಗೆ 8.36 ರುಪಾಯಿ ಕೆಳಗೆ ಇಳಿದು, 73.56 ರುಪಾಯಿ ತಲುಪಿತ್ತು. ಆ ನಂತರ ಬೆಲೆ ಸ್ಥಿರವಾಗಿದೆ.