ಚಿನ್ನದ ಮಾಸ್ಕ್ ಧರಿಸುವ ಶಂಕರ್ ಕುರಡೆ ಕೊರೊನಾಗಿಂತ ಫೇಮಸ್ !

ಕೊರೊನಾ ವ್ಯಾಪಿಸುತ್ತಿರುವಂತೆ ಫೇಸ್ ಮಾಸ್ಕ್ ಹಾಕಲೇಬೇಕು ಅನ್ನೋದು ಕಡ್ಡಾಯ ಆಗಿದೆ. ಅದೇ ರೀತಿ ಆಯಾ ಕಾಲಕ್ಕೆ ಏನು ಟ್ರೆಂಡ್ ಇರುತ್ತದೋ ಆ ಬಗ್ಗೆ ವಿಡಿಯೋಗಳು, ಫೋಟೋಗಳು ಕೂಡ ಹರಿದಾಡುತ್ತವೆ. ಈ ವರದಿಯಲ್ಲಿ ಪ್ರಸ್ತಾವ ಮಾಡಲಿರುವ ವ್ಯಕ್ತಿ ಒಂದು ಹೆಜ್ಜೆ ಮುಂದಕ್ಕೆ ಹೋಗಿದ್ದಾರೆ. ಪುಣೆ ಜಿಲ್ಲೆಯ ಪಿಂಪ್ರಿ- ಛಿಂಚ್ವಾಡ್ ನವರಾದ ಶಂಕರ್ ಕುರಡೆ ಈಗ ಬಹಳ ಫೇಮಸ್.

ಅದಕ್ಕೆ ಕಾರಣ ಆಗಿರುವುದು ಅವರು ಧರಿಸುವುದು ವಿಶಿಷ್ಟ ಮಾಸ್ಕ್. ವಿಶಿಷ್ಟ ಅಷ್ಟೇ ಮಾತ್ರ ಅಲ್ಲ. ವಿಪರೀತ ದುಬಾರಿ ಕೂಡ ಹೌದು. ತಮಗೊಂದು ಮಾಸ್ಕ್ ಮಾಡಿಸಿಕೊಂಡಿದ್ದಾರೆ ಶಂಕರ್ ಕುರಡೆ. ಪೂರ್ತಿ ಚಿನ್ನದ್ದು. ಅದರ ಬೆಲೆ 2.89 ಲಕ್ಷ ರುಪಾಯಿ. ಕುರಡೆ ಅವರ ಮಾಸ್ಕ್ ಚಿತ್ರಗಳು ಶೇರ್ ಆಗುತ್ತಿದ್ದಂತೆ ಸಾಮಾಜಿಕ ಮಾಧ್ಯಮಗಳಲ್ಲಿ ದೊಡ್ಡ ಸದ್ದು ಮಾಡಿವೆ.

"ಇದು ತೆಳುವಾದ ಮಾಸ್ಕ್. ಸಣ್ಣ ರಂಧ್ರಗಳಿರುವುದರಿಂದ ಉಸಿರಾಡುವುದು ಕಷ್ಟವಲ್ಲ. ಈ ಮಾಸ್ಕ್ ಪರಿಣಾಮಕಾರಿ ಹೌದೋ ಅಲ್ಲವೋ ಎಂಬುದರ ಬಗ್ಗೆ ನನಗೆ ಖಾತ್ರಿ ಇಲ್ಲ" ಎನ್ನುತ್ತಾರೆ ಶಂಕರ್ ಕುರಡೆ. ಟ್ವಿಟ್ಟರ್ ನಲ್ಲಿ ಈ ಮಾಸ್ಕ್ ಫೋಟೋಗಳನ್ನು ಶೇರ್ ಮಾಡಿದ ಮೇಲೆ 1300 ಲೈಕ್ಸ್ ಬಂದಿವೆ. ರಾಶಿ ರಾಶಿ ಕಾಮೆಂಟ್ ಗಳು ಬಂದಿವೆ.

ಈ ಪೈಕಿ ಕೆಲವರು ಶಂಕರ್ ಕುರಡೆ ಅವರ ಕಾಲೆಳೆದಿದ್ದಾರೆ. ತೆಳುವಾದ ರಂಧ್ರಗಳು ಇಲ್ಲದಿದ್ದಲ್ಲಿ ಇದು ಪರಿಣಾಮಕಾರಿ ಆಗಿರುತ್ತಿತ್ತು ಎಂದಿದ್ದಾರೆ. ಈ ಬಗ್ಗೆ ಮೀಮ್ಸ್ ಗಳನ್ನು ಸಹ ಹಂಚಿಕೊಂಡಿದ್ದಾರೆ. ಮತ್ತೆ ಕೆಲವರು ಈ ರೀತಿ ಮೀಮ್ಸ್ ಮಾಡಿರುವುದಕ್ಕೆ ಆಕ್ಷೇಪ ಕೂಡ ವ್ಯಕ್ತಪಡಿಸಿದ್ದಾರೆ.

2.89 ಲಕ್ಷ ಖರ್ಚು ಮಾಡಿದ ಮೇಲೂ ಪರಿಣಾಮಕಾರಿಯಾ ಎಂಬ ಖಾತ್ರಿ ಇಲ್ಲ ಎನ್ನುತ್ತಾರೆ ಎಂದೊಬ್ಬರು ಕಾಮೆಂಟ್ ಮಾಡಿದ್ದರೆ, ಈ ಮನುಷ್ಯ ನಿಜವಾ ಎಂದು ಇನ್ನೊಬ್ಬರು ಪ್ರಶ್ನೆ ಮಾಡಿದ್ದಾರೆ.