Rapido ಬೈಕ್ ಟ್ಯಾಕ್ಸಿ ಸೇವೆ 11 ರಾಜ್ಯಗಳ 39 ನಗರಗಳಲ್ಲಿ ಮತ್ತೆ ಶುರು

ಬೈಕ್ ಟ್ಯಾಕ್ಸಿ ಸೇವೆ ಒದಗಿಸುವ Rapido 11 ರಾಜ್ಯಗಳ 39 ನಗರಗಳಲ್ಲಿ ಮತ್ತೆ ಕಾರ್ಯ ನಿರ್ವಹಿಸಲು ಆರಂಭಿಸಿದೆ ಎಂದು ಬುಧವಾರ ತಿಳಿಸಲಾಗಿದೆ. ಕೇಂದ್ರ ಸರ್ಕಾರದಿಂದ ಮೇ 31ರ ತನಕ ಲಾಕ್ ಡೌನ್ ವಿಸ್ತರಣೆ ಮಾಡಿದ್ದು, ಹಲವು ವಿನಾಯಿತಿಗಳನ್ನು ಘೋಷಣೆ ಮಾಡಿದ ಬೆನ್ನಿಗೆ ಈ ತೀರ್ಮಾನ ಮಾಡಲಾಗಿದೆ.

"ಸದ್ಯಕ್ಕೆ ನಮ್ಮ ಬೈಕ್ ಟ್ಯಾಕ್ಸಿ ಸೇವೆಯು ಹಸಿರು ಮತ್ತು ಆರೇಂಜ್ ವಲಯದಲ್ಲಿ ಮಾತ್ರ ಇರಲಿದೆ. ಲಾಕ್ ಡೌನ್ ನಿಯಮಾವಳಿ ಪ್ರಕಾರ ಕಂಟೇನ್ ಮೆಂಟ್ ವಲಯಗಳಿಗೆ ಸೇವೆ ವಿಸ್ತರಿಸುವುದಕ್ಕೆ ಸಾಧ್ಯವಿಲ್ಲ" ಎಂದು ಕಂಪೆನಿಯು ಹೇಳಿಕೆಯಲ್ಲಿ ತಿಳಿಸಿದೆ. ಅಪ್ಲಿಕೇಷನ್ ನೋಟಿಫಿಕೇಷನ್ ನಲ್ಲಿ ವಿವಿಧ ನಗರಗಳಲ್ಲಿನ ಪರಿಸ್ಥಿತಿ ಮತ್ತು ಸುರಕ್ಷತಾ ಕ್ರಮಗಳ ಬಗ್ಗೆ ಮಾಹಿತಿ ನೀಡಲಾಗುವುದು ಎಂದು ತಿಳಿಸಲಾಗಿದೆ.

'ಕ್ಯಾಪ್ಟನ್ ಗಳು' ಅಥವಾ ಚಾಲಕರು ಕರ್ತವ್ಯಕ್ಕೆ ತೆರಳುವ ಮೊದಲು ಕಡ್ಡಾಯವಾಗಿ ಆರೋಗ್ಯ ಸೇತು ಅಪ್ಲಿಕೇಷನ್ ಇನ್ ಸ್ಟಾಲ್ ಮಾಡಿಕೊಂಡಿರಬೇಕು. ಸದಾ ಮಾಸ್ಕ್ ಧರಿಸುವುದು ಕಡ್ಡಾಯ ಮಾಡಲಾಗಿದ್ದು, ಸದಾ ಸ್ಯಾನಿಟೈಸರ್ ಇಟ್ಟುಕೊಂಡಿರಬೇಕು. ಹೆಲ್ಮೆಟ್ ಜತೆಗೆ ಹೇರ್ ನೆಟ್ ಕಡ್ಡಾಯವಾಗಿ ಧರಿಸಬೇಕು ಎಂದು ತಿಳಿಸಲಾಗಿದೆ.

ವೈಯಕ್ತಿಕವಾಗಿ ಚಾಲಕರು ಸ್ವಚ್ಛತೆ ಕಾಪಾಡಿಕೊಳ್ಳಬೇಕು. ಜತೆಗೆ ಬೈಕ್ ಅನ್ನು ಆಗಾಗ ಸ್ಯಾನಿಟೈಸ್ ಮಾಡಬೇಕು. ಗ್ರಾಹಕರು ಬೈಕ್ ನಲ್ಲಿ ಕೂರುವ ಮುನ್ನ ಹಿಂಬದಿ ಸೀಟನ್ನು ಸ್ಯಾನಿಟೈಸ್ ಮಾಡಬೇಕು ಎಂದು ಸೂಚಿಸಲಾಗಿದೆ. ಗ್ರಾಹಕರು ತಮ್ಮ ರೈಡ್ ನಂತರ ಸುರಕ್ಷತೆ ಬಗ್ಗೆ ಅಭಿಪ್ರಾಯ ದಾಖಲಿಸಬೇಕು.