2,000 ಕೋಟಿ ಹಣ ದುರುಪಯೋಗ, ಕಾರ್ವಿ ಮೇಲೆ ನಿಷೇಧ ಹೇರಿದ ಸೆಬಿ

ಭಾರತೀಯ ಷೇರುಪೇಟು ನಿಯಂತ್ರಣ ಮಂಡಳಿ(ಸೆಬಿ)ಯು ಷೇರುಗಳ ದಲ್ಲಾಳಿ ಕಾರ್ಯ ಸಂಸ್ಥೆ ಕಾರ್ವಿ ಮೇಲೆ ತಕ್ಷಣವೇ ಜಾರಿಗೆ ಬರುವಂತೆ ನಿಷೇಧ ಹೇರಿದೆ.

ಕಾರ್ವಿ ವಾಗ್ದಾನ(Pledged) ಮಾಡಿದ ಗ್ರಾಹಕರ ಷೇರುಗಳನ್ನು ಸಾಲಕ್ಕಾಗಿ ಕಾನೂನು ಬಾಹಿರವಾಗಿ ಮಾರಾಟ ಮಾಡಿದೆ. ಹೀಗಾಗಿ ಹೊಸ ಗ್ರಾಹಕರ ಸೇರ್ಪಡೆ ಮತ್ತು ಅಸ್ತಿತ್ವದಲ್ಲಿರುವ ಗ್ರಾಹಕರ ಷೇರುಗಳನ್ನು ವಹಿವಾಟು ನಡೆಸದಂತೆ ನಿಷೇಧ ಹೇರಿದೆ. ಕಾರ್ವಿ ತನ್ನೊಂದಿಗೆ ವಾಗ್ದಾನ (Pledged) ಮಾಡಿದ ಗ್ರಾಹಕರ ಷೇರುಗಳನ್ನು ಸಂಬಂಧಿತ ಘಟಕಗಳಿಗೆ ಮಾರಾಟ ಮಾಡಿದೆ ಎಂದು ಎನ್‌ಎಸ್‌ಇ ತನಿಖೆಯಲ್ಲಿ ತಿಳಿದುಬಂದಿದೆ.

ಸಂಸ್ಥೆಯು ತನ್ನದೇ ಆದ ವಹಿವಾಟುಗಳಿಗಾಗಿ ಗ್ರಾಹಕರ ಮೇಲಾಧಾರವನ್ನು (Client collateral) ದುರುಪಯೋಗ ಪಡಿಸಿಕೊಂಡಿದೆ ಎಂದು ಸೆಬಿ ಹೇಳಿದೆ. ನಿಯಂತ್ರಕರ ಮಧ್ಯವರ್ತಿ ನಿಯಮಗಳ ಪ್ರಕಾರ, ದಲ್ಲಾಳಿ ಸಂಸ್ಥೆಗಳು ಗ್ರಾಹಕರ ಭದ್ರತೆಗಳ ಮೇಲೆ ಹೆಚ್ಚುವರಿಯಾಗಿ ಹಣವನ್ನು ಪಡೆಯಲು ಸಾಧ್ಯವಿಲ್ಲ.

ಆದರೆ ಕಾರ್ವಿ 2,000 ಕೋಟಿ ರುಪಾಯಿಗಳನ್ನು ದುರುಪಯೋಗ ಪಡಿಸಿಕೊಂಡಿದೆ. ಭಾರತದಲ್ಲಿ ಷೇರುಗಳ ದಲ್ಲಾಳಿ ಸಂಸ್ಥೆ ಮಾಡಿದ ಅತಿ ದೊಡ್ಡ ದುರುಪಯೋಗ ಇದಾಗಿದೆ.

'ದಲ್ಲಾಳಿಗಳು ಗ್ರಾಹಕರಿಗೆ ಪಾವತಿಸಬೇಕಾದ ಹಣವನ್ನು ಬಾಕಿ ಉಳಿಸಿಕೊಂಡಿರುವುದರ ಕುರಿತು ಸಾಕಷ್ಟು ದೂರುಗಳು ಬಂದಿವೆ. ಗ್ರಾಹಕರ ಹಣವನ್ನು ದಲ್ಲಾಳಿಗಳು ನಿರ್ವಹಿಸಲು ವ್ಯವಸ್ಥೆಗಳು ಮತ್ತು ಪ್ರಕ್ರಿಯೆಗಳನ್ನು ಸುಧಾರಿಸಲು ನಾವು ಕೆಲಸ ಮಾಡುತ್ತಿದ್ದೇವೆ' ಎಂದು ಸೆಬಿ ಅಧಿಕಾರಿಗಳು ತಿಳಿಸಿದ್ದಾರೆ.

ಕಳೆದ ಒಂದು ವರ್ಷದಲ್ಲಿ ದಲ್ಲಾಳಿಗಳು ಹಣ ಬಾಕಿ ಉಳಿಸಿಕೊಂಡಿರುವುದು ಹೆಚ್ಚಳವಾಗಿದೆ. ಇದು ಮಾರುಕಟ್ಟೆಗಳನ್ನು ವ್ಯವಸ್ಥಿತ ಅಪಾಯಕ್ಕೆ ಗುರಿಯಾಗಿಸಬಹುದು. ದಲ್ಲಾಳಿಗಳು ವಹಿವಾಟುಗಳನ್ನು ಇತ್ಯರ್ಥಗೊಳಿಸುವುದು ಮತ್ತು ತೆರವುಗೊಳಿಸುವುದನ್ನು ತಡೆಯುವುದು ಸೆಬಿ ಪರಿಗಣಿಸುತ್ತಿರುವ ನೀತಿ ಬದಲಾವಣೆಯಲ್ಲಿ ಒಂದಾಗಿದೆ ಎಂದು ಹೇಳಿದ್ದಾರೆ.