ಮೊದಲ ಬಾರಿಗೆ 44 ಸಾವಿರ ಪಾಯಿಂಟ್ ಗಡಿ ದಾಟಿದ ಸೆನ್ಸೆಕ್ಸ್

ಭಾರತದ ಷೇರು ಮಾರುಕಟ್ಟೆ ಸೂಚ್ಯಂಕಗಳಾದ ಸೆನ್ಸೆಕ್ಸ್ ಹಾಗೂ ನಿಫ್ಟಿ ಮಂಗಳವಾರ (ನವೆಂಬರ್ 17, 2020) ಹೊಸ ದಾಖಲೆ ಬರೆದವು ಇದೇ ಮೊದಲ ಬಾರಿಗ್ ಸೆನ್ಸೆಕ್ಸ್ 44 ಸಾವಿರ ಪಾಯಿಂಟ್ ಗಳ ಗಡಿ ದಾಟಿತು. ಬೆಳಗ್ಗೆ ವಹಿವಾಟಿನಲ್ಲಿ ಮುನ್ನೂರಾ ಐವತ್ತಕ್ಕೂ ಹೆಚ್ಚು ಪಾಯಿಂಟ್ ಗಳ ಏರಿಕೆ ಕಂಡಿತ್ತು. ಆ ನಂತರ ಸ್ವಲ್ಪ ಮಟ್ಟಿಗೆ ಗಳಿಕೆಯನ್ನು ಬಿಟ್ಟುಕೊಟ್ಟಿತು. ಇನ್ನು ನಿಫ್ಟಿ ಸೂಚ್ಯಂಕವು 12,900 ಪಾಯಿಂಟ್ ಗಳ ಗಡಿ ದಾಟಿತು.

ಜಾಗತಿಕ ಮಾರುಕಟ್ಟೆಗಳ ಪ್ರಭಾವ, ಕೊರೊನಾ ಲಸಿಕೆ ಕಂಡುಹಿಡಿಯುವುದರಲ್ಲಿ ಸಕಾರಾತ್ಮಕ ಹೆಜ್ಜೆಗಳು, ನಿರ್ದಿಷ್ಟ ವಲಯದಲ್ಲಿನ ಬೆಳವಣಿಗೆ ಇತ್ಯಾದಿ ಅಂಶಗಳೆಲ್ಲ ಸೇರಿ ಷೇರು ಮಾರುಕಟ್ಟೆ ಸೂಚ್ಯಂಕಗಳಾದ ಸೆನ್ಸೆಕ್ಸ್, ನಿಫ್ಟಿಗೆ ಬಲ ತುಂಬಿ, ಹೊಸ ದಾಖಲೆ ಬರೆಯುವುದಕ್ಕೆ ನೆರವಾದವು.

ಟಾಟಾ ಸ್ಟೀಲ್, ಟಾಟಾ ಮೋಟಾರ್ಸ್, ಹಿಂಡಾಲ್ಕೋ, ಭಾರ್ತಿ ಏರ್ ಟೆಲ್ ಹಾಗೂ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಷೇರುಗಳು ಪ್ರಮುಖವಾಗಿ ಏರಿಕೆ ಕಂಡವು. ಇನ್ನು ಬಿಪಿಸಿಎಲ್, ಹೀರೋ ಮೋಟೋಕಾರ್ಪ್, ಡಾ ರೆಡ್ಡೀಸ್ ಲ್ಯಾಬ್ಸ್, ಎಚ್ ಸಿಎಲ್ ಟೆಕ್ನಾಲಜೀಸ್ ಮತ್ತು ಇನ್ಫೋಸಿಸ್ ಪ್ರಮುಖವಾಗಿ ಇಳಿಕೆ ಕಂಡವು.