ಷೇರು ಮಾರುಕಟ್ಟೆಯಲ್ಲಿ 'ಶುಭ ಶುಕ್ರವಾರ'; ಸೆನ್ಸೆಕ್ಸ್ 411, ನಿಫ್ಟಿ 119 ಪಾಯಿಂಟ್ ಏರಿಕೆ
ಭಾರತದ ಷೇರು ಮಾರುಕಟ್ಟೆ ಸೂಚ್ಯಂಕಗಳಾದ ಸೆನ್ಸೆಕ್ಸ್ ಹಾಗೂ ನಿಫ್ಟಿ ಶುಕ್ರವಾರದಂದು (ಡಿಸೆಂಬರ್ 27) ಏರಿಕೆ ದಾಖಲಿಸಿದವು. ಮೂರು ದಿನಗಳಿಂದ ಸತತವಾಗಿ ಇಳಿಕೆ ಹಾದಿಯಲ್ಲಿದ್ದ ಮಾರುಕಟ್ಟೆಯು ಭರ್ಜರಿ ಏರಿಕೆಯನ್ನೇ ದಾಖಲಿಸಿತು. ಐಸಿಐಸಿಐ ಬ್ಯಾಂಕ್, ರಿಲಯನ್ಸ್ ಇಂಡಸ್ಟ್ರೀಸ್, ಎಚ್ ಡಿಎಫ್ ಸಿ, ಆಕ್ಸಿಸ್ ಬ್ಯಾಂಕ್, ಇನ್ಫೋಸಿಸ್ ಮತ್ತು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಷೇರುಗಳು ಲಾಭ ಕಂಡವು.
ಸೆನ್ಸೆಕ್ಸ್ ಸೂಚ್ಯಂಕವು ದಿನಾಂತ್ಯಕ್ಕೆ ವಹಿವಾಟು ಮುಗಿಸಿದಾಗ 411 ಅಂಶಗಳ ಏರಿಕೆ ಕಂಡು, 41,575 ಪಾಯಿಂಟ್ ತಲುಪಿತು. ಇನ್ನು ನಿಫ್ಟಿ 50 ಸೂಚ್ಯಂಕವು 119 ಅಂಶಗಳ ಏರಿಕೆ ದಾಖಲಿಸಿ, 12,246 ಪಾಯಿಂಟ್ ಗೆ ದಿನದ ವ್ಯವಹಾರ ಕೊನೆಗೊಳಿಸಿತು. ಇನ್ನು ನಿಫ್ಟಿ ಬ್ಯಾಂಕ್ ಸೂಚ್ಯಂಕವು 3 ಪರ್ಸೆಂಟ್ ಏರಿಕೆಯಾಯಿತು.
ನಿಫ್ಟಿ ರಿಯಾಲ್ಟಿ, ನಿಫ್ಟಿ ಬ್ಯಾಂಕ್, ನಿಫ್ಟಿ ಹಣಕಾಸು ಸೇವೆ, ನಿಫ್ಟಿ ಮಾಧ್ಯಮ, ನಿಫ್ಟಿ ಖಾಸಗಿ ಬ್ಯಾಂಕ್ ಸೂಚ್ಯಂಕಗಳು 1ರಿಂದ 1.6 ಪರ್ಸೆಂಟ್ ಏರಿದವು. ಅಂದ ಹಾಗೆ ನಿಫ್ಟಿ 50 ಸೂಚ್ಯಂಕದಲ್ಲಿ ಕೋಲ್ ಇಂಡಿಯಾ ಷೇರುಗಳು 3.5 ಪರ್ಸೆಂಟ್ ಏರಿಕೆಯಾಗಿ, ಟಾಪ್ ಗೇಯ್ನರ್ ಎನಿಸಿಕೊಂಡಿತು.
ಆಕ್ಸಿಸ್ ಬ್ಯಾಂಕ್, ಭಾರತ್ ಪೆಟ್ರೋಲಿಯಂ, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ, ಪವರ್ ಗ್ರಿಡ್, ಐಸಿಐಸಿಐ ಬ್ಯಾಂಕ್, ಯುಪಿಎಲ್ ಹಾಗೂ ಭಾರ್ತಿ ಏರ್ ಟೆಲ್ ಷೇರುಗಳು 1.9ರಿಂದ 3.3 ಪರ್ಸೆಂಟ್ ಏರಿಕೆ ಕಂಡವು.
ಆದರೆ, ಯೆಸ್ ಬ್ಯಾಂಕ್, ವಿಪ್ರೋ, ಭಾರ್ತಿ ಇನ್ಫ್ರಾಟೆಲ್, ಬ್ರಿಟಾನಿಯಾ ಇಂಡಸ್ಟ್ರೀಸ್, ಕೊಟಕ್ ಮಹೀಂದ್ರಾ ಬ್ಯಾಂಕ್, ಟೈಟಾನ್ ಮತ್ತು ಅಲ್ಟ್ರಾಟೆಕ್ ಸಿಮೆಂಟ್ ಷೇರುಗಳ ಬೆಲೆಯಲ್ಲಿ ಇಳಿಕೆಯಾಯಿತು. ಒಟ್ಟಾರೆಯಾಗಿ ಮಾರುಕಟ್ಟೆ ಸಕಾರಾತ್ಮಕವಾಗಿತ್ತು. 1518 ಷೇರುಗಳು ಏರಿದರೆ, 1026 ಷೇರುಗಳು ಇಳಿಕೆಯಾದವು.