ಒಂದು ವಾರದಲ್ಲಿ ದೇಶದ ಟಾಪ್ 6 ಕಂಪನಿಗಳಿಗೆ 29,487 ಕೋಟಿ ರುಪಾಯಿ ನಷ್ಟ

ಕಳೆದ ಒಂದು ವಾರದಲ್ಲಿ ಭಾರತೀಯ ಕಂಪನಿಗಳಾದ ಭಾರ್ತಿ ಏರ್‌ಟೆಲ್, ರಿಲಯನ್ಸ್ ಇಂಡಸ್ಟ್ರೀಸ್, ಟಿಸಿಎಸ್‌, ಕೋಟಕ್ ಮಹೀಂದ್ರಾ ಬ್ಯಾಂಕ್‌ ಸೇರಿದಂತೆ ಟಾಪ್ 10 ಕಂಪನಿಗಳಲ್ಲಿ 6 ಕಂಪನಿಗಳು 29,487 ಕೋಟಿ ಮಾರುಕಟ್ಟೆ ಬಂಡವಾಳ ಮೌಲ್ಯ ಕಳೆದುಕೊಂಡಿವೆ.

ದೇಶದಲ್ಲಿ ಹೆಚ್ಚು ಮಾರುಕಟ್ಟೆ ಬಂಡವಾಳ ಮೌಲ್ಯ ಹೊಂದಿರುವ ಟಾಪ್ 10 ದೇಶೀಯ ಸಂಸ್ಥೆಗಳಲ್ಲಿ ಆರು ಕಂಪನಿಗಳು ಮೌಲ್ಯಮಾಪನದಲ್ಲಿ, 29,487 ಕೋಟಿಗಳ ನಷ್ಟ ಅನುಭವಿಸಿದೆ. ಇದರಲ್ಲಿ ಭಾರ್ತಿ ಏರ್‌ಟೆಲ್ ಅತಿದೊಡ್ಡ ನಷ್ಟ ಅನುಭವಿಸಿದೆ.

ಟಿಸಿಎಸ್, ಎಚ್‌ಡಿಎಫ್‌ಸಿ, ಎಚ್‌ಯುಎಲ್, ಎಚ್‌ಡಿಎಫ್‌ಸಿ ಬ್ಯಾಂಕ್ ಮತ್ತು ಆರ್‌ಐಎಲ್ ಇತರ ಬ್ಲೂಚಿಪ್ ಸಂಸ್ಥೆಗಳಾಗಿದ್ದು, ಗುರುವಾರ ಕೊನೆಗೊಂಡ ವಾರದ ಮಾರುಕಟ್ಟೆಯ ಮೌಲ್ಯದಲ್ಲಿ ಕುಸಿತ ಕಂಡಿವೆ. ಇನ್ಫೋಸಿಸ್, ಬಜಾಜ್ ಫೈನಾನ್ಸ್, ಕೋಟಕ್ ಮಹೀಂದ್ರಾ ಬ್ಯಾಂಕ್ ಮತ್ತು ಐಸಿಐಸಿಐ ಬ್ಯಾಂಕ್ ಲಾಭ ಗಳಿಸಿವೆ.

ಭಾರ್ತಿ ಏರ್‌ಟೆಲ್‌ನ ಮೌಲ್ಯಮಾಪನ 10,692.9 ಕೋಟಿ ಕುಸಿದು 2,97,600.65 ಕೋಟಿ ರುಪಾಯಿ ತಲುಪಿದೆ. ಟಿಸಿಎಸ್‌ನ ಮಾರುಕಟ್ಟೆ ಬಂಡವಾಳ ಮೌಲ್ಯ 10,319.06 ಕೋಟಿ ನಷ್ಟಗೊಂಡು 8 ಲಕ್ಷ 09 ಸಾವಿರದ 126.71 ಕೋಟಿಗೆ ಕುಸಿದಿದೆ ಮತ್ತು ಎಚ್‌ಡಿಎಫ್‌ಸಿ ಬಂಡವಾಳ ಮೌಲ್ಯವು 5,162.75 ಕೋಟಿ ಇಳಿದು, 4 ಲಕ್ಷದ 10 ಸಾವಿರದ 062.89 ಕೋಟಿಗೆ ಇಳಿದಿದೆ.

ಹಿಂದೂಸ್ತಾನ್ ಯೂನಿಲಿವರ್ ಲಿಮಿಟೆಡ್ (ಎಚ್‌ಯುಎಲ್) ಮಾರುಕಟ್ಟೆ ಮೌಲ್ಯಮಾಪನ 1,515.37 ಕೋಟಿ ರುಪಾಯಿ ಇಳಿದು, 4 ಲಕ್ಷದ 86 ಸಾವಿರದ 617.28 ಕೋಟಿಗೆ ಮತ್ತು ಎಚ್‌ಡಿಎಫ್‌ಸಿ ಬ್ಯಾಂಕ್ 1,068.34 ಕೋಟಿ ಇಳಿಯಾಗಿದ್ದು 6 ಲಕ್ಷದ 66 ಸಾವಿರದ 914.4 ಕೋಟಿಗೆ ತಲುಪಿದೆ.