Small Saving Schemes: ಸೆಪ್ಟೆಂಬರ್ 30ರ ಒಳಗೆ ಸಣ್ಣ ಉಳಿತಾಯ ಯೋಜನೆ ಫ್ರೀಜ್, ಯಾಕೆ?

ನೀವು ಸರ್ಕಾರಿ ಬೆಂಬಲಿತ ಉಳಿತಾಯ ಯೋಜನೆಗಳು ಅಥವಾ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಖಾತೆಯನ್ನು ಹೊಂದಿದ್ದರೆ, ಈ ತಿಂಗಳ ಅಂತ್ಯದ ಮೊದಲು ನಿಮ್ಮ ಖಾತೆಗೆ 12-ಅಂಕಿಯ ಬಯೋಮೆಟ್ರಿಕ್ ಆಧಾರ್ ಕಾರ್ಡ್ ಅನ್ನು ಲಿಂಕ್ ಮಾಡುವುದು ಮುಖ್ಯವಾಗುತ್ತದೆ. ನೀವು ಲಿಂಕ್ ಮಾಡದಿದ್ದರೆ ನಿಮ್ಮ ಖಾತೆಯೇ ಫ್ರೀಜ್ ಆಗಲಿದೆ.

ಹಣಕಾಸು ಸಚಿವಾಲಯದ ಅಧಿಸೂಚನೆಯ ಪ್ರಕಾರ, ಆಧಾರ್ ಅನ್ನು ಸಲ್ಲಿಸದಿದ್ದರೆ ಅಥವಾ ಸಣ್ಣ ಉಳಿತಾಯ ಯೋಜನೆಗಳಿಗೆ ಲಿಂಕ್ ಮಾಡದಿದ್ದರೆ, ನಿಮ್ಮ ಖಾತೆಗಳನ್ನು ಸೆಪ್ಟೆಂಬರ್ 30, 2023 ರೊಳಗೆ ಫ್ರೀಜ್ ಮಾಡಲಾಗುತ್ತದೆ. ಅಲ್ಲದೆ, ಮಾರ್ಗಸೂಚಿಗಳ ಪ್ರಕಾರ ಸೂಚಿಸಲಾದ ನಿರ್ದಿಷ್ಟ ಮಿತಿಯಲ್ಲಿ ಈ ಯೋಜನೆಗಳಲ್ಲಿ ಹೂಡಿಕೆ ಮಾಡುವವರು ತಮ್ಮ ಮಾನ್ಯವಾದ ಪ್ಯಾನ್ ಅನ್ನು ಸಹ ಸಲ್ಲಿಸಬೇಕು.

ಜನಪ್ರಿಯ ಸಣ್ಣ ಉಳಿತಾಯ ಯೋಜನೆಗಳು

ಅಂಚೆ ಕಚೇರಿ ಉಳಿತಾಯ ಖಾತೆಗಳು (ಎಸ್‌ಬಿ), 5-ವರ್ಷದ ಅಂಚೆ ಕಚೇರಿ ರೆಕ್ಯೂರಿಂಗ್ ಡೆಪಾಸಿಟ್ ಅಕೌಂಟ್ (ಆರ್‌ಡಿ), 1-ವರ್ಷದಿಂದ 5-ವರ್ಷದ ಅಂಚೆ ಕಚೇರಿ ಟೈಮ್ ಡೆಪಾಸಿಟ್, ಅಂಚೆ ಕಚೇರಿ ಮಾಸಿಕ ಆದಾಯ ಯೋಜನೆ ಖಾತೆಗಳು (ಎಂಐಎಸ್), ಹಿರಿಯ ನಾಗರಿಕರ ಉಳಿತಾಯ ಯೋಜನೆ ( ಎಸ್‌ಸಿಎಸ್‌ಎಸ್), 15 ವರ್ಷಗಳ ಸಾರ್ವಜನಿಕ ಭವಿಷ್ಯ ನಿಧಿ ಖಾತೆ (ಪಿಪಿಎಫ್), ಸುಕನ್ಯಾ ಸಮೃದ್ಧಿ ಖಾತೆಗಳು, ಕಿಸಾನ್ ವಿಕಾಸ್ ಪತ್ರ, ಮಹಿಳಾ ಸಮ್ಮಾನ್ ಉಳಿತಾಯ ಪ್ರಮಾಣಪತ್ರ ಕೆಲವು ಜನಪ್ರಿಯ ಸಣ್ಣ ಉಳಿತಾಯ ಯೋಜನೆಗಳಾಗಿದೆ.

Aadhaar, PAN Mandatory: ಗಮನಿಸಿ, ಈ ಯೋಜನೆಗಳಿಗೆ ಆಧಾರ್, ಪ್ಯಾನ್ ಕಾರ್ಡ್ ಕಡ್ಡಾಯ
ಏಪ್ರಿಲ್ 1, 2023 ರಿಂದ ಜಾರಿಗೆ ಬರುವಂತೆ, ಈ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಲು ಈಗ ಪ್ಯಾನ್ ಮತ್ತು ಆಧಾರ್ ಸಂಖ್ಯೆಗಳ ಅಗತ್ಯವಿದೆ ಎಂದು ಹಣಕಾಸು ಸಚಿಲವಾಯವು ಮೊದಲೇ ಸೂಚಿಸಿದೆ. ಈ ನೂತನ ಪ್ರಕ್ರಿಯೆಯು ನಿಮ್ಮ ಗ್ರಾಹಕರನ್ನು ತಿಳಿದುಕೊಳ್ಳಿ (ಕೆವೈಸಿ) ಪ್ರಕ್ರಿಯೆಯ ಭಾಗವಾಗಿದೆ.

ಈ ಹಿಂದೆ, ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆಯನ್ನು ಮಾಡಲು ಬಯಸುವವರು ನಿಮ್ಮ ಆಧಾರ್ ವಿವರಗಳನ್ನು ಸಲ್ಲಿಸುವ ಅಗತ್ಯವಿರಲಿಲ್ಲ. ಆದರೂ ಒಬ್ಬ ವ್ಯಕ್ತಿಯು ಏಪ್ರಿಲ್ 1, 2023 ರಿಂದ ಸರ್ಕಾರಿ ಬೆಂಬಲಿತ ಸಣ್ಣ ಉಳಿತಾಯ ಯೋಜನೆಗಳಲ್ಲಿ ಹೂಡಿಕೆ ಮಾಡಲು ಕನಿಷ್ಠ ತನ್ನ ಆಧಾರ್ ನೋಂದಣಿ ಸಂಖ್ಯೆಯನ್ನು ಸಲ್ಲಿಸುವ ಅಗತ್ಯವಿದೆ.

ಆದರೆ ಆಧಾರ್ ಸಂಖ್ಯೆ ಅಥವಾ ಆಧಾರ್ ನೋಂದಣಿ ಸಂಖ್ಯೆಯನ್ನು ಸೆಪ್ಟೆಂಬರ್ 30, 2023 ರ ಅಂತ್ಯದ ಮೊದಲು ಸಲ್ಲಿಸದಿದ್ದರೆ, ಅಸ್ತಿತ್ವದಲ್ಲಿರುವ ಗ್ರಾಹಕರ ಸಣ್ಣ ಉಳಿತಾಯ ಖಾತೆಯನ್ನು ಅಕ್ಟೋಬರ್ 1, 2023 ರಿಂದ ಫ್ರೀಜ್ ಮಾಡಲಾಗುತ್ತದೆ.

ಹೊಸ ಚಂದಾದಾರರು ಅವನು ಅಥವಾ ಅವಳು ಆಧಾರ್ ಸಂಖ್ಯೆ ಇಲ್ಲದೆ ಸಣ್ಣ ಉಳಿತಾಯ ಯೋಜನೆಯಲ್ಲಿ ಖಾತೆಯನ್ನು ತೆರೆಯುತ್ತಿದ್ದರೆ, ಅವರು ಖಾತೆಯನ್ನು ತೆರೆದ ದಿನಾಂಕದಿಂದ ಆರು ತಿಂಗಳೊಳಗೆ ಆಧಾರ್ ಸಂಖ್ಯೆಯನ್ನು ಒದಗಿಸಬೇಕು. ಆಧಾರ್ ವಿವರವನ್ನು ನೀಡದಿದ್ದರೆ, ಖಾತೆ ತೆರೆದ ಆರು ತಿಂಗಳ ನಂತರ ಅವರ ಸಣ್ಣ ಉಳಿತಾಯ ಖಾತೆಯನ್ನು ಫ್ರೀಜ್ ಮಾಡಲಾಗುತ್ತದೆ.

ನೀವು ಹೊಸ ಚಂದಾದಾರರಾಗಿದ್ದರೆ ಮತ್ತು ಏಪ್ರಿಲ್ 1 ರಂದು ನಿಮ್ಮ ಖಾತೆಯನ್ನು ತೆರೆದಿದ್ದರೆ, ಆರು ತಿಂಗಳೊಳಗೆ ನಿಮ್ಮ ಆಧಾರ್ ಸಂಖ್ಯೆಯನ್ನು ಸಲ್ಲಿಸಲು ವಿಫಲವಾದರೆ, ನಿಮ್ಮ ಖಾತೆಯನ್ನು ಅಕ್ಟೋಬರ್ 1, 2023 ರಿಂದ ಫ್ರೀಜ್ ಮಾಡಲಾಗುತ್ತದೆ. ಸಣ್ಣ ಉಳಿತಾಯ ಖಾತೆಗಳನ್ನು ಮಕ್ಕಳು ಅಥವಾ ಅಪ್ರಾಪ್ತರ ಹೆಸರಿನಲ್ಲಿ ತೆರೆದರೂ ಸಹ ಆಧಾರ್ ಕಡ್ಡಾಯವಾಗಿದೆ.

ಇದಲ್ಲದೆ, ಹೊಸ ಚಂದಾದಾರರು ತಮ್ಮ ಉಳಿತಾಯ ಖಾತೆಗಳನ್ನು ತೆರೆಯುವಾಗ ಪ್ಯಾನ್ ಸಂಖ್ಯೆಗಳನ್ನು ನೀಡುವುದನ್ನು ಸಚಿವಾಲಯವು ಕಡ್ಡಾಯಗೊಳಿಸಿದೆ. ಖಾತೆ ತೆರೆಯುವ ಸಮಯದಲ್ಲಿ ಹೊಸ ಚಂದಾದಾರರು ತಮ್ಮ ಪ್ಯಾನ್ ಸಂಖ್ಯೆಯನ್ನು ಸಲ್ಲಿಸದಿದ್ದರೆ, ಅವರು ಖಾತೆಯನ್ನು ತೆರೆದ ಎರಡು ತಿಂಗಳೊಳಗೆ ಅದನ್ನು ಸಲ್ಲಿಸಬೇಕು. ಗಡುವಿನೊಳಗೆ ಪ್ಯಾನ್ ವಿವರಗಳನ್ನು ಸಲ್ಲಿಸದಿದ್ದಲ್ಲಿ ಅವರ ಖಾತೆಗಳನ್ನು ಸ್ಥಗಿತಗೊಳಿಸಲಾಗುತ್ತದೆ.

ಅಸ್ತಿತ್ವದಲ್ಲಿರುವ ಚಂದಾದಾರರು ಸಣ್ಣ ಉಳಿತಾಯ ಖಾತೆಯ ಬ್ಯಾಲೆನ್ಸ್ 50,000 ರೂಪಾಯಿಗಿಂತ ಅಧಿಕವಾಗಿದ್ದರೆ, ಉಳಿತಾಯ ಖಾತೆಯಿಂದ ಒಂದು ತಿಂಗಳಲ್ಲಿ ಎಲ್ಲಾ ವರ್ಗಾವಣೆಗಳು ಮತ್ತು ಹಿಂಪಡೆಯುವಿಕೆಗಳ ಒಟ್ಟು ಮೊತ್ತವು 10,000 ರೂಪಾಯಿ ಆಗಿದ್ದು, ಕೊನೆಯದಾಗಿ ಆಯಾ ಹಣಕಾಸು ವರ್ಷದಲ್ಲಿ ಉಳಿತಾಯ ಖಾತೆಯಲ್ಲಿನ ಒಟ್ಟು ಕ್ರೆಡಿಟ್‌ಗಳು 1 ಲಕ್ಷ ರೂಪಾಯಿ ಮೀರಿದಾಗ ತಮ್ಮ ಪ್ಯಾನ್ ಅನ್ನು ಸಲ್ಲಿಸಬೇಕಾಗುತ್ತದೆ.