ಈ ವಿಲಕ್ಷಣ ಕೆಲಸಗಳ ಬಗ್ಗೆ ಕೇಳಿ ತಮಾಷೆ ಅಂದುಕೊಳ್ಳಬೇಡಿ
ಕೆಲವು ಉದ್ಯೋಗಗಳ ಬಗ್ಗೆ ಹೇಳಿದರೆ, ಸುಮ್ಮನೆ ತಮಾಷೆ ಮಾಡಬೇಡಿ ಅಂತಲೇ ಹೇಳಬೇಕು ಹಾಗಿರುತ್ತವೆ. ಅದರಲ್ಲೂ ಕೊರೊನಾ ಕಾರಣಕ್ಕೆ ಕೆಲಸ ಸಿಗದೆ ಪರದಾಟ ಆಗಿರುವ ಕಾಲಘಟ್ಟದಲ್ಲಿ ಈ ಬಗ್ಗೆ ಹೇಳಿದರೆ ನಂಬುವುದು ಸಹ ಕಷ್ಟ ಬಿಡಿ. ಆದರೆ ಕೊರೊನಾ ತೊಲಗಿ, ಮುಂಚಿನಂತೆಯೇ ಎಲ್ಲ ಸರಿಹೋದಲ್ಲಿ ಈ ಕೆಲಸಗಳು ಸಿಗಬಹುದು. ಅಂಥ ವಿಚಿತ್ರ ಕೆಲಸಗಳ ಬಗ್ಗೆ ತಿಳಿಯಲು ಮುಂದೆ ಓದಿ.
ಹೋಟೆಲ್ ಗಳ ರೂಮ್ ಗಳಲ್ಲಿ ರಾತ್ರಿ ಹೊತ್ತು ಮಲಗುವುದಕ್ಕೆ ತಿಂಗಳಲ್ಲಿ ಒಮ್ಮೆಯೋ ಅಥವಾ ನಿಯಮಿತವಾಗಿ ಮ್ಯಾನೇಜರ್ ಗೋ ಅಥವಾ ಯಾರಾದರೂ ಸಿಬ್ಬಂದಿಗೋ ನಿಯೋಜನೆ ಮಾಡಲಾಗುತ್ತದೆ. ಅವರ ಕೆಲಸ ಏನೆಂದರೆ, ಹೋಟೆಲ್ ರೂಮ್ ಗೆ ರಾತ್ರಿ ಹೋಗಿ ಮಲಗಬೇಕು, ಬೆಳಗ್ಗೆ ಎದ್ದು ಹೋಗಬೇಕು.
ಹೋಟೆಲ್ ಟೆಸ್ಟರ್
ಹ್ಞಾಂ, ಅಷ್ಟಕ್ಕೇ ನಿಲ್ಲಲ್ಲ. ಈ ವೇಳೆ ಅಲ್ಲಿನ ಸೇವೆ ಹೇಗಿದೆ, ಇನ್ನೂ ಚೆನ್ನಾಗಿ ಆಗಬೇಕಾದ್ದು ಏನು ಇತ್ಯಾದಿ ವಿಚಾರಗಳನ್ನು ತಿಳಿಸಬೇಕು. ಆದರೆ ಕೆಲವು ಹೋಟೆಲ್ ನವರು ತಮ್ಮದೇ ಸಿಬ್ಬಂದಿಯನ್ನು ಇದಕ್ಕೆ ನಿಯೋಜನೆ ಮಾಡಿದರೆ, ಕೆಲವು ಕಡೆ ಹೊರಗಿನವರನ್ನು ನೇಮಿಸಲಾಗುತ್ತದೆ. ಅಂಥವರನ್ನು 'ಹೋಟೆಲ್ ಟೆಸ್ಟರ್' ಎನ್ನಲಾಗುತ್ತದೆ. ಅವರು ರೂಮ್ ನಲ್ಲಿ ತಂಗಿದ್ದು, ಮರು ದಿನ ತಮ್ಮ ವಿಮರ್ಶೆ ದಾಖಲಿಸುತ್ತಾರೆ.
ರೈಲಿನೊಳಗೆ ಜನರನ್ನು ನೂಕಬೇಕು
ಇನ್ನು ಜಪಾನ್ ನಲ್ಲಿ ಇರುವ ಕೆಲಸ ಇದು. ಅಲ್ಲಿ ರೈಲುಗಳ ತುಂಬ ಬಾಗಿಲು ಸಹ ಹಾಕಲು ಸಾಧ್ಯವಿಲ್ಲದಷ್ಟು ಜನ ಕಿಕ್ಕಿರಿದು ಇರುತ್ತಾರೆ. ಅಂಥ ರೈಲುಗಳಲ್ಲಿ ಪ್ರಯಾಣಿಕರು ಬಾಗಿಲ ಬಳಿ ನಿಲ್ಲದಂತೆ ಒಳಗೆ ನೂಕುವುದಕ್ಕೆ ಅಂತಲೇ ಸಿಬ್ಬಂದಿ ನೇಮಿಸಲಾಗುತ್ತದೆ. ಜನರನ್ನು ಬಾಗಿಲ ಬಳಿಯಿಂದ ಒಳಗೆ ನೂಕುವುದೇ ಈ ಸಿಬ್ಬಂದಿ ಕೆಲಸ.
ನಾಯಿಗಳ ಆಹಾರದ ರುಚಿ ಪರೀಕ್ಷೆ
ನಾಯಿಗಳಿಗೆ ಆಹಾರ ಸಿದ್ಧಪಡಿಸುವ ಕಂಪೆನಿಗಳು ಉತ್ಪನ್ನಗಳ ರುಚಿ ಪರಿಶೀಲನೆಗೆ ಅಂತಲೇ ಜನರನ್ನು ನೇಮಿಸುತ್ತದೆ. ನಾಯಿ ಆಹಾರವನ್ನು ಅವರು ರುಚಿ ನೋಡಬೇಕಾಗುತ್ತದೆ. ಸ್ವತಃ ತಾವೇ ಆ ಆಹಾರದ ರುಚಿ ನೋಡಿ, ಅದು ಹೇಗಿದೆ ಎಂದು ತಿಳಿಸಬೇಕಾಗುತ್ತದೆ. ಇದು ಕಷ್ಟವೇ ಅಲ್ಲವಾ? ಆದರೂ ಈ ಕೆಲಸ ಇದೆ.
ಹಾವಿನ ವಿಷ ಸಂಗ್ರಹಿಸಬೇಕು
ಹಾವುಗಳಿಂದ ವಿಷವನ್ನು ಸಂಗ್ರಹಿಸುವುದು ಸುಲಭದ ಕೆಲಸ ಅಲ್ಲ. ಆದರೆ ಕೆಲವರು ಈ ಕೆಲಸಕ್ಕಾಗಿಯೇ ನೇಮಕವಾಗಿರುತ್ತಾರೆ. ಒಂದು ಜಾರ್ ನಲ್ಲಿ ಹಾವಿನ ವಿಷವನ್ನು ಅವರು ಸಂಗ್ರಹಿಸಬೇಕು. ಈ ಹಾವಿನ ವಿಷವನ್ನು ಹಲವು ಬಗೆಯ ಔಷಧ ತಯಾರಿಕೆಗಾಗಿಯೇ ಬಳಸಿಕೊಳ್ಳಲಾಗುತ್ತದೆ.