ಸವರನ್ ಗೋಲ್ಡ್ ಬಾಂಡ್ 2021: ಪ್ರತಿ ಗ್ರಾಂಗೆ 4,777 ರೂಪಾಯಿ ಬೆಲೆ ನಿಗದಿ
2021ರ ಸವರನ್ ಗೋಲ್ಡ್ ಬಾಂಡ್ ಯೋಜನೆಯ ವಿತರಣಾ ಬೆಲೆ ನಿಗದಿಯಾಗಿದ್ದು ಪ್ರತಿ ಗ್ರಾಂಗೆ 4,777 ರೂಪಾಯಿ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಶುಕ್ರವಾರ ತಿಳಿಸಿದೆ.
ಮೇ 17ರಿಂದ ಐದು ದಿನಗಳ ಕಾಲ ಚಂದಾದಾರಿಕೆಗಾಗಿ ತೆರಯಲಿರುವ ಸವರನ್ ಗೋಲ್ಡ್ ಬಾಂಡ್ ಹೆಚ್ಚಿನ ಹೂಡಿಕೆಯ ನಿರೀಕ್ಷೆಯನ್ನು ಹೊಂದಿದ್ದು, ಒಟ್ಟು ಆರು ಕಂತುಗಳಲ್ಲಿ ನೀಡಲಾಗುವುದು.
ಕೇಂದ್ರ ಸರ್ಕಾರವು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ)ನೊಂದಿಗೆ ಸಮಾಲೋಚಿಸಿ ಸವರನ್ ಗೋಲ್ಡ್ ಬಾಂಡ್ಗಳನ್ನು ವಿತರಿಸಲು ನಿರ್ಧರಿಸಿದೆ. ಮೇ 17 ರಿಂದ ಮೊದಲ ಕಂತು ಬಿಡುಗಡೆಯಾಗಲಿದ್ದು, ಮೇ 25 ರಂದು ಬಾಂಡ್ಗಳನ್ನು ನೀಡಲಾಗುತ್ತದೆ. ನಂತರ ಎರಡನೇ ಕಂತು ಮೇ 24ರಿಂದ 28ರವರೆಗೆ ವಿತರಣೆಯಾಗಲಿದೆ.
ಇನ್ನು ಮೂರನೇ ಚಂದಾದಾರಿಕೆ ದಿನಾಂಕವು ಮೇ 31ರಿಂದ ಜೂನ್ 04ರವರೆಗಿದ್ದು, ನಾಲ್ಕನೇ ಸಿರೀಸ್ ಜುಲೈ 12 ರಿಂದ 16ರವರೆಗೆ ನಿಗದಿಯಾಗಿದೆ. ನಂತರದಲ್ಲಿ ಐದನೇ ಚಂದಾದಾರಿಕೆಯು ಆಗಸ್ಟ್ 09ರಿಂದ 13ರವರೆಗೆ ಹಾಗೂ ಆರನೇ ಅಥವಾ ಅಂತಿಮ ಸಿರೀಸ್ ಆಗಸ್ಟ್ 30ರಿಂದ ಸೆಪ್ಟೆಂಬರ್ 03ರವರೆಗೆ ಚಂದಾದಾರಿಕೆಯ ದಿನಾಂಕ ಪ್ರಕಟಿಸಲಾಗಿದೆ.
ಆರ್ಬಿಐಯೊಂದಿಗೆ ಸಮಾಲೋಚಿಸಿ, ಆನ್ಲೈನ್ನಲ್ಲಿ ಅರ್ಜಿ ಸಲ್ಲಿಸುವ ಹೂಡಿಕೆದಾರರಿಗೆ ನಾಮಮಾತ್ರ ಮೌಲ್ಯಕ್ಕಿಂತ ಕಡಿಮೆ ಪ್ರತಿ ಗ್ರಾಂಗೆ 50 ರೂಪಾಯಿ ರಿಯಾಯಿತಿ ನೀಡಲು ಸರ್ಕಾರ ನಿರ್ಧರಿಸಿದೆ ಮತ್ತು ಅರ್ಜಿಯ ವಿರುದ್ಧ ಪಾವತಿಯನ್ನು ಡಿಜಿಟಲ್ ಮೋಡ್ ಮೂಲಕ ಮಾಡಲಾಗುತ್ತದೆ.