ಇ-ಕಾಮರ್ಸ್ ವ್ಯಾಪಾರದಲ್ಲಿ ಬೃಹತ್ ಹೂಡಿಕೆ ಮಾಡುತ್ತಿದೆ ಟಾಟಾ !
ಭಾರತದಲ್ಲಿ ಇ -ಕಾಮರ್ಸ್ ಬೆಳವಣಿಗೆ ಕಂಡ ವೇಗ ಎಂತವರನ್ನೂ ಕೂಡ ಅಚ್ಚರಿಗೆ ತಳ್ಳುತ್ತದೆ . ಕೋವಿಡ್ ಗೆ ಮೊದಲೇ ಭಾರತೀಯರಾದ ನಾವು ಬಹಳಷ್ಟು ವಸ್ತುಗಳನ್ನ ಆನ್ಲೈನ್ ಮೂಲಕ ತರಿಸಿ ಕೊಳ್ಳುವುದಕ್ಕೆ ಒಗ್ಗಿಕೊಂಡಿದ್ದೆವು . ಕೋವಿಡ್ ನಮ್ಮನ್ನ ಮನೆಯಿಂದ ಹೊರ ಹೋಗದೆ ಬೇಕಾದ ಎಲ್ಲಾ ವಸ್ತುಗಳನ್ನ ಮನೆಯ ಬಾಗಿಲಿಗೆ ತಲುಪಿಸುವ ವ್ಯವಸ್ಥೆಯನ್ನ ಸೃಷ್ಟಿಸಿದೆ. ಕೋವಿಡ್ ಕಾಲಘಟ್ಟದಲ್ಲಿ ಬೇರೆ ಬೇರೆ ಕ್ಷೇತ್ರಗಳು ಸಾಕಷ್ಟು ನಷ್ಟವನ್ನ ಅನುಭವಿಸಿದ್ದವು . ಆದರೆ ಇ -ಕಾಮರ್ಸ್ ಕ್ಷೇತ್ರ ಮಾತ್ರ ವೇಗವಾಗಿ ಬೆಳೆಯಿತು. ಅಮೆಜಾನ್ ಭಾರತದಲ್ಲಿ ಊರಿದ್ದ ಕಾಲು ಇನ್ನಷ್ಟು ಭದ್ರವಾಯ್ತು.
ಆಮೆರಿಕಾದ ಸಂಸ್ಥೆಯೊಂದು ಭಾರತದಲ್ಲಿ ಈ ಮಟ್ಟಿಗೆ ಮಾರುಕಟ್ಟೆ ಪಾರುಪತ್ಯವನ್ನ ಗಳಿಸಲು ಸಾಧ್ಯವಾದರೆ , ದೇಶಿ ಸಂಸ್ಥೆಗಳಿಂದ ಏಕೆ ಸಾಧ್ಯವಿಲ್ಲ ? ಈ ನಿಟ್ಟಿನಲ್ಲಿ ನೋಡಿದರೆ ಭಾರತದ ದೈತ್ಯ ಟಾಟಾ ಈ ಕ್ಷೇತ್ರಕ್ಕೆ ಹೊಸ ಆಟಗಾರ ಎನ್ನಬಹುದು. ಟಾಟಾ ಈ ಕ್ಷೇತ್ರಕ್ಕೆ ಏಕೆ ಹೆಚ್ಚಿನ ಒಲವು ತೋರಿಸಲಿಲ್ಲ ಎನ್ನುವುದು ಯಕ್ಷ ಪ್ರಶ್ನೆ. ನಿಧಾನವಾದರೂ ಸರಿಯೇ ಟಾಟಾ ಇದೀಗ ಇ ಕಾಮರ್ಸ್ ಕ್ಷೇತ್ರಕ್ಕೆ ಕಾಲಿಟ್ಟಿದೆ.
ಟಾಟಾ ಡಿಜಿಟಲ್ 5025 ಕೋಟಿ ರೂಪಾಯಿ ಹಣವನ್ನ ಹೂಡಿಕೆಯಾಗಿ ಪಡೆದಿದೆ. ಟಾಟಾ ಯುನಿಸ್ಟೋರ್ಸ್ 102 ಕೋಟಿ ರೂಪಾಯಿಯನ್ನ ಹೂಡಿಕೆ ರೂಪದಲ್ಲಿ ಪಡೆದುಕೊಂಡಿದೆ. ಟಾಟಾ ಡಿಜಿಟಲ್ ಮುಂಬರುವ ದಿನಗಳಲ್ಲಿ ಇ -ಗ್ರೋಸರ್ , ಬಿಗ್ ಬಾಸ್ಕೆಟ್ ಮತ್ತು ಡಿಜಿಟಲ್ ಹೆಲ್ತ್ ಕಂಪನಿ ಯಂತಹ ಸಂಸ್ಥೆಗಳ ಮೇಲಿನ ಹಿಡಿತ ಹೊಂದುವಷ್ಟು ಷೇರುಗಳನ್ನ ಖರೀದಿಸುವ ಸಿದ್ಧತೆಯಲ್ಲಿದೆ.
ಟಾಟಾ ಯುನಿಸ್ಟೋರ್ಸ್ ಒಟ್ಟು ಸಾವಿರ ಕೋಟಿ ರೂಪಾಯಿಯನ್ನ ಮಾರುಕಟ್ಟೆಯಿಂದ ಎತ್ತುವ ಉತ್ಸಾಹದಲ್ಲಿದೆ. ಉಪ್ಪಿನಿಂದ ಸಿಮೆಂಟು , ಸ್ಟೀಲ್ ನವರೆಗೆ , ಸಾಫ್ಟ್ವೇರ್ ನಿಂದ ಐಷಾರಾಮಿ ಜೀಪು , ಕಾರು ಮಾರುವವರೆಗೆ ಟಾಟಾ ಭಾರತದಲ್ಲಿ ಅತ್ಯಂತ ವಿಶ್ವಾಸ ಗಳಿಸಿರುವ ಬ್ರಾಂಡ್ . ಆದರೆ ಇ -ಕಾಮರ್ಸ್ ವಿಷಯದಲ್ಲಿ ಮಾತ್ರ ಅದೇಕೋ ತಮ್ಮ ಛಾಪನ್ನ ಒತ್ತುವುದರಲ್ಲಿ ಆಸಕ್ತಿ ತೋರಿಸಿರಲಿಲ್ಲ.
ಸೋನಿ ಇಂಡಿಯಾ ಜೊತೆಗೆ ವಿಲೀನಗೊಳ್ಳಲಿದೆ ಜೀ ಎಂಟರ್ಟೈನ್ಮೆಂಟ್: ಜೀ ಷೇರು 20% ಜಿಗಿತ
ಇದೀಗ ಐದು ಸಾವಿರ ಕೋಟಿಗೂ ಮೀರಿದ ಬಂಡವಾಳವನ್ನ ಇ-ಕಾಮರ್ಸ್ ಕ್ಷೇತ್ರದಲ್ಲಿ ಟಾಟಾ ಹೂಡಿಕೆ ಮಾಡಿರುವುದು ಎರಡು ವಿಷಯವನ್ನ ಸ್ಪಷ್ಟವಾಗಿಸಿದೆ. ಮೊದಲನೆಯದಾಗಿ ಇ -ಕಾಮರ್ಸ್ ಕ್ಷೇತ್ರಕ್ಕೆ ಮುಂದಿನ ದಿನಗಳಲ್ಲಿ ಹೆಚ್ಚಿನ ಭವಿಷ್ಯವಿದೆ, ಎರಡನೆಯದಾಗಿ ಟಾಟಾ ಈ ಕ್ಷೇತ್ರದಲ್ಲೂ ತನ್ನ ಗುರುತನ್ನ ಮೂಡಿಸಲು ಸಿದ್ಧವಾಗಿದೆ.
ಇದೆ ಏಪ್ರಿಲ್ 2021 ರಲ್ಲಿ ಟಾಟಾ ಡಿಜಿಟಲ್ ತನ್ನ ಆಥೋರೈಸ್ಡ್ ಶೇರ್ ಕ್ಯಾಪಿಟಲ್ 1000 ಕೋಟಿಯಿಂದ 11,000 ಕೋಟಿಗೆ ಏರಿಕೆಯನ್ನ ಮಾಡಿಸಿದೆ . ಟಾಟಾ ಯುನಿಸ್ಟೋರ್ ಕ್ಯಾಪಿಟಲ್ 1500 ರಿಂದ 5000 ಕೋಟಿಗೆ ಏರಿಕೆಯಾಗಿದೆ. ಟಾಟಾ ಇ -ಕಾಮರ್ಸ್ ಕ್ಷೇತ್ರವನ್ನ ಬಹಳ ಗಂಭೀರವಾಗಿ ಪರಿಗಣಿಸಿದೆ. ಹೀಗಾಗಿ ಮುಂಬರುವ ದಿನಗಳಲ್ಲಿ ಗ್ರಾಹಕನಿಗೆ ಇನ್ನಷ್ಟು ಆಯ್ಕೆಗಳು ಸಿಗಲಿವೆ.