ಕಡಿಮೆ ಬೆಲೆಗೆ ಸಿಗಲಿದೆ ಹೆಚ್ಚು ಚಾನೆಲ್: ಟ್ರಾಯ್ ನಿಯಮದಲ್ಲಿ ಬದಲಾವಣೆ

ಕೇಬಲ್ ಟಿವಿ ಗ್ರಾಹಕರಿಗೆ ದೂರ ಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಹೊಸ ವರ್ಷದ ಆರಂಭದಲ್ಲೇ ಗುಡ್‌ ನ್ಯೂಸ್ ನೀಡಿದೆ. ತನ್ನ ನಿಯಮಗಳಲ್ಲಿ ಹಲವು ಬದಲಾವಣೆಗಳನ್ನು ತರಲು ಮುಂದಾಗಿದ್ದು, ಇನ್ಮುಂದೆ ಕಡಿಮೆ ಬೆಲೆಗೆ ಹೆಚ್ಚು ಚಾನೆಲ್‌ ಲಭ್ಯವಾಗಲಿವೆ.

2020 ಮಾರ್ಚ್‌ 1ರಿಂದ ಅನ್ವಯವಾಗುವಂತೆ ಟ್ರಾಯ್ ಹೊಸ ನಿಯಮಗಳನ್ನು ಜಾರಿಗೆ ತರಲು ಮುಂದಾಗಿದ್ದು, ಗ್ರಾಹಕರು ಕಡಿಮೆ ಹಣ ಪಾವತಿಸಿ ಹೆಚ್ಚು ಚಾನೆಲ್ ಪಡೆಯಬಹುದಾಗಿದೆ. ಕೇಬಲ್ ದರಗಳು ಜಾಸ್ತಿ ಎಂಬ ದೂರಿನ ಹಿನ್ನೆಲೆಯಲ್ಲಿ ಈ ಬದಲಾವಣೆ ತರಲು ಮುಂದಾಗಿದೆ.

160 ರುಪಾಯಿಗೆ ಎಲ್ಲಾ ಉಚಿತ ಚಾನೆಲ್‌ಗಳು

ಟ್ರಾಯ್ ಹೊಸ ನಿಯಮದ ಪ್ರಕಾರ ಗ್ರಾಹಕರು 160 ರುಪಾಯಿ (ತೆರಿಗೆ ಬಿಟ್ಟು) ಪಾವತಿಸಿದರೆ ಅದಕ್ಕೆ ಲಭ್ಯವಿರುವ ಎಲ್ಲಾ ಉಚಿತ ಚಾನೆಲ್‌ಗಳನ್ನು ನೀಡಬೇಕು. ಈ ಮೂಲಕ ಕಡಿಮೆ ಹಣ ಪಾವತಿಸಿ ಹೆಚ್ಚಿನ ಚಾನೆಲ್‌ಗಳನ್ನು ಪಡೆಯಲು ಸಾಧ್ಯವಾಗುತ್ತದೆ. ಜನವರಿ 15 ರೊಳಗೆ ಕೇಬಲ್ ಟಿವಿ ಪ್ರಸಾರಕರು ಟ್ರಾಯ್ ಹೊಸ ನಿಯಮದನ್ವಯ ದರಗಳನ್ನು ತಮ್ಮ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಿಬೇಕು. ಆದರೆ ಈ ನಿಯಮಗಳು ಮಾರ್ಚ್ 1ರಿಂದ ಜಾರಿಗೆ ಬರಲಿವೆ.

200 ಚಾನೆಲ್‌ಗಳು ಫ್ರೀ

ಟ್ರಾಯ್ ಹೊಸ ನಿಯಮದ ಪ್ರಕಾರ ಗ್ರಾಹಕರು 153 ರುಪಾಯಿ (ತೆರಿಗೆ ಸೇರಿ) ಪಾವತಿಸಿದರೆ ಕನಿಷ್ಠ 200 ಚಾನೆಲ್‌ಗಳನ್ನು ಉಚಿತವಾಗಿ ನೀಡುವುದು ಕಡ್ಡಾಯವಾಗಿದೆ. ಕಡ್ಡಾಯವಾಗಿ ಪ್ರಸಾರ ಮಾಡಬೇಕು ಎಂದು ಕೇಂದ್ರ ಪ್ರಕಟಿಸಿದ್ದ 200 ಚಾನೆಲ್‌ಗಳು ಎಸ್‌ಸಿಎಫ್ ವ್ಯಾಪ್ತಿಗೆ ಬರುವುದಿಲ್ಲ. ಈ ಚಾನೆಲ್‌ಗಳನ್ನು ಹೊರತುಪಡಿಸಿ ಕೇಬಲ್ ಆಪರೇಟರ್‌ಗಳು 200 ಚಾನೆಲ್ ಉಚಿತವಾಗಿ ನೀಡಬೇಕಿದೆ.

130 ರುಪಾಯಿ ಎನ್‌ಸಿಎಫ್ ಶುಲ್ಕ

ಎನ್‌ಸಿಎಫ್ ಶುಲ್ಕ ಮಾರ್ಚ್‌ 1ರಿಂದ ಕಡಿಮೆ ಆಗಲಿದೆ. ಮಾಸಿಕ ಕಡ್ಡಾಯವಾಗಿ ಪಾವತಿ ಮಾಡಬೇಕಿರುವ ಎನ್‌ಸಿಎಫ್ ಶುಲ್ಕವನ್ನು 130 ರುಪಾಯಿಗೆ(ತೆರಿಗೆ ಬಿಟ್ಟು) ಸೀಮಿತಗೊಳಿಸಲಾಗಿದೆ. ಈ ಮೂಲಕ ತೆರಿಗೆ ಸೇರಿ 153 ರುಪಾಯಿ ಪಾವತಿಸಿದರೆ ಕೇಂದ್ರ ಸರ್ಕಾರದ ಕಡ್ಡಾಯ ಪ್ರಸಾರ ಮಾಡಬೇಕಿರುವ ಚಾನೆಲ್‌ಗಳು ಹೊರತುಪಡಿಸಿ 200 ಚಾನೆಲ್‌ಗಳು ಫ್ರೀ ಆಗಿ ಸಿಗಲಿದೆ.

ಒಂದಕ್ಕಿಂತ ಹೆಚ್ಚು ಕನೆಕ್ಷನ್‌ಗೆ ಗರಿಷ್ಠ 40 ಪರ್ಸೆಂಟ್ ಶುಲ್ಕ

ಕೇಬಲ್ ಗ್ರಾಹಕರು ಮನೆಯಲ್ಲಿ ಒಂದಕ್ಕಿಂತ ಹೆಚ್ಚು ಕನೆಕ್ಷನ್ ಹೊಂದಿದ್ದರೆ ಮೊದಲ ಕನೆಕ್ಷನ್‌ ಹೊರತುಪಡಿಸಿ ನಂತರ ಪಡೆಯುವ ಪ್ರತಿ ಕನೆಕ್ಷನ್‌ಗೆ ಗರಿಷ್ಠ 40 ಪರ್ಸೆಂಟ್ ಎನ್‌ಸಿಎಫ್ ಶುಲ್ಕವನ್ನು ಪಾವತಿಸಬೇಕಾಗುತ್ತದೆ. ಈ ಮೂಲಕ ಹೆಚ್ಚುವರಿ ಕನೆಕ್ಷನ್‌ಗೆ ಮೊದಲ ಕನೆಕ್ಷನ್‌ನಷ್ಟೇ ಹಣ ಪಾವತಿಸುವುದು ತಪ್ಪಲಿದೆ.