'ಹಲೋ ಇಸ್ರೇಲ್' ಎಂದವು ಯುಎಇ ಫೋನ್ ಗಳು

ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಇಸ್ರೇಲ್ ಮಧ್ಯೆ ಭಾನುವಾರದಿಂದ ಟೆಲಿಫೋನ್ ಸಂಪರ್ಕ ಆರಂಭವಾಗಿದೆ. ಕಳೆದ ವಾರ ಎರಡೂ ದೇಶಗಳ ಮಧ್ಯೆ ರಾಜತಾಂತ್ರಿಕ ಸಂಬಂಧ ಸಹಜ ಸ್ಥಿತಿಗೆ ಬಂದ ನಂತರ ಈ ಬೆಳವಣಿಗೆ ನಡೆದಿದೆ. ಯುಎಇ ಮತ್ತು ಇಸ್ರೇಲ್ ಮಧ್ಯೆ ಇದ್ದ ಟೆಲಿಫೋನ್ ಕರೆ ನಿರ್ಬಂಧವನ್ನು ನಿರ್ದಿಷ್ಟವಾಗಿ ಯಾವಾಗ ಮಾಡಲಾಗಿತ್ತು ಎಂಬ ಬಗ್ಗೆ ಮಾಹಿತಿ ಇಲ್ಲ. ಆದರೆ ಈ ಹಿಂದೆ ಕರೆ ಮಾಡಲು ಸಾಧ್ಯವಿರಲಿಲ್ಲ.

ಯುಎಇ ದೂರಸಂಪರ್ಕ ನಿಯಂತ್ರಕ ಪ್ರಾಧಿಕಾರದಿಂದ ಈ ಬಗ್ಗೆ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಇಸ್ರೇಲಿನ ಬಹುತೇಕ ನ್ಯೂಸ್ ವೆಬ್ ಸೈಟ್ ಗಳನ್ನು ಈ ಹಿಂದೆ ಯುಎಇಯಲ್ಲಿ ನಿರ್ಬಂಧಿಸಲಾಗಿತ್ತು. ಅದನ್ನು ಕೂಡ ಭಾನುವಾರದಿಂದ ಯುಎಇ ಇಂಟರ್ ನೆಟ್ ಸಂಪರ್ಕದೊಂದಿಗೆ ವೀಕ್ಷಿಸಬಹುದು.

ಯುಎಇ ಮತ್ತು ಇಸ್ರೇಲ್ ಮಧ್ಯೆ ರಾಜತಾಂತ್ರಿಕ ಸಂಬಂಧವನ್ನು ಸಹಜವಾಗಿ ನಡೆಸಿಕೊಂಡು ಹೋಗುವ ಬಗ್ಗೆ ಕಳೆದ ವಾರ ಎರಡೂ ದೇಶಗಳು ಘೋಷಣೆ ಮಾಡಿದವು. ಎರಡೂ ದೇಶಗಳ ಮಧ್ಯದ ಈ ಹಿಂದಿನ ಕರೆ ನಿರ್ಬಂಧವು ಯುಎಇ ಕಡೆಯಿಂದ ಆಗಿದ್ದು ಎಂದು ಇಸ್ರೇಲಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ. "ಈಗ ಕರೆಗಳು ಸಾಧ್ಯ ಎಂಬ ಬಗ್ಗೆ ನನಗೆ ಗೊತ್ತಿದೆ" ಎಂದು ಅವರು ಮಾಧ್ಯಮ ಸಂಸ್ಥೆಯೊಂದರ ಜತೆ ಮಾಹಿತಿ ಹಂಚಿಕೊಂಡಿದ್ದಾರೆ.

ಯುಎಇಯ ಎರಡು ಮುಖ್ಯ ಟೆಲಿಕಾಂ ಸಂಸ್ಥೆಗಳಾದ ಡು ಮತ್ತು ಎತಿಸಲಾತ್ ಈಗಿನ ಬೆಳವಣಿಗೆ ಕುರಿತು ಯಾವ ಪ್ರತಿಕ್ರಿಯೆ ಕೊಟ್ಟಿಲ್ಲ. ಇಪ್ಪತ್ತೈದು ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಅರಬ್ ದೇಶವೊಂದರೊಂದಿಗೆ ಇಸ್ರೇಲ್ ಶಾಂತಿ ಒಪ್ಪಂದವನ್ನು ಮಾಡಿಕೊಂಡಿದೆ.