ಕೇಂದ್ರ ಬಜೆಟ್ 2020: ಚಿನ್ನದ ಮೇಲಿನ ಆಮದು ಸುಂಕ ಇಳಿಸುವ ನಿರೀಕ್ಷೆ

ಮುಂಬರುವ ಕೇಂದ್ರ ಬಜೆಟ್ 2020ರಲ್ಲಿ ಚಿನ್ನದ ಆಮದಿನ ಮೇಲಿನ ಸೀಮಾ ಸುಂಕ (ಕಸ್ಟಮ್ಸ್ ಡ್ಯೂಟಿ) ಇಳಿಕೆ ಮಾಡಬಹುದು ಎಂಬ ನಿರೀಕ್ಷೆಯನ್ನು ವರ್ಲ್ದ್ ಗೋಲ್ಡ್ ಕೌನ್ಸಿಲ್ ವ್ಯಕ್ತಪಡಿಸಿದೆ. ಪ್ರಮುಖ ಮಾಧ್ಯಮಗಳ ವರದಿ ಪ್ರಕಾರ, ಈಗ ಇರುವ 12.5 ಪರ್ಸೆಂಟ್ ಅನ್ನು ಈ ಹಿಂದೆ ಇದ್ದ 10 ಪರ್ಸೆಂಟ್ ಗೆ ಇಳಿಸಬಹುದು ಎನ್ನಲಾಗುತ್ತಿದೆ. ಇದರಿಂದ ಕಾನೂನುಬಾಹಿರ ಚಿನ್ನದ ಸಾಗಣೆಗೂ ಕಡಿವಾಣ ಬೀಳಬಹುದು ಎಂಬ ಮಾತಿದೆ.

ದೇಶದಲ್ಲಿ ಚಿನ್ನಕ್ಕೆ ಬೇಡಿಕೆ ಹೆಚ್ಚಿದ್ದು, ಕಳೆದ ಒಂದು ವರ್ಷದಲ್ಲೇ ಚಿನ್ನದ ಮೇಲಿನ ಹೂಡಿಕೆಗೆ 20 ಪರ್ಸೆಂಟ್ ರಿಟರ್ನ್ಸ್ ಬಂದಿದೆ. ಈಚೆಗೆ ವಿಧಿಸಿದ್ದ ಚಿನ್ನದ ಅಮದು ಸುಂಕವನ್ನು ಮುಂಬರುವ ಬಜೆಟ್ ನಲ್ಲಿ ಇಳಿಸಿದರೆ ಬಹಳ ಸಂತೋಷವಾಗುತ್ತದೆ. ಹೀಗೆ ಸುಂಕ ಇಳಿಸುವುದರಿಂದ ಕಾನೂನುಬಾಹಿರವಾದ ಚಿನ್ನದ ವ್ಯವಹಾರ ಕಡಿಮೆ ಆಗುತ್ತದೆ ಎಂದು ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಸಿಇಒ ಹೇಳಿದ್ದಾರೆ.

ಆಮದು ಸುಂಕ ಹೆಚ್ಚು ಮಾಡುವುದರಿಂದ ಕಾನೂನುಬದ್ಧವಾಗಿ ವ್ಯವಹಾರ ಮಾಡುವವರಿಗೆ ಶಿಕ್ಷೆ ವಿಧಿಸಿದಂತೆ ಆಗುತ್ತದೆ. ಆಮದು ಸುಂಕ ಇಳಿಸುವುದರಿಂದ ಒಟ್ಟಾರೆ ಮಾರುಕಟ್ಟೆಗೂ ಒಳ್ಳೆಯದು. ಸಾಮಾಜಿಕವಾಗಿಯೂ ಒಳ್ಳೆ ನಡವಳಿಕೆಗೆ ಬೆಂಬಲಿಸಿದಂತೆ ಆಗುತ್ತದೆ ಎಂದು ಅವರು ಅಭಿಪ್ರಾಯ ಪಟ್ಟಿದ್ದಾರೆ.

ಚಿನ್ನದ ಆಮದು ಸುಂಕವನ್ನು ಇಳಿಸಿದರೆ ಸರ್ಕಾರದ ಆದಾಯಕ್ಕೂ ಹೊಡೆತ ಬಿದ್ದಂತಾಗುತ್ತದೆ. ಈಗಾಗಲೆ ಜಿಡಿಪಿ ದರ ಐದು ಪರ್ಸೆಂಟ್ ಗೆ ಇಳಿದು, ಹನ್ನೊಂದು ವರ್ಷದ ಕನಿಷ್ಠ ಮಟ್ಟದಲ್ಲಿದೆ.