ಬಜೆಟ್ 2021: ಹಳೆಯ ವಾಹನಗಳಿಗೆ ಸ್ಕ್ರಾಪಿಂಗ್ ನೀತಿ ಪ್ರಕಟಿಸಿದ ಸಚಿವೆ

ನವದೆಹಲಿ, ಫೆಬ್ರವರಿ 1: ವಾಹನ ಉದ್ಯಮ ಕ್ಷೇತ್ರದ ಬದಲಾವಣೆಗೆ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಈ ಬಾರಿಯ ಬಜೆಟ್‌ನಲ್ಲಿ ಆದ್ಯತೆ ನೀಡಿದ್ದು, ಹಳೆಯ ವಾಹನಗಳನ್ನು ಸ್ಕ್ರಾಪ್ ಮಾಡುವ ಹೊಸ ನೀತಿಯನ್ನು ಘೋಷಿಸಿದ್ದಾರೆ.

20 ವರ್ಷದಷ್ಟು ಹಳೆಯದಾದ ಖಾಸಗಿ ವಾಹನಗಳು ಹಾಗೂ 15 ವರ್ಷಗಳಷ್ಟು ಹಳೆಯದಾದ ವಾಣಿಜ್ಯ ವಾಹನಗಳನ್ನು ಸ್ಕ್ರಾಪ್‌ಗೆ ಹಾಕುವ ಸಂಬಂಧ ಹೊಸ ಸ್ಕ್ರಾಪೇಜ್ ನೀತಿಯನ್ನು ನಿರ್ಮಲಾ ಸೀತಾರಾಮನ್ ಪ್ರಕಟಿಸಿದ್ದಾರೆ.

ಈ ವಾಹನ ಸ್ಕ್ರಾಪಿಂಗ್ ನೀತಿಯು ಸ್ವಯಂ ಪ್ರೇರಣೆಯದ್ದಾಗಿರಲಿದ್ದು, 20 ವರ್ಷದ ಖಾಸಗಿ ಮತ್ತು 15 ವರ್ಷದ ವಾಣಿಜ್ಯ ವಾಹನಗಳನ್ನು ಫಿಟ್ನೆಸ್ ಪರೀಕ್ಷೆಗೆ ಒಳಪಡಿಸಲಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.

ತಮಿಳುನಾಡು, ಕೇರಳ, ಪಶ್ಚಿಮ ಬಂಗಾಳ ಮತ್ತು ಅಸ್ಸಾಂ ರಾಜ್ಯಗಳಿಗೆ ಪ್ರಮುಖ ರಾಷ್ಟ್ರೀಯ ಹೈವೇ ಯೋಜನೆಗಳನ್ನು ಘೋಷಿಸಲಾಗಿದೆ. ಈ ರಾಜ್ಯಗಳಲ್ಲಿ ಪ್ರಸಕ್ತ ಚುನಾವಣೆ ನಡೆಯಲಿದೆ. ಕೇರಳಕ್ಕೆ 65,000 ಕೋಟಿ ರೂ ವೆಚ್ಚದಲ್ಲಿ 1,100 ಕಿಮೀ, ತಮಿಳುನಾಡಿನಲ್ಲಿ 3,500 ಕಿಮೀ, ಅಸ್ಸಾಂನದಲ್ಲಿ ಮುಂದಿನ ಮೂರು ವರ್ಷಗಳಲ್ಲಿ 1,300 ಕಿಮೀ ಮತ್ತು ಪಶ್ಚಿಮ ಬಂಗಾಳದಲ್ಲಿ 95,000 ಕೋಟಿ ವೆಚ್ಚದಲ್ಲಿ 675 ಕಿಮೀ ಹೆದ್ದಾರಿ ನಿರ್ಮಾಣವಾಗಲಿದೆ.