ಪ್ರತಿ ವರ್ಷ 5 ತಿಂಗಳು ಮಾತ್ರ ಇರುವ ಈ ಹೋಟೆಲ್ ನಲ್ಲಿ ಒಂದು ರಾತ್ರಿಗೆ 1 ಲಕ್ಷ
ಸಾಮಾನ್ಯವಾಗಿ ಒಂದು ಹೋಟೆಲ್ ಕಟ್ಟುತ್ತಾರೆ ಅಂದರೆ ಬಹಳ ವರ್ಷಗಳ ಕಾಲ ಅದು ಉಳಿಯಲಿ ಎಂಬ ಕಾರಣಕ್ಕೆ ನಿರ್ಮಾಣ ಮಾಡುತ್ತಾರೆ. ಆದರೆ ಈ ವಿಶ್ವದಲ್ಲಿ ಇಂಥದ್ದೊಂದು ಒಂದು ಹೋಟೆಲ್ ಇದೆ. ಪ್ರತಿ ವರ್ಷ ನಿರ್ಮಾಣ ಮಾಡುತ್ತಾರೆ. ಆ ನಂತರ ಬೇಸಿಗೆ ಬರುತ್ತಿದ್ದ ಹಾಗೆ ಅದು ಕರಗಿ ಹೋಗುತ್ತದೆ.
ಈ ಹೋಟೆಲ್ ಬಗ್ಗೆ ತಿಳಿದುಕೊಂಡರೆ ಖಂಡಿತಾ ನಿಮಗೆ ಅಚ್ಚರಿಯಾಗುತ್ತದೆ. ಈ ವಿಶಿಷ್ಟ ಹೋಟೆಲ್ ಇರುವುದು ಸ್ವೀಡನ್ ನಲ್ಲಿ. ಇದನ್ನು ಐಸ್ ಹೋಟೆಲ್ ಅಂತ ಕೂಡ ಕರೆಯುತ್ತಾರೆ. ಈ ಸ್ವೀಡನ್ ನ ಹೋಟೆಲ್ ಅನ್ನು ಪ್ರತಿ ವರ್ಷದ ಚಳಿಗಾಲದಲ್ಲಿ ನಿರ್ಮಾಣ ಮಾಡುತ್ತಾರೆ. ಅದು ಐದು ತಿಂಗಳ ಮಟ್ಟಿಗೆ ಮಾತ್ರ. ಆ ನಂತರ ಅದು ಕರಗಿ ಹೋಗುತ್ತದೆ.
ಈ ವಿಶಿಷ್ಟ ಹೋಟೆಲ್ ಅನ್ನು ನಿರ್ಮಾಣ ಮಾಡುವ ಪರಿಪಾಠ 1989ರಿಂದ ಆರಂಭವಾಗಿದೆ. ಸ್ವೀಡನ್ ನಲ್ಲಿ ಇರುವ ಟೋರ್ನೆ ನದಿಯ ದಡದಲ್ಲಿ ಹೋಟೆಲ್ ನಿರ್ಮಾಣ ಆಗುತ್ತದೆ. ಇದಕ್ಕಾಗಿ ನದಿಯಿಂದ 2500 ಟನ್ ಐಸ್ ಅನ್ನು ತೆಗೆದುಕೊಳ್ಳಲಾಗುತ್ತದೆ. ಆ ನಂತರ ಅಕ್ಟೋಬರ್ ತಿಂಗಳಲ್ಲಿ ಹೋಟೆಲ್ ನಿರ್ಮಾಣ ಆರಂಭವಾಗುತ್ತದೆ.
ವಿಶ್ವದ ನಾನಾ ಭಾಗಗಳಿಂದ ಈ ಸ್ಥಳಕ್ಕೆ ಕಲಾವಿದರು ಬಂದು, ತಮ್ಮ ಪ್ರತಿಭಾ ಪ್ರದರ್ಶನ ಮಾಡುತ್ತಾರೆ. ಪ್ರತಿ ವರ್ಷವೂ ಪ್ರವಾಸಿಗರಿಗಾಗಿ ಈ ಹೋಟೆಲ್ ನಲ್ಲಿ ಹಲವು ರೂಮ್ ಗಳನ್ನು ಮಾಡಲಾಗುತ್ತದೆ. ಈ ಸಲ 35 ರೂಮ್ ಗಳನ್ನು ನಿರ್ಮಿಸಲಾಗಿದೆ. ಈ ರೂಮ್ ನೊಳಗೆ ಮೈನಸ್ 5 ಡಿಗ್ರಿ ಸೆಲ್ಷಿಯಸ್ ತಾಪಮಾನ ಇರುತ್ತದೆ. ಅಂದ ಹಾಗೆ ಪ್ರತಿ ವರ್ಷ ಈ ಹೋಟೆಲ್ ಗೆ 50 ಸಾವಿರ ಪ್ರವಾಸಿಗರ ಭೇಟಿ ನೀಡುತ್ತಾರೆ.
ಹೊರಗಿನಿಂದಾಗಲೀ ಅಥವಾ ಒಳಗಿನಿಂದಾಗಲೀ ಈ ಹೋಟೆಲ್ ಬಹಳ ಸುಂದರ. ಮೇ ತಿಂಗಳ ತನಕ ಈ ಹೋಟೆಲ್ ಇರುತ್ತದೆ. ಯಾವಾಗ ಮಂಜು ಕರಗಲು ಆರಂಭವಾಗುತ್ತದೋ ಹೋಟೆಲ್ ಬಂದ್. ಈ ಹೋಟೆಲ್ ನಲ್ಲಿ ಒಂದು ರಾತ್ರಿ ಉಳಿದುಕೊಳ್ಳುವುದಕ್ಕೆ 17 ಸಾವಿರ ರುಪಾಯಿಯಿಂದ ಆರಂಭವಾಗಿ 1 ಲಕ್ಷದ ತನಕ ದರ ಇದೆ.
ಹೋಟೆಲ್ ರಚನೆ ಪರಿಸರಸ್ನೇಹಿ. ಸೌರಶಕ್ತಿಯನ್ನು ಮಾತ್ರ ಬಳಸಲಾಗುತ್ತದೆ. ಇಲ್ಲಿ ಐಸ್ ಬಾರ್ ಇದೆ. ಮಕ್ಕಳು ಆಟವಾಡುವುದಕ್ಕೆ ಪ್ರತ್ಯೇಕ ಸ್ಥಳ ಇದೆ.